(නිමල කොඩිතුවක්කු)

කඩා වැටෙන අර්ථිකය,බාල්දු වෙන රුපියල රැක ගැනීමට වත්මන් රජයට වැඩ පිළිවෙළක් නොමැති බවත් මේ රජය පිලිබඳ ව්‍යවසායකයන්,ආයෝජකයන් සහ ව්‍යාපාරිකයන් තැබූ විශ්වාසය කඩා වැටී ඇති බවත්  පාර්ලිමේන්තු මන්ත‍්‍රී එස්.බී දිසානායක මහතා කොළඹදී අද (04) පැවසීය.

රටේ ආර්ථිකය බාරගත් රනිල් වික‍්‍රමසිංහ මහතා යලිත් වරක් අසාර්ථක බවට ඔහු විසින්ම තහවුරු කර ඇති බවද දිසානායක මහතා කියා සිටියේය.

ආණ්ඩුවෙන් ඉවත් වූ 16 යේ කණ්ඩායම නිදහස් මාධ්‍ය කේන්ද්‍රයේ පැවත්වූ  මාධ්‍ය හමුවකට එක්වෙමින් මන්ත‍්‍රීවරයා මේ බව පැවසීය.

එහිදී වැඩිදුරටත් අදහස් දැක්වූ පාර්ලිමේන්තු මන්ත‍්‍රී එස් බී දිසානායක මහතා මෙසේද කීය.

      ‘‘රුපියල ලෝක මුදල්  අතර අවලංගු වන කාසියක් තරමට පහළ වැටෙමින් තිබෙනවා.  ලෝකයේ ණය ශ්‍රේණිගත කිරීමේ ලේඛනයේ අපි අද පතුලටම වැටිලා තියෙන අවස්ථාවක තමයි මෙවර අයවැය ලේඛනය ඉදිරිපත් කරන්න සූදානම් වෙන්නේ.

රුපියල් බිලියන 644ක අයවැය හිඟයත්, රුපියලේ  අව ප‍්‍රමාණයත් සමඟ ඉතිහාසයේ වැඩිපුරම මුදලක්  වැය කරන අයවැයක් විදියට මේ අයවැය ඉතිහාස ගත වෙනවා.

අපේ රටට ජී.එස්.පී බදු සහනය හිමිවුනා මත්ස්‍ය තහනම ඉවත් කෙරුණා. මේ එකකින්වත් ප‍්‍රයෝජනයක් ගන්න මලික් සමරවික‍්‍රම මහතාටත්, අගමැතිවරයාටත් මුදල් ඇමතිවරයාටත් නොහැකි වුනා.

අද වනවිට තේ, පොල්, රබර් කඩා වැටිලා තියෙනවා. ආර්ථිකය ගොඩගන්න බැරි තත්වයට අද පත්වෙලා තියෙනවා.  රතුපස්වල ෆැක්ටි‍්‍රයට විරෝධය පළ කළා. අද ඒ කර්මාන්ත ශාලාව තායිලන්තයට අරගෙන ගියා. ඒක මෙහේ නවත්වගන්න කිසිම වැඩපිළිවෙළක් තිබුනේ නැහැ.

ජය අපවිත‍්‍ර වුණා කියන කාරනාව බොරුවක්. වැරදි මතයක් නිසා ඒ ප‍්‍රදේශවල ජනතාව එලියට බැස්සා. මේ නිසා අපේ රබර් අද 300 ටවත් විකුණ ගන්න බැරුව තියෙනවා.

මේ රජයේම  එක්සත් ජාතික පක්ෂයේ ඇමතිවරයෙක්  වියට්නාමයෙන් ගම්මිරිස් ගෙනල්ලා  අපේ ලාංඡනය ගහලා  1200ට ඉහළින් තිබුණ ගම්මිරිමස් මිල අද 400 දක්වා පහත දාලා තියෙනවා.

අද මේ රටේ අනාරක්ෂිත තත්වයක් නිර්මාණය වෙමින් තිබෙනවා. ජනාධිපති ඇතුළු  ප‍්‍රභූන් ඝාතන කුමන්ත‍්‍රන ආදි බරපතල තත්වයක්  තියෙනවා. මෙම තත්වයන් ඉතාම නරක විදිඑට අපේ සංචාරක ව්‍යාපාරයට බලපානවා.

