(සුජිත් හේවාජුලිගේ )

ප්‍රමාණවත් ඉන්ධන තොග ඉදිරි දින කිහිපයේදී නොලැබුණහොත් රට පුරා ( දිස්ත්‍රික්ක 7ක)  සියලු තේ  කර්මාන්ත ශාලා වැසී යෑමේ  බරපතළ අවදානමක් පවතින බව තේ කම්හල් හිමියන්ගේ සංගමයේ සභාපති ලයනල් හේරත් මහතා පැවසීය.

රට පුරාම පෞද්ගලික තේ කම්හල් දෙසිය හැට හතරක් සහ වැවිලි සමාගම යටතේවූ සහ  සාමාජිකයන්  නොවන  කම්හල් තවත් දෙසිය පනහක්  පමණ  ක්‍රියාත්මක වේ.

සමහර  තේ කම්හල් හිමියන් ඉන්ධන ලබාගැනීමට මුදල් ගෙවා ඇතත් ඉන්ධන ලබාදීම මේ දක්වාම සිදුවී නැති බවත් ඛනිජ තෙල් සංස්ථාවෙන් තේ කර්මාන්තයට ලැබෙන සහයෝගය  ප්‍රමාණවත් නැති බවත්  සභාපතිවරයා කීවේය.

ඉන්ධන ප්‍රශ්නය සහ විදුලිය කැපීම හේතුවෙන්  දිවයිනේ සමහර ප්‍රදේශවල කර්මාන්තශාලා ක්‍රියාත්මක වන්නේ සතියේ  දින හතරක් පමණක් බවද හෙතෙම සඳහන් කළේය.

ඉන්ධන ප්‍රශ්න හේතුවෙන් තේ දලු ප්‍රවාහන   කටයුතුද  අඩපණවී ඇතැයි  වාර්තා වේ.

මේ අතර විදුලිය කප්පාදුව නිසාද තේ කර්මාන්තශාලා බරපතළ අර්බුදයකට වැටී ඇතැයි සඳහන් කළ ලයනල් හේරත් මහතා විදේශ විනිමය වැඩි වශයෙන් ලැබෙන තේ කර්මාන්තයේ ප්‍රශ්න ගැන රජය මීට වඩා අවධානය යොමු කළ යුතු බවද සඳහන් කළේය.

රටපුරා කුඩා තේ වතු හිමියන් ලක්ෂ හතරක් සහ  තේ කර්මාන්තය ආශ්‍රිත වක්‍ර රැකියාවන්හි නියැළෙන   ලක්ෂ විස්සකට ආසන්න පිරිසක්  මේ තත්වය හමුවේ බරපතළ පීඩාවකට ලක්ව  සිටින බව තේ කම්හල් හිමියන්ගේ සංගමය පවසයි.

තේ කර්මාන්තශාලා සඳහා ශ්‍රී ලංකා ගමනාගමන මණ්ඩලයෙන් ඉන්ධන ලබාදීමේ වැඩපිළිවෙලක්  මෙයට පෙර ආරම්භ වුවත් එය අසාර්ථකවූ බවද සංගමය සඳහන් කරයි.