රියාද්හිදීය (ඒ.එෆ්.පී)
 
සෞදි අරාබිය ලිංගික අපයෝජනය, ලිංගික අඩත්තේට්ටම් හා හිරිහැර කිරීම් යනාදිය නෛතික වැරැදි ලෙස නම් කිරීමට තීරණය කර ඇතැයි වාර්තා වේ. 

දැඩි සම්ප්‍රදායවාදී සෞදා රාජධානිය දශක ගණනක් මුළුල්ලේ කාන්තාවන්ට පනවා තිබූ රිය පැදවීමේ තහනම ඉවත් කර මසක් යන්නටත් පෙර මෙම තීරණය ගෙන තිබේ. 
 
සෞදි අරාබියේ කැබිනට් මණ්ඩලයට උපදෙස් ලබාදෙන ‘ෂූරා’ කවුන්සිලය අදාළ නීති කෙටුම්පත අනුමත කර තිබෙන අතර ලිංගික අපයෝජනය, ලිංගික අඩත්තේට්ටම් හා හිරිහැර කිරීමකට වසර පහකින් පටන් ගන්නා සිර දඬුවමක් සහ රියාල් 300,000 (එක්සත් ජනපද ඩොලර් 80,000) දඩයක් පැනවීමට නියමිතය. 
 
මෙම නීති කෙටුම්පත් සෞදි රාජධානියේ නියාමන ඉතිහාසයේ වැදගත් එකතු කිරීමක් යැයි ෂූරා කවුන්සිල සාමාජිකා ලතීෆා අල් ෂලාන් උපුටා දක්වමින් එරට තොරතුරු අමාත්‍යාංශය නිවේදනයක් නිකුත් කරමින් සඳහන් කළේය.
“මෙය සෞදි ව්‍යවස්ථාදායකයේ රික්තයක් පිරෙව්වා” යැයි ද ඇය සඳහන් කර තිබේ.
 
සෞදි කාන්තාවන්ට රිය පැදවීම සඳහා පනවා තිබූ නීතිය ජූනි මස 24 වැනිදා සම්පූර්ණයෙන්ම ඉවත් කෙරෙන අතර එම ක්‍රියාමාර්ගය සෞදියේ ඔටුන්න හිමි මොහොමෙද් බින් සල්මාන් කුමරුගේ සෞදිය ලිබරල්කරණය කිරීමේ වැඩසටහනේ එක් පියවරකි. 
 
ඔටුන්න හිමි කුමරු සෞදියේ රජුට පසු වැඩි බලයක් හිමි තැනැත්තා බවට පත්ව තිබෙන අතර ඔහු ප්‍රගතිශීලි ප්‍රතිසංස්කරණවාදියකු යැයි ද ඇතැම් පිරිස් පවසති. 
සිනමාශාලා සඳහා පනවා තිබූ තහනම ඉවත් කිරීමට සහ ස්ත්‍රී පුරුෂ ඕනෑම අයකුට ප්‍රසංගවලට සහභාගීවීමට ඉඩ සැලැසීම සඳහා සෞදියේ ඔටුන්න හිමි කුමරු පසුගිය මාස කිහිපයේදී නීති වෙනස් කළේය. එම බොහෝ නීති දශක ගණනක් පැවැති නීති වූ අතර එමගින් සෞදියේ ආගමික පොලිසියට වැඩි බලයක් ද ලබා දී තිබිණි. 
 
ඔටුන්න හිමි මූලිකත්වයෙන් සමාජ ප්‍රතිසංස්කරණ මෙසේ සිදුවෙමින් තිබියදී පසුගිය සති කිහිපයේදී කාන්තා අයිතිවාසිකම් වෙනුවෙන් පෙනි සිටි ක්‍රියාකාරිනියන් 11 දෙනකු පොලිස් අත්අඩංගුවට ද පත්ව තිබිණි. 
 
055