මේ දිනවල තායිලන්තයේ, බැංකොක් නගරයේ රූපගත කිරීම් කටයුතු සිදුකෙරෙන 'Force 2' චිත්‍රපටයේ ප්‍රධාන නිළි චරිතයට පණ පොවන සුරූපී සොනක්ෂි සින්හා එක දිගට රූපගත කිරීම් කටයුතු සඳහා සම්බන්ධ වී සිටීම හේතුවෙන් දැඩි ලෙස වෙහෙස මහන්සි වී සිටින බව සිය ඉන්ස්ටග්‍රෑම් ගිණුමේ සඳහන් කර සිටියි. එකදිගට දින පහක් පුරා දිවා රාත්‍රි රූපගත කිරීම් කටයුතුවලට තමා පසුගිය සතියේදී එක්වූ බවත් පවසන සොනක්ෂි මෙතෙක් කලක් තමා නොකඩවාම රූපගත කිරීම් සඳහා එක්වූ පළමු අවස්ථාව මෙය බවද සඳහන් කර සිටියි.

ඇය මෙසේ වෙහෙස මහන්සි සිටින ඡායාරූපයක්ද සිය ඉන්ස්ටග්‍රෑම් ගිණුමට එක්කොට තිබෙන අතර, එය බොහෝ සිනමා ලෝලීන් ප්‍රමාණයක් නරඹා තිබෙන බවටද තොරතුරු වාර්තා වනවා. තායිලන්තයේ බැංකොක් නගරයට පෙර 'Force 2' චිත්‍රපටයේ රූපගත කිරීම් කටයුතු චීනයේ ෂැංහයි නගරයේදී සිදු කරනු ලැබ තිබුණි. මෙම චිත්‍රපටයේ සොනක්ෂි ජෝන් ඒබ්‍ර්හිම් සමග ප්‍රධාන චරිත නිරූපණය කිරීම විශේෂත්වයකි. 'Force 2' චිත්‍රපටය 2011 වසරේ තිරගත වූ 'Force' චිත්‍රපටයේ දෙවැනි නිර්මාණය ද වේ.