(අමදෝරු අමරජීව)
 
‘හමුදාව උතුරු පළාතෙන් මුළුමනින්ම ඉවත්කළ යුතු යැයි මම කියන්නේ නැහැ. ඒකීය රටක් තුළ ජනතාවගේ ආරක්ෂාව සදහා ආරක්ෂක හමුදාවත් සිටිය යුතුයි‘ යැයි දෙමළ ඊලාම්  විමුක්ති සංවිධානය හෙවත් ටෙලෝ පක්ෂයේ  සභාපති  හිටපු පාර්ලිමේන්තු මන්ත්‍රි එම්. කේ. සිවාජි ලිංගම් මහතා පැවසීය.

වෙල්ලමුල්ලි වයික්කාල් අවසන් සටනේදි මියගිය අය සිහිකරණ “ ජනසංහාර මාසයේ “ පැවැත්වීමට තිබූ පාගමන රටේ වත්මන් තත්වය තුළ එය අත්හිටුවිමට ගත් තිරණය දැනුම් දෙමින් පැවති මාධ්‍ය සාකච්ඡාවකදි හිටපු පාර්ලිමේන්තු මන්ත්‍රි එම්.කේ.සිවාජිලිංගම් මහතා එසේ කීය.

මෙම හමුව ත්‍රිකුණාමලය තානායමේදි ටෙලෝ පක්ෂයේ  පරිපාලන ලේකම් කේ.නිත්‍යානන්දන් මහතාගේ සහභාගීත්වයෙන් පැවැත්වුණි.

මෙහිදි තවදුරටත් අදහස් දැක්වු ටෙලෝ සභාපති  එම්.කේ.සිවාජිලිංගම්  මහතා, 

‘උතුරේ  වැඩි ප්‍රදේශයක  හා  උතුරු නැගෙනහිර හමුදා  භාරයේ තිබිම වැරදියි කියන ස්ථාවරයේ කිසිදු වෙනසක් නැහැ. ඒ වගේම මේ තත්වය තුළ සාමාන්‍ය ජනතාවට හමුදාවේ ආරක්ෂාව සැලසිය යුතුයි.  ඒ නිසා හමුදාව තර්ජනයට ලක් වි ඇති තැන්වලට ආරක්ෂාව සැළසිය යුතුයි.

ඉස්ලාමීය ත්‍රස්ථවාදය එල්ල කළ  මරාගෙන මැරෙන  ප්‍රහාර මාලාව හේතුවෙන් පවතින ආරක්ෂක තත්වය සලකා අවසන් සටනේ  මියගිය  අය සිහිකරලා වෙරුගල් සිට ත්‍රිකුණාමලය හරහා  වෙල්ලමුල්ලි වයික්කාල්  දක්වා යෑමට සුදානම්කර තිබූ  පාගමන අත් හිටෙව්වා. ඒ වෙනුවට  ලබන සතියේ නම් කළ දිනවල  ඒ ඒ දිස්ත්‍රික්ක තුළ පහන් දැල්වීම සිදුකරනවා‘  යැයි කීය.