එක්සත් ජාතික පක්ෂය සහ ආර්ථිකය භාර අරන් ඉන්න රනිල් වික‍්‍රමසිංහ මහතාට  අද සැලැස්මක් නැහැ. එතුමන්ගේ ආර්ථික  කළමනාකරණ  කමිටුව ජනාධිපතිවරයා විසින් අහෝසි කළා. ඒත් අදටත් මලික් සමරවික‍්‍රම ඇමතිතුමාත්, අගමැතිතුමාත්, මුදල් ඇමතිතුමත්  මේ රටේ ආර්ථිකය මෙහෙයවනවා.

පසුගියදා රැස්වූ  කැබිනට්  මණ්ඩලයේදී තෙල්  වලට වගේම විදුලියට මිල සූත‍්‍රයක් ගෙන ඒමේ යෝජනාවක් එන්න නියමිතව තිබුණා. ඒක  කැබිනට් ලේකම් වරයාට භාරදිලා තියෙනවා. ජනාදිපතිවරයා ඒක ගේන්න ඉඩ දෙන එකක් නැහැ කියලා අපි හිතනවා.

කඩා වැටෙන  ආර්ථිකය, බාල්දු වෙන  රුපියල රැක ගන්න, අපනයන ආදායම වැඩි කරගන්න මේ රජයට අදටත් වැඩපිලිවලක් නැහැ.  එවැනි සැලැස්මක් හදන එක මේ රජයට ලේසි වෙන එකකකුත් නැහැ. මේ රජය පිලිබඳ ව්‍යවසායකයන්, ආයෝජකයන්, ව්‍යාපාරිකයන් තියපු විශ්වාසය කඩා වැටිලා තියෙනවා.

ශ්‍රී ලංකා නිදහස් පක්ෂයේ විපක්ෂයේ කණ්ඩායම විදියට අපි උත්සාහ කළේ අගමැති රනිල් වික‍්‍රමසිංහ මහතා නැති ආණ්ඩුවක් හදන්නයි. එක්සත් ජාතික පක්ෂයේ අද පාර්ලිමේන්තුවේ  ඉන්න මන්ත‍්‍රීවරුන් බහුතරයකුත් මේ ගැන ඉල්ලිම් කළා. ඉන් පසුව තමයි  එතුමා රනිල් වික‍්‍රමසිංහ මහතාගෙන්  මෙම ඉල්ලීම කළේ. වරක් දෙවරක් නෙමෙයි අපි දන්න විදියට අට වරක් ජනාධිපතිවරයා මෙම ඉල්ලීම කළා.

මොකද එතුමන් අයින් වෙලා වෙන අගමැතිවරයෙකු පැමිණිමෙන්ම කොටස් වෙළඳපොල ශක්තිමත් වෙමින් ආයෝජකයන්ගේ විශ්වාසය  වැඩිවෙලා රටේ ආර්ථිකයේ තීරණාත්මක වෙනසක් සිදුවිය හැකියි.

එතුමා 1993 වසරේ  පළමු වරට අගමැති වුනා. අවුරුදු 17ක් පැවති එක්සත් ජාතික පක්ෂ රජය එතුමා අගමැතිවෙලා වසරකින් පක්ෂය පරාජයට පත්වෙනවා.

2001 දිත්  එතුමන්ට කරගන්න බැරි වුනා. ඒ අවුරුදු දෙකහාමාර තුළ කිසිදු පුද්ගලයෙක් රාජ්‍ය සේවය සඳහා බඳවා ගත්තේ නැහැ. එතුමා 2015 ඉදන් අගමැති ධූරයේ කටයුතු කළා. සියලුම වගකිවයුතු අමාත්‍යාංශ එක්සත් ජාතික පක්ෂය ගත්තා. එහෙම අරගෙනත් ඔවුන්ට 113 දිනාගන්වත් බැරිවුනා.

රනිල් වික‍්‍රමසිංහ මහතා බලයට එන හැම අවස්ථාවකදීම  ආර්ථිකය ගොඩ නගන බවට ලොකු කතා කියලා ආවත් ඒ හැම අවස්ථාවකදීම ඔහු අසාර්ථක වුනා. ඒක දැන් ආපහු ඉතාම හොඳින් පැහැදිලි වෙලා තියෙනවා.

අද ව්‍යාපාරිකයන්ට රට ගැන රටේ පාලනය ගැන කිසිම විශ්වාසයක් නැහැ. පිටරට සල්ලි හම්බකරන අය සතයක් ලංකාවට ගේන්නේ නැහැ.ඒවත් මේ ආර්ථික අර්බුදයට බලපාලා තියෙනවා’’ යැයිද ඔහු එහිදී කියා සිටියේය.

ඡායාරූප - ගයාන් අමරසේකර