(බන්දු තඹවිට)

කළුතර දිස්ත්‍රික්කයේ කොවිඩ් 19 රෝග ව්‍යාප්තිය අඩුවීමත් සමග මී උණ පැතිරීමේ අවදානමක් ඇතිවී ඇති බවත් ,මේ වන විට එම තත්වය පාලනය කිරීම සඳහා සියලු කටයුතු ආරම්භ කර ඇති බවත් කළුතර දිස්ත්‍රික් ප්‍රාදේශීය වසංගත රෝග විශේෂඥ වෛද්‍ය ප්‍රසාද් ලියනගේ මහතා පැවසීය.

කළුතර දිස්ත්‍රික්කයේ කොරෝනා ආසාදිතයන් 45 ක් පමණ වාර්තා වූ අතර කළුතර දිස්ත්‍රික්කයේ මේ වන විට මී උණ රෝගීන් 120 ක් පමණ වාර්තාවී තිබේ.

මෙසේ මී උණ වැඩිවීමට දිස්ත්‍රික්කය පුරා පුරන් කුඹුරු නැවත අස්වැද්දීමද හේතුවක් වී ඇති බවද ,පසුගිය කාලයේ මී උණ රෝගයට ගොවියන්ට භාවිතා කිරීම සඳහා ලබා දෙන බෙහෙත් වල හිඟයක් පැවතියද මේ වන විට එම බෙහෙත් ලැබී ඇති බැවින් මහජන සෞඛ්‍ය පරීක්‍ෂක වරුන් මගින් එම බෙහෙත් ගොවියන් වෙත ලබාදීමට කටයුතු සලසා ඇති බවත් හෙතෙම වැඩිදුරටත් පැවසීය.

එසේම කුඹුරු වැඩ වල නිරතවීමේදී තුවාල තිබේ නම් එම කටයුතු වලින් ඉවත්වීමටත්,දිය කඩිති,ඇළ දොළ වලින් ඇඟ සේදීම හෝ ස්නානය කිරීම නොකරන ලෙසත් ,කළුතර ප්‍රාදේශීය සෞඛ්‍ය සේවා අධ්‍යක්‍ෂ වෛද්‍ය උදය රත්නායක මහතාගේ මෙහෙය වීමෙන් දිස්ත්‍රික්කය පුරා මී උණ සහ ඩෙංගු රෝග පැතිරීම පාලනය කිරීමට කටයුතු ආරම්භ කර ඇති බවත් වෛද්‍ය ප්‍රසාද් ලියනගේ මහතා පැවසීය.