විනීතා එම් ගමගේ
 
මුතුරාජවෙල තෙල් ගබඩා සංකීර්ණයට  තෙල් ගෙන යන නලයක් පුපුරා යාමෙන් සිදු වු තෙල් කාන්දුව පිළිබඳව ඛණිජ තෙල් තොග ගබඩා සංකීර්ණයෙන් වන්දි ඉල්ලා නඩු  පැවරීමට සමුද්‍රිය දුෂණ වැළක්වීමේ අධිකාරිය පියවර ගෙන ඇත. 

එසේ නඩු පැවරීම සඳහා අද (10) වෙරළ තීරයේ සාක්ෂිකරුවන්ගෙන් සාක්ෂි සටහන්  කර ගත් බවත් අද මුහුදේ තෙල් කාන්දුව සිදුවූ නැවෙන් හා වෙනත් දුටු සාක්ෂි ලබා ගැනීමට  නියමිත බවත් සමුද්‍රීය දුෂණ වැළැක්වීමේ අධිකාරියේ සාමාන්‍යධිකාරි ආචාර්ය ටර්නි ප‍්‍රදීප් කුමාර මහතා  පැවසීය. 

දික් ඕවිට සිට උස්වැටකෙයියාව වෙරළ තීරයේ විසිරී ඇති තෙල් ඉවත් කිරීමේ පාරිසරික මෙහෙයුම සමුද්‍රීය දුෂණ වැළැක්වීමේ අධිකාරියේ විශේෂඥ උපදෙස් මත මේ වනවිටත් ආරම්භ කර ඇති අතර ඒ සඳහා ශ්‍රී ලංකා නාවික හමුදාව සහ වෙරළාරක්ෂක දෙපාර්තමේන්තුව ආරම්භ කර තිබේ.

පෙරේදා රාත‍්‍රියේ දී  නෞකාවකින් කලූ තෙල් ගොඩ බාමින් සිටියදී මුතුරාජවෙල බෝයේ නලයක මෙම කාන්දුවීම හටගෙන  තිබු අතර කාන්දු වු තෙල් මුහුදට එක් වෙමින් පැවතිණි. 

ඈත මුහුදේ තිබු තෙල් වියෝජනය වීම සඳහා රසායනික ඉසීම පෙරේදා සිදුකළ බවත් මේ වනවිට වෙරළ තීරයට ගොඩ ගසන තෙල් තට්ටු හා වෙරළාසන්නයේ තෙල් තට්ටු ඉවත් කරමින් සිටින බවත් කී ප‍්‍රදීප් කුමාර මහතා මෙම තෙල් ඉතා ඝණකමින් වැඩි බවත් විෂ සහිත බැවින් සීරුවෙන් ඉවත් කළ යුතු බවත් ප‍්‍රකාශ කළේය. 

කෙසේ වෙතත් පරිසරයට හානිකර වන මෙම තෙල් තට්ටු ඉක්මනින් ඉවත් කර පරිසරයට වන හානිය වැළැක්වීමට කටයුතු කරන බව ද හෙතෙම තවදුරටත් දියා සිටියේය.