මේ වසරේ දී මුහුදු මාර්ගවලින් ස්පාඤ්ඤයට පැමිණි සංක්‍රමණිකයන්ගේ සංඛ්‍යාව තෙගුණයකින් වැඩි වී ඇතැයි ස්පාඤ්ඤයේ සංක්‍රමණිකයන් සඳහා වූ කොමිසම සඳහන් කරයි.    
 
පසුගිය වසර හා සැසඳීමේදී එම සංඛ්‍යාව තෙගුණයකින් වැඩි වී ඇතැයි ද වැඩිම සංක්‍රමණිකයන් පිරිසක් පැමිණ ඇත්තේ ඇල්ජීරියාව සහ මොරොක්කෝව යන රටවලින් යැයි වාර්තා සඳහන් කරයි. මුහුදු මාර්ග ඔස්සේ ස්පාඤ්ඤයට පැමිණීමට උත්සහා කළ පිරිස් අතුරින් 200කට වැඩි පිරිසක් ජීවිතක්ෂයට පත්ව තිබේ. 
 
ස්පාඤ්ඤය සංක්‍රමණිකයන් සඳහා ආරක්ෂාව සහ දේශපාලන රැකවරණ ලබාදීමේ අයිතිවාසිකම සුරකීම සඳහා ප්‍රතිඥා දී තිබෙන රටකි. සංක්‍රමණිකයන් සඳහා වූ කොමිසමක් පත් කර තිබෙන්නේ ද ඒ වෙනුවෙනි. එම කොමිසම වර්ෂ අවසානයේ නිවේදනයක් නිකුත් කරමින් එම ඉහත කරුණු ප්‍රකාශ කර තිබේ. 
 
මුහුදු මාර්ග ඔස්සේ ස්පාඤ්ඤයේ දකුණු දිග තීරයට මේ වසරේ ජනවාරි 1 වැනිදා සිට දෙසැම්බර් 20 වැනිදා දක්වා කාලයේදී පැමිණ ඇත්තේ සංක්‍රමණිකයන්ගේ සංඛ්‍යාව 21,500කි. මෙම මුහුදු තීරය නැගෙනහිර යුරෝපීය සංක්‍රමණිකයන් අතර වඩාත් ප්‍රසිද්ධියට පත් මුහුදු තීරයකි. පසුගිය වසරේ එම කාලසීමාවේදී ස්පාඤ්ඤයට පැමිණි සංක්‍රමණිකයන්ගේ සංඛ්‍යාව 6,046කි.
 
බෝට්ටු මගින් හෝ වෙනත් ක්‍රමවේද ඔස්සේ ස්පාඤ්ඤයට පැමිණීමට උත්සහා කිරීමේදී මියගිය හෝ අතුරුදන් වූවනගේ සංඛ්‍යාව 223ක් බවත් පසුගිය වසරේදී එම සංඛ්‍යාව 95ක් වූ බවත් සංක්‍රමණිකයන් සඳහා වූ ජාත්‍යන්තර සංවිධානය සඳහන් කරයි.
 
(ඒ.එෆ්.පී 055)