- කැලණි ගංගා ද්‍රෝණියේ ජනතාවට ඉවත් වෙන ලෙස උපදෙස්
- කුඩා වැව් 150 කට හානි
උපුල් වික්‍රමසිංහ - නිමල කොඩිතුවක්කු
පවතින අයහපත් කාලගුණ තත්ත්වය හමුවේ වසර 2016 න් පසු කොළඹට බලපාන දරුණුතම ගංවතුර තත්ත්වය සෙනසුරාදා (29) රාත්‍රියේ හෝ ඒ ආසන්න කාලයේ දී ඇති විය හැකි බව වාරිමාර්ග අධ්‍යක්ෂ ජනරාල් අජිත් ගුණසේකර පසුගිය සිකුරාදා (28) කොළඹ දී පැවසීය.
රටම....
කැලණි ගඟේ ජල මට්ටම අඛණ්ඩව ඉහළ යෑම හේතුවෙන් එම ගංවතුර අවදානම උද්ගතව ඇතැයි පවතින අයහපත් කාලගුණ තත්ත්වය පිළිබඳ තොරතුරු දැනුම්දීම සඳහා පැවති මාධ්‍ය සාකච්ඡාවක දී අධ්‍යක්ෂ ජනරාල්වරයා කීවේ ය.
එදිනම සවස නිවේදනයක් නිකුත් කරමින් එම දෙපාර්තමේන්තුව ජනතාවට දැනුම් දුන්නේ ඉදිරි පැය 24 ක කාලයේ දී කැලණි ගංගා නිම්නයේ පහත්බිම් ප්‍රදේශවලට මෑත ඉතිහාසයේ ඇති නොවුණු මට්ටමේ අධිඅවදානම් ගංවතුර තත්ත්වයක් ඇති විය හැකි බැවින් ජීවිත ආරක්ෂා කරගැනීම පිණිස ආරක්ෂිත ස්ථාන කරා යන ලෙස ය.
මේ අතර පවතින තද වැසි ඇතුළු ආපදා තත්ත්වය හේතුවෙන් මහවැලි, කැලණි, කළු, මැණික් ගඟ සහ ගිං ගඟ, දැදුරුඔය, මී ඔය, කලා ඔය, කුඹුක්කන් ඔය, ගල්ඔය ආශ්‍රිතව මහා ගංවතුර තත්ත්වයන් පවතින බව වාරිමාර්ග දෙපාර්තමේන්තුවේ වාරිමාර්ග අධ්‍යක්ෂ (ජල විද්‍යා හා ආපදා කළමනාකරණ අංශය) එල්. එස්. සූරියබණ්ඩාර මහතා පැවසීය.
මේ වනවිට දිවයිනේ ගංගා ද්‍රෝණි 103 ම අවරණය වන පරිදි තදින් වැසි ඇද හැළෙමින් පවතින බැවින් දිවයින පුරාම අවදානම් තත්ත්වයක් පවතින බවත් ඔහු සඳහන් කළේ ය.
ඉදිරි කාලයේ දී මහවැලි, කැලණි, කළු ඇතුළු ප්‍රධාන ගංගා ආශ්‍රිතව ජීවත්වන ජනතාව කඩිනමින් එම ස්ථානවලින් ඉවත්ව ආරක්ෂිත ස්ථාන කරා ගමන් කළ යුතු බවත් අධ්‍යක්ෂකවරයා සඳහන් කළේය.
දැදුරුඔය ජලාශයෙන් වාන් දොරටු 8 ක් අඩි 18 බැගින් විවෘත කර ඇති බවත් ඉන් තත්පරයට ඝන අඩි 102,000 ක් දැදුරුඔයට නිකුත් කරන බවත් වාරි අධ්‍යක්ෂවරයා සඳහන් කළේය.
මෙයට අමතරව මහවැලි ජලාශවල, රාජාංගනය කලාඔය ඇතුළු ජලාශවල වැඩි ධාරිතාවකින් වාන් දමන බවත් ඔහු සඳහන් කළේය.
