මුලදී අදාළ අංශ නිසි අවධානයක් යොමු නොකිරීම නිසා තෙල්දෙණියේ ගැටුම් ව්‍යවසනයක් දක්වා දුරදිග ගිය බව නිවේදනයක් නිකුත් කරමින් උසස් අධ්‍යාපන හා මහාමාර්ග අමාත්‍ය කබීර් හෂීම් මහතා නිවේදනයක් නිකුත් කරමින් සඳහන් කරයි.

රටේ ඇති වී තිබෙන වාතාවරණය සම්බන්ධයෙන් උසස් අධ්‍යාපන හා මහාමාර්ග අමාත්‍ය කබීර් හෂීම් මහතා නිකුත් කළ නිවේදනයක එම කරුණු සඳහන් වේ.

අමාත්‍ය කබීර් හෂීම් මහතා නිකුත් එම නිවේදනයේ මෙසේ ද සඳහන් වේ. 

මෑත දී අම්පාරේදී මෙන්ම පසුගියදා තෙල්දෙනියේ දී සිදු වු සිදු වීම් වලින් පෙනී යන්නේ  අවසනාවන්ත ලෙස ආගම්වාදී හා වර්ගවාදී ගැටුම් සහගත තත්වයක් මේ රට තුල ඇති  වෙමින් පවතින බවයි.

මෙහි අවසනාවන්ත තත්වය වන්නේ දීර්ඝ කාලයක් රට තුළ සාමයෙන් සමගියෙන් ජීවත් වු  පිරිසක් වන බෞද්ධ හා ඉස්ලාම් ආගමිකයන් අතර ගැටුම්කාරී තත්වයක් නිර්මාණය කිරීමට  පසුගිය කාලය පුරා යම් කිසි පිරිසක් කටයුතු කරන ලදි.

එම තත්වය උත්සන්න කිරීමක් පසු ගිය සිද්ධින් දෙස බැලීමේ දී පෙනී යයි. මෙයින්  බලාපොරොත්තු වන්නේ දීර්ඝ කාලයක සිට සමගියෙන් හා සහයෝගයෙන් ජීවත් වු ශ‍්‍රි  ලංකාවේ බෞද්ධ හා ඉස්ලාම් ජාතිකයන් අතර ගැටුමක් නිර්මාණය කර ඒ තුළින් අන්තවාදී  සහ අවස්ථාවාදී අරමුණු ඉටු කර ගැනීමයි.

විශේෂයෙන් මෙහි දී තෙල්දෙණියේ දී රථ වාහන අනතුරකින් පසුව ලොරි රථයේ රියදුරුට  මරණය සිදු කරණ තරමේ පහර දිීමක් සිදු කිරීම තරයේ හෙලා දකින අතර එහි පහර දීමට  සම්බන්ධ පිරිස් මුස්ලිම් ජාතිකයන් වුවද සමස්ථ මුස්ලිම් ප‍්‍රජාව මෙම සිද්ධිය පිටුපස නොසිටි  අතර මුස්ලිම් සමාජයේ කිසිවෙකු එය අනුමත කරන්නේ ද නැත.

එවන් තත්වයක් යටතේ දීර්ඝ කාලයක් තිස්සේ රටේම මෙන්ම තෙල්දෙනිය ප‍්‍රදේශයේ ද  සමගියෙන් ජීවත් වු බෞද්ධ සහ මුස්ලිම් ජනතාව අතර විරසකයත් ඇති වන පරිදි අහිංසක  මුස්ලිම් ජනතාවගේ ජීවිත, දේපල මෙන්ම ආගමික ස්ථාන විනාශ කිරීම දැඩි කානගාටුවට  කරුණක් වේ.

මක් නිසාද යත් මෙයින් මරණයට පත් රියදුරුට සාධාරණයක් හෝ පහර දීමට සම්බන්ධ  අයට රටේ පවතින නීතිය අනුව දඩුවම් ලබා දීම වෙනුවට මුස්ලිම් ප‍්‍රජාව ඉලක්කර ප‍්‍රහාර  එල්ල කිරීම අදාල සිද්ධියට සමබන්ධඅයට දඩුවම් කිරීමේ නීත්‍යාