(ඩයනා උදයංගනී)    

                              
වී අලෙවි මණ්ඩලයට 2009 සිට 2014 දක්වා වසර 05ක කාලයේ දී රුපියල් මිලියන 7,152.95 ක අලාභයක් සිදු වී ඇතැයි එහි සභාපති උපාලි මොහොට්ටි මහතා පැවසීය.


පසුගිය රජය දුන් තීන්දු ක‍්‍රියාත්මක කිරීමෙන් මෙම පාඩුව ඇති වූ බව ඔහු ප‍්‍රකාශ කළේය.


එම කාලය තුළ සෝමාලියාවට නොමිලේ සහල් සැපයීම, කිලෝවක් රුපියල් 42 බැගින් මිලදී ගත් වී මෙටි‍්‍රක් ටොන් විශාල ප‍්‍රමාණයක් සත්ව ආහාර වශයෙන් පෞද්ගලික අංශයට කිලෝවක් රුපියල් 24 බැගින් අලෙවි කිරීම වැනි තීන්දු තීරණ රැසක් හේතුවෙන් මෙම පාඩුව සිදු වු බව සභාපතිවරයා සඳහන් කළේය.


සභාපතිවරයා මේ බව පැවසුවේ වී අලෙවි මණ්ඩලයේ ඉදිරි කටයුතු පිළිබඳව කෘෂිකර්ම අමාත්‍ය මහින්ද අමරවීර මහතා සමඟ පැවති ප‍්‍රගති සමාලෝචන සාකච්ඡාවක දීය.


වී අලෙවි මණ්ඩලය රජයේ ආයතනයක් වශයෙන් පසුගිය කාලය පුරා පාඩු පිට පවත්වාගෙන ගිය ආයතනයක් බව ද මෙහිදී අනාවරණය විය.


වී අලෙවි මණ්ඩලය ලාභ ලබන ආයතනයක් බවට පත් කිරීම සඳහා වත්මන් රජය යටතේ වැඩපිළිවෙළ රැසක් ආරම්භ කර ඇති බව පැවසූ සභාපතිවරයා මණ්ඩලය විසින් පී.එම්.බී රයිස් නමින් සහන මිලට සහල් අලෙවි කිරීමේ වැඩපිලිවෙලක් ඉදිරි මාස 2 තුළ  ක‍්‍රියාත්මක කරන බව ද ප‍්‍රකාශ කළේය.


එමෙන්ම 2018 යල කන්නයේ දී වී මෙටි‍්‍රක් ටොන් 20,000ක් මිල දී ගැනීම සඳහා රට පුරා වී මිලදී ගැනීමේ මධ්‍යස්ථාන 225ක් ඇරඹීමට මේ වන විටත් අවශ්‍ය පියවර ගෙන ඇතැයි ද ඔහු සඳහන් කළේය.