ඉස්ලාමාබාද්හීදීය (රොයිටර්)
 
පාකිස්තානයේ පැවැති දේශපාලන රැස්වීමකට එල්ල වූ මරාගෙන මැරෙන බෝම්බ ප්‍රහාරයත් සමඟ එරට ආරක්ෂාව සම්බන්ධයෙන් නැවත වරක් අර්බුදකාරී තත්ත්වයක් උද්ගත වී තිබේ.
 
පාකිස්තාන මහ මැතිවරණය ලබන 25 වැනි දා පැවැත්වීමට නියමිත අතර ඉදිරි සති දෙකක කාලයේදී මැතිවරණ රැළි පැවැත්වීමට ඇති බැවින් ඒවායේ ආරක්ෂාව සම්බන්ධයෙන් ගැටලුකාරී තත්ත්වයක් නිර්මාණය වී ඇත. 
 
නිරිත දිග පාකිස්තානයේ බලුකිස්තාන් පළාතේ පැවැති මැතිවරණ රැළියකට සිකුරාදා (13) එල්ල වූ මරාගෙන මැරෙන බෝම්බ ප්‍රහාරයෙන් 130කට ආසන්න පිරිසක් ජීවිතක්ෂයට පත්වූහ. 
 
එම මරාගෙන මැරෙන බෝම්බ ප්‍රහාරය එල්ල වූයේ පාකිස්තානයේ හිටපු අගමැති නවාස් ෂරීෆ් එරටට පැමිණීමට පැය කිහිපයකට පෙරය. සිකුරාදා (13) ලන්ඩනයේ සිට පාකිස්තානයට පැමිණි හිටපු අගමැතිවරයා ගුවන් තොටුපොළේදී අත්අඩංගුවට පත්විය.
 
එංගලන්තයේ ලන්ඩන් නුවර නිවාස සංකීර්ණයක් මිලදී ගැනීමේදී කරන ලද වංචාවක් ද ඇතුළුව දූෂණ චෝදනා රැසකට වරදකරු කරමින් නවාස් ෂරීෆ්ට වසර දහයක සිර දඬුවමක් නියම කිරීමට එරට අධිකරණයක් මේ මස මුල් සතියේදී පියවර ගෙන තිබිණි. එම තීන්දුව අභියෝගයට ලක්කරමින් ඊට එරෙහිව අභියාචනයක් ඉදිරිපත් කිරීම සඳහා පාකිස්තානයට පැමිණි අවස්ථාවේදී හිටපු අගමැතිවරයා එලෙස ගුවන් තොටේදී අත්අඩංගුවට පත්විය. 
 
මැතිවරණ ප්‍රචාරණ ව්‍යාපාරය උණුසුම් වී තිබෙන අතර හිටපු ක්‍රිකට් ක්‍රීඩක ඉම්රාන් ඛාන්ගේ ‘පාකිස්තාන් තරීෆ් ඊ ඉන්ෆාස්’ පක්ෂයෙන් නවාස් ෂරීෆ් නියෝජනය කරන ‘පාකිස්තාන මුස්ලිම් ලීගය - එන්’ පක්ෂයට දැඩි අභියෝගයක් එල්ල වී තිබේ. ඉම්රාන් ඛාන්ට සහ ඔහුගේ පක්ෂයට ආරක්ෂක අංශවලින් සහයෝගය හිමිවනට චෝදනා එල්ල වී තිබේ. නවාස් ෂරීෆ් අපරාධකරුවකු බවත් ඔහුට කිසිවකුගේ සහාය හිමි නොවිය යුතු බවත් ඉම්රාන් ඛාන් අවධාරණය කරයි.
 
ආරක්ෂාව සම්බන්ධයෙන් ගැටලුකාරී තත්ත්වයක් ඇති වී තිබෙන්නේ මෙවැනි උණුසුම් තත්ත්වයක් මධ්‍යයේය. සිකුරාදා ප්‍රහාරයේ වගකීම අයි.එස් සංවිධානය විසින් බාරගෙන තිබිණි. මේ අතර පසුගිය සති කිහිපයේදී පාකිස්තානයේ ප්‍රදේශ රැසකින් ප්‍රචණ්ඩ ක්‍රියා වාර්තා විය. මිලියන 208ක් ජනහගනයක් වෙසෙන පාකිස්තානයේ ඉදිරි දින කිහිපයේ පැවැත්වෙන මැතිවරණ රැලිවලට දහස් ගණනක් සහභාගී වනු ඇත. ඒ අනුව අවදානම තවත් ඉහළ ගොස් තිබේ.