(ජේ.ඒ.එල් ජයසිංහ)

නව අධ්‍යාපන ප්‍රතිසංස්කරණය මගේ යෝජනාවක් නොවෙයි 200 කට අධික විද්වතුන්ගෙන් සමන්විත මණ්ඩලයකගේ යෝජනා. ඒ අනුව නව කෝණයකින් යුක්තව ධනාත්මක අධ්‍යාපන ප්‍රතිසංස්කරණයක් ක්‍රමානූකූලව සිදුවනවා. ඒ තුලින් ජනතාවට අහිමි වූ බොහෝ දෑ යළි දිනා ගැනීමට හැකියාව පවතිනවා යැයි අග්‍රාමාත්‍ය අධ්‍යාපන අමාත්‍ය ආචාර්ය හරීනී අමරසූරිය මෙනවිය පැවැසුවාය.

මහනුවර දිස්ත්‍රික් ලේකම් කාර්යාල ශ්‍රවණාගාරයේ පැවති නව අධ්‍යාපන ප්‍රතිසංස්කරණය පිළිබඳ අදාළ පාර්ශව දැණුවත් කිරීමේ රැස්වීමට සහභාගි වෙමින් අගමැතිවරිය එසේ පැවසුවාය.

එහිදී වැඩි දුරටත් අදහස් දැක්වූ අග්‍රාමාත්‍ය වරිය මෙසේද පැවසුවාය.

රජය දියත් කරන්නේ කෙටිකාලීන නොව දීර්ඝ කාලීන ප්‍රථිපල ලැබෙන අධ්‍යාපන ක්‍රමයක් ,විෂය නිර්දේශ වෙනස් කිරීම පමණක් නොව සමස්ත අධ්‍යාපනයේ ධනාත්මක වර්ධනයක් නව අධ්‍යාපනික ප්‍රතිසංස්කරණ මගින් අපේක්ෂා කරනවා ,එහි ප්‍රථිපල කෙටි කාලීනව නොව වසර දහයක පමණ දීර්ඝ කාලයක් තුලදී අපේක්ෂා කල හැකියි.

ඉකුත් පාලන සමයේදී සැලසුම් කරන ලද ප්‍රතිසංස්කරණවල දීර්ඝ කිරීමක් නොවෙයි වත්මන් ආණ්ඩුව මෙම ප්‍රතිසංස්කරණ ගෙන එන්නේ අධ්‍යාපනය හේතුවෙන් ජනතාවට අහිමි වූ දෑ යලි ලබාදීම සඳහායි.