(විමුක්ති එස් රුද්‍රිගු)
න්‍යෂ්ටික යුද බලය අතින් රුසියාව සහ චීනය අත්කර ගෙන ඇති සැළකිය යුතු ප්‍රගතියට සම කිරීම සඳහා න්‍යෂ්ටික අවි අත්හදා බැලීම ආරම්භ කරන්න යැයි තමන් යුද දෙපාර්තමේන්තුවට අණදුන් බව ඇමෙරිකානු ජනාධිපති ඩොනල්ඩ් ට්‍රම්ප් ඊයේ(30) ප්‍රකාශ කළේය
අනෙක් රටවල් න්‍යෂ්ටික අවි අත්හදා බැලීමේ වැඩසටහන් ආරම්භ කර ඇති බැවින් තමන් යුද දෙපාර්තමේන්තුවට මෙලෙස අණ ලබාදුන් බව ජනපති ට්‍රම්ප් පැවැසුවේය. අනෙක් රටවල් න්‍යෂ්ටික අවි අත්හදා බලන වේගයට සමාන වේගයකින් ඇමෙරිකාවද මින් ඉදිරියට න්‍යෂ්ටික අවි අත්හදා බලනු ඇතැයි ජනපති ට්‍රම්ප් ප්‍රකාශ කළේය.
දකුණු කොරියාවේ බූසාන් නගරයේ චීන ජනපති ෂි ජින්පින් හමුවීමට සුළු මොහොතකට පෙර සමාජ මාධ්‍ය ඔස්සේ සටහනක් තබමින් ඇමෙරිකානු ජනාධිපති ඩොනල්ඩ් ට්‍රම්ප් මෙම අදහස් පළ කළේය.
ලෝකයේ වැඩියෙන්ම න්‍යෂ්ටික අවි තිබෙන්නේ ඇමෙරිකාවට බවත් දෙවැනි ස්ථානය රුසියාවටත්, තෙවැනි ස්ථානය චීනයටත් හිමිවන බවත් ජනපති ට්‍රම්ප් පැවැසුවේය. චීනය තෙවැනි ස්ථානය හිමිකරගෙන ඇතත් ඇමෙරිකාවේ සහ රුසියාවේ න්‍යෂ්ටික යුද බලයට චීනයට සමකළ නොහැකි බව ඇමෙරිකානු ජනාධිපතිවරයා ප්‍රකාශ කළේය.
ඇමෙරිකාව 1992 වසරින් පසුව න්‍යෂ්ටික අවි අත්හදා බැලීමක් සිදුකර නොමැති බවද ජනපති ඩොනල්ඩ් ට්‍රම්ප් පැවැසුවේය. රුසියාවේ න්‍යෂ්ටික අවි අත්හදා බැලීම පිළිබඳව දැඩි විරෝධය පා දින කීපයකට පසුව ජනපති ට්‍රම්ප් මෙම තීරණය ගෙන ඇති අතර යුද විශ්ලේෂකයෝ ප්‍රකාශ කර ඇත්තේ ට්‍රම්ප් ප්‍රකාශයෙන් රුසියවේ න්‍යෂ්ටික යුද ශක්තිය පිළිබිඹු වන බවත් නැවත න්‍යෂ්ටික අවි අත්හදා බැලීම හැර ඇමෙරිකාවට වෙන විකල්පයක් නොමැති බවත්ය.
ජනපති ඩොනල්ඩ් ට්‍රම්ප්ගේ මෙම ප්‍රකාශය සම්බන්ධයෙන් ප්‍රකාශයක් නිකුත් කරමින් චීනය ප්‍රකාශ කර සිටියේ න්‍යෂ්ටික අවි පිටුදැකීම පිළිබඳව එළැඹි සම්මුතිය ඇමෙරිකාව අවංකවම ආරක්ෂා කරනු ඇති බව බලාපරොත්තු වන බවයි.