ඕනෑම ජලාශයකින් ඉතිහාසයේ මෙතෙක් වාර්තා වූ වැඩිම ජල ප්‍රමාණයක් එක්වර නිකුත් කිරීම මෙය විය හැකි බැවින් ජලාශ අවට ජනතාව අතිශය අවධානයෙන් කටයුතු කළ යුතු බවත් ඔහු කීවේය.
අත්තනගලු ඔය, හැඩ ඔය, මාදුරුඔය, සහ යාන් ඔය ආශ්‍රිතව ගං වතුර තත්ත්වයන් පවතින බවත් සූරියබණ්ඩාර මහතා පැවසීය.
පවතින වර්ෂාව සහිත කාලගුණ තත්ත්වය හේතුවෙන් රාජාංගනය, දැදුරු ඔය, ඉඟිනිමිටිය, තබ්බෝව, ලු‍ණුගම්වෙහෙර ඇතුළු ප්‍රධාන ජලාශ 53 ක් වාන් දමමින් පවතින බවත් සූරියබණ්ඩාර මහතා පැවසීය.
වාරිමාර්ග දෙපාර්තමේන්තුව යටතේ පාලනය වන ප්‍රධාන ජලාශ 73 න් බොහෝ ජලාශවල ජල ධාරිතාව සියයට 90 ඉක්මවා ඇති බවත් ඔහු සඳහන් කළේය.
ප්‍රධාන ජලාශවලට අමතරව මධ්‍යම ප්‍රමාණයේ ජලාශ 270 න් වැඩි ප්‍රමාණයක් වාන් දමමින් පවතින බවත් සූරියබණ්ඩාර මහතා පැවසීය.
පවතින අධික ජලධාරිතාව හේතුවෙන් බොහෝ කුඩා සහ මධ්‍යම ප්‍රමාණවල ජලාශවල වැව් කන්ඩි බිඳී ගොස් ඇති බවත් ඔහු සඳහන් කළේය.
වාන් ජලය නිකුත් කරන ජලාශ ආශ්‍රිත පහත් බිම්වල වෙසෙන ජනතාවට ආපදා කළමනාකරණ මධ්‍යස්ථාන විසින් නිකුත් කරනු ලබන නිවේදන සම්බන්ධව නිරන්තර අවධානය යොමු කරන ලෙසත් ඔහු තවදුරටත් සඳහන් කරයි.
මේ අතර දිවයින පුරා පිහිටි බොහෝ ප්‍රධාන ගංගා සහ අතු ගංගාවල සැලකිය යුතු ජල මට්ටමක් පවතින බැවින් එම ප්‍රදේශවල පහත් බිම්වල සිටින ජනතාව අවධානයෙන් පසුවීම වැදගත් බවද වාරි අධ්‍යක්ෂවරයා සඳහන් කළේය.
මේ හේතුවෙන් ඒවායේ ගමන් කිරීම, ඔරු පැදීම, මසුන් ඇල්ලීම සහ දිය නෑමෙන් වැළකී සිටිය යුතු බවත් ඔහු තවදුරටත් පැවසීය.
මේ අතර පවතින අයහපත් කාලගුණ තත්ත්වය හමුවේ ගොවි ජන සංවර්ධන දෙපාර්තමේන්තුව යටතේ පාලනය වෙන කුඩා වැව් 150 කට පමණ හානි වී ඇතැයි එම දෙපාර්තමේන්තුව කියයි.
ගොවිජන කොමසාරිස් ධම්මික රණතුංග ඉරිදා ලංකාදීපයට පැවසුවේ බස්නාහිර පළාතේ සහ ගාල්ල දිස්ත්‍රිකකයේ පිහිටි කුඩා වැව් හැර සෙසු දිසාවන්හි පිහිටි කුඩා වැව්වලට හානි සිදු වී ඇති බව ය.
