තවත් නොබෝ දිනකින් රූපගතකිරීම් කටයුතු ආරම්භ කිරීමට සැලසුම් කර ඇති මෝහිත් සූරීගේ 'හාෆ් ගර්ල්ෆෙන්ඩ්' චිත්‍රපටයේ ප්‍රධාන නිළි චරිතයට මේ වනවිට ජනප්‍රිය සිනමා නිළි ශ්‍රද්ධා කපූර් තෝරාගෙන ඇත. චිත්‍රපටයේ කතා තේමාවට අනුව ඇයි මෙහි ගිටාර් වාදන ශිල්පිනියක ලෙස කටයුතු කරන බවට තොරතුරු වාර්තා වන අතර, ශ්‍රද්ධා පවසන්නේ එය තමාට අභියෝගාත්මක චරිතයක් වී ඇති බවයි.

පසුගිය වසරේ තිරගත වූ 'එනි බොඩි කැන් ඩාන්ස්' චිත්‍රපටය වෙනුවෙන් නර්තනයද, මේ වසරේ තිරගත වූ 'බාගි' චිත්‍රපටය වෙනුවෙන් සටන් කලාවද හදාරන්නට තමාට සිදුවූ බව පවසන ශ්‍රද්ධා ගිටාර් වාදන ශිල්පිනියක ලෙස 'හාෆ් ගර්ල් ෆෙන්ඩ්' චිත්‍රපටය වෙනුවෙන් චරිත නිරූපණය කරන්නට ලැබීම තමාට අමතක නොවන සිදුවීම් පෙළක් බවය. මීට පෙර චිත්‍රපට කිහිපයක සඳහා ශ්‍රද්ධා ගීත ගායනයෙන්ද සහාය වී ඇත. මෙම චිත්‍රපටයේ ශ්‍රද්ධාගේ සිනමා පෙම්වතා ලෙස අර්ජූන් කපූර් පෙනී සිටින අතර, ඔහු හා ශ්‍රද්ධා බොලිවුඩ් චිත්‍රපටයකින් සිය ප්‍රේක්ෂකයන් හමුවන පළමු වතාවද මෙයවීම විශේෂත්වයකි.