අම්මාන්හිදීය (රොයිටර්/ඒ.එෆ්.පී)
 
ඇමෙරිකා එක්සත් ජනපදය ජෙරුසෙලම  ඊශ්‍රායලයේ අගනුවර ලෙස පිළිගතහොත් දරුණු ප්‍රතිවිපාක විඳීමට සිදුවනු ඇතැයි ජෝර්දාන විදේශ අමාත්‍යවරයා  අනතුරු අඟවා තිබේ.
 
ඇමෙරිකා එක්සත් ජනපදය ඊශ්‍රායලයේ අගනුවර ලෙස ජෙරුසෙලම පිළිගැනීමට කටයුතු කළහොත් එය අරාබි සහ මුස්ලිම් ලෝකය කෝප ගන්වන ක්‍රියාවක් වනු ඇතැයි ජෝර්දාන විදේශ අමාත්‍ය අයිමාන් සෆාදි එක්සත් ජනපද රාජ්‍ය ලේකම් රෙක්ස් තිලර්සන්ට පවසා තිබේ. 
 
 
ජනාධිපතිවරණ පොරොන්දුවක් ඉටු කරමින් ඇමෙරිකා ජනාධිපති ඩොනල්ඩ් ට්‍රම්ප් ජෙරුසෙලම ඊශ්‍රායලයේ අගනුවර ලෙස පිළිගැනීමට කටයුතු සූදානම් කරමින් සිටින බවට තොරතුරු වාර්තා වීමත් සමඟ මෙම අර්බුදකාරී තත්ත්වය නිර්මාණය වී තිබේ. 
 
කෙසේ නමුත් ජනාධිපති ඩොනල්ඩ් ට්‍රම්ප් උපදේශක වශයෙන් කටයුතු කරන ඔහුගේ බෑණා වන ජාර්ඩ් කුෂ්නර් එවැනි කිසිදු තීරණයක් ගෙන නැතැයි පවසා ඇත. 
 
ඇමෙරිකා එක්සත් ජනපදය ඊශ්‍රායලයේ අගනුවර ලෙස ජෙරුසෙලම පිළිගැනීමට කටයුතු කළහොත් දරුණු ප්‍රතිවිපාක ඇතිවනු ඇතැයි ජෝර්දාන විදේශ අමාත්‍යවරයා ට්විටර් පණිවිඩයක් ද නිකුත් කර තිබිණි. 
 
එවැනි තීරණයක් නිසා තෙල් අර්බුදයක්, මුස්ලිම් හා අරාබි ලෝකය කෝපගැන්වීමක් සහ සාම සැලසුම් සියල්ල විනාශ වීමක් සිදුවිය හැකි යැයි ඔහු තවත් ට්විටර් පණිවිඩයක් නිකුත් කරමින් සඳහන් කර තිබිණි. 
 
මෙම තත්ත්වය සම්බන්ධයෙන් සාකච්ඡා කිරීමට අරාබි ලීගයේ සහ සාමාජික රටවල් 57කින් සමන්විත මුස්ලිම් සහයෝගීතා සංවිධානයේ හදිසි රැස්වීම් කැඳවීමට ද ජෝර්දානය  කටයුතු කර තිබිණි.