වයස අවුරුදු හයක දරුවකුගේ නූතන තාක්ෂණික දැනුම වයස අවුරුදු 45 ක වැඩිමහල් අයකුගේ දැනුම පරදන බව පර්යේෂණයකින් තහවුරු වී ඇත.
ස්මාර්ට් දුරකථන, ටැබ්ලට් පරිගණක, ත්‍රිමාණ මුද්‍රණ යන්ත්‍ර ඇතුළු නවීන සන්නිවේදන උපකරණ භාවිතයෙන් පසුගිය දශකයේ දී වයස්ගත පුද්ගලයන් පසුපසට තල්ලුකැර දමා ගැටවරයන් ඉදිරියට එමින් තිබෙන බව පර්යේෂකයෝ පවසති. සන්නිවේදන නිරික්ෂණ ආයතනයක් ලෙස කටයුතු කරන ඔෆ්කොම් නමැති ආයතනය පවසන්නේ වසර 2000 දී හෙවත් නව සහශ්‍රකයේ උපත ලබා දැන් වයස අවුරුදු 14 හා 15 වැනි වයස්වල පසුවන නව යොවුන් වියේ දරුවන් උපන් දා සිටම අන්තර්ජාලය සමග ජීවත්වීම හේතුවෙන් ඔවුන් නූතන තාක්ෂණය ඉතා විශ්වාසකටයුතු ලෙස පරිහරණය කරන බවයි.
එසේ ම පෙරපාසල් වයසේ දරුවන් පවා ඔවුන්ගේ වැඩිහිටියන් භාවිතා කරනවාට වඩා නූතන තාක්ෂණික උපකරණ භාවිතා කිරීමට පෙළඹී ඇතැයි ද හෙළිවී තිබේ.
පරීක්ෂණයට සහභාගී වූ අවුරුදු 55ට වැඩි පුද්ගලයන්ගෙන් සියයට 60ක් නව තාක්ෂණය හමුවේ අපහසුතාවයට පත්වූහ. ඔෆ්කෝම් අයාතනය පවසන්නේ නූතන ඩිජිටල් තාක්ෂණය හා මාධ්‍යවල හැඩය තීරණය කරන්නේ සහශ්‍රෙය් දරුවන් විසින් බවයි. දැනට වයස අවුරුදු අටේ දරුවන් ෆේස්බුක්, ට්විටර්, යූ ටියුබ් වැනි සමාජ අන්තර්ජාල අඩිවි නොමැති ලෝකයක් ගැන දන්නේ නැත. ඒ අතරම බොහෝ වැඩිහිටි පුද්ගලයන් ඊ මේල් යැවීම සම්බන්ධව ඉගෙන ගනිමින් සිටියි.
මේ අධ්‍යයනයට බ්‍රිතාන්‍යයේ 2800ක් සම්බන්ධ වූහ. එහිදී නූතන තාක්ෂණය හා විවිධ උපකරණ, භාවිතා කිරීමේ හැකියාව පිළිබඳ ප්‍රශ්නාවලියකට පිළිතුරු දීමට ඔවුන්ට සිදුව ඇත. එම ප්‍රශ්න මාලාවෙන් අවුරුදු 14-15ත් අතර දරුවන්ගේ ලකුණු සාමාන්‍ය 114 ක් වෙද්දී වයස අවුරුදු හයේ දරුවන්ගේ ලකුණු සාමාන්‍යය 98 කි. අවුරුදු 45ක වයසේ පසුවන්නන්ගේ සාමාන්‍ය ලකුණු ප්‍රමාණය 96ක් ලෙස සටහන් වෙද්දී වයස අවුරුදු 75ට වැඩි පුද්ගලයන්ට හිමිවූයේ ලකුණු 80 ක සාමාන්‍යයකි.
තවද වයස අවුරුදු 12ත් 15ත් අතර පසුවන දරුවන්ගෙන් සියයට 84ක් ප්‍රකාශ කැර තිබුණේ අන්තර්ජාලය ඇතුළු නූතන තාක්ෂණය නොමැතිව ජීත්වන්නේ කෙසේ ද යන්න ඔවුන් නොදන්නා බවයි.
