(ඉන්දිකා රාමනායක) 

මෝදර ප්‍රදේශයේ සංවිධානාත්මක අපරාධකරුවෙකු මෙන්ම මත්ද්‍රව්‍ය ජාවාරම්කරුවෙකු ලෙසට හැඳින්වෙන වැල්ලේ සාරංග කැමැත්තාගේ ඝාතන රැසකට සම්බන්ධ ගෝලයකු අයිස් මත්ද්‍රව්‍ය සමඟ කොළඹ උතුර කොට්ඨාශ අපරාධ විමර්ශන අංශය මගින් අත්අඩංගුවට ගෙන ඇති බව පොලිසිය සඳහන් කරයි. 

මෙලෙස අත්අඩංගුවට ගෙන ඇත්තේ මට්ටක්කුලිය සමිට්පුර පදිංචි (25) තරුණයෙකු බවත් අඩංගුවට ගන්නා අවස්ථාවේ සැකකරු සන්තකයේ අයිස් මත්ද්‍රව්‍ය ග්‍රෑම් 27 ට ආසන්න ප්‍රමාණයක් තිබූ බව පොලිසිය කියයි. 

අත්අඩංගුවට ගත් සැකකරු ඝාතන හතරකට සම්බන්ධ පුද්ගලයකු බවද පොලිසිය කියයි. 

2022 වසරේදී ග්‍රෑන්ඩ්පාස් මහවත්ත ප්‍රදේශයේදී පුද්ගලයකු ඝාතනය කර කැලණි ගඟට දැමීම, 2023 වසරේදී සමිට්පුර ප්‍රදේශයේදී කාන්තාවක් පිහියකින් ඇන ඝාතනය කිරීම, එම වසරේම අලිවත්ත ප්‍රදේශයේදී තියුණු ආයුධවලින් කපා පුද්ගලයෙකු ඝාතනය කිරීම, එම වසරේම බේරුවල ප්‍රදේශයේදී තියුණු ආයුධවලින් කපා කොටා පුද්ගලයෙකුට තුවාල සිදුකිරීම, 2025 වසරේදී වත්තල  ප්‍රදේශයේදී තියුණු ආයුධවලින් කපා පුද්ගලයෙකු ඝාතනය කිරීම ඔහුට එරෙහිව ඇති චෝදනා බව පොලිසිය සඳහන් කරයි.