තමන්ගේ ආරක්ෂක වියදම් සඳහා ඇමරිකාවෙන් උදව් ඉල්ලා සිටීමට කිසිදු සැලැස්මක් නැතැයි හැරී කුමරු සහ මේගන් කුමරිය පවසති.

හැරී මේඝන් යුවලගේ ආරක්ෂාව සඳහා ඇමරිකාව මුදල් නොගෙවන බවට ජනාධිපති ඩොනල්ඩ් ට්‍රම්ප් නිකුත් කළ ට්ටිටර් පණිවුඩයකට ප්‍රතිචාර ලෙස ඔවුන් එම ප්‍රකාශය කර තිබේ.

හැරී කුමරු සහ මේඝන් කුමරිය නිකුත් කළ පණිවුඩයේ මෙසේ දැක්වේ,

" තම ආරක්ෂක වියදම් සඳහා ඇමරිකාවෙන් මුදල් ඉල්ලා සිටීමට සසෙක්ස් හි ආදිපාදවරයා සහ ආදිපාදවරියට කිසිදු සැලසුමක් නැත. පුද්ගලික වියදමින් ආරක්ෂක විධිවිධාන සලසා ඇත."

“ඔවුන් දැන්  කැනඩාව අතහැරලා එක්සත් ජනපදයට ඇවිත්. ඒ වුණත් ඔවුන්ගේ ආරක්ෂාව වෙනුවෙන් තවදුරටත් එක්සත් ජනපදය වියදම් කරන්නේ නෑ. ඒකට ඔවුන් වියදම් කරපුවාවේ“ යයි ඇමරිකානු ජනාධිපතිවරයා පසුගියදා ට්විටර් පණිවුඩයක් නිකුත් කර තිබිණ.

පසුගිය ජනවාරි මාසයේදී හැරී මේඝන් යුවල තම රාජකීය රාජකාරි වලින් ඉවත් වන බව පැවසූහ.  පසුව කැනඩාවේ වැන්කුවර් දූපතේ මාස කිහිපයක් ගතකළ ඔවුන් මෑතකදී ඇමරිකාවේ ලොස් ඇන්ජලීස් වෙත පදිංචියට ගිය බව වාර්තා විය.

රාජකීය යුවළ ලොස් ඇන්ජලිස් දක්වා පුද්ගලික ගුවන් යානයකින් පියාසර කළ බව එංගලන්තයේ ‘සන්‘ පුවත්පත වාර්තා කළ නමුත් ඒ කවදාද යන්න හෙළිකර නොතිබිණ. මේ වන විට පැතිර යමින් පවතින කොරොනා වසංගතය හේතුවෙන් අත්‍යවශ්‍ය ගමන් හැර අනෙක් ගමන් බිමන් සඳහා ඇමරිකාව සහ කැනඩාව අතර දේශසීමා වසා දමා තිබේ.

(රොයිටර් පුවත් ඇසුරිණි - 085)