(යොහාන් භාසුර)

සිංහල හා දෙමළ අලුත් අවුරුද්දට ගම්බිම් බලා යන ජනතාවගේ පහසුව සඳහා බස් රථ සේවාවේ පළමු අදියර ලබන අප්‍රේල් මස 8 වැනිදා සිට 15 දක්වා ක්‍රියාත්මක කිරීමට සැළසුම් කර තිබේ.

ගම්බිම් බලාගිය ජනතාවට දෙවන අදියර යටතේ නැවත කොළඹ හා තදාසන්න ප්‍රදේශවලට පැමිණීමේදී ගාල්ල, මාතර, ඇඹිලිපිටිය, මොණරාගල, බදුල්ල, හැටන්, මහනුවර සහ නුවරඑළිය යන බස් පර්යන්තවල මගී ඉල්ලුමට සරිලන පරිදි බස් රථ යෙදවීමට නියමිතය.

සිංහල අලුත් අවුරුදු මගී ප්‍රවාහන සේවාව අදියර දෙකකින් ක්‍රියාත්මක කරන බවත් මෙම කාලය තුළ දවසේ පැය 24 පුරාම විශේෂ මෙහෙයුම් මැදිරියක් බස් රථ සඳහා ක්‍රියාත්මක කරන බවත් ගමනාගමන කොමිසම කියයි.  

එම කාලය තුළ බස්රථවල ඇතිවන තදබදය අඩු කරගැනීමට බස් සංචිතයක් පවත්වාගැනීමට සහ කොළඹ බැස්ටියන් මාවත ප්‍රධාන බස් පර්යන්තයේ බස් සේවා සඳහා ඉල්ලුම වැඩි වුවහොත් බස්හිමියන්ට නොමිලයේ තාවකාලික මගී සේවා අවසර පත් නිකුත් කිරීමට තීරණය කර ඇති බවත් කඩවත, කඩුවෙල බස් පර්යන්තයන්වල හා මාකුඹුර බහුවිධ හුවමාරු මධ්‍යස්ථානයේද එම කාල සිමාව තුළ අඛණ්ඩව සේවා පවත්වාගෙන යන බවත් ගමනාගමන කොමිසම සඳහන් කරයි.

ජාතික ගමනාගමන කොමිසම, යුධ හමුදාව, පොලිසිය, ලංකා ගමනාගමන මණ්ඩලය, පළාත් මාර්ගස්ථ මගී ප්‍රවාහන අධිකාරිය හා කොළඹ නගර සභාව යන ආයතන එකතුව මෙම වැඩසටහන ක්‍රියාත්මක කරයි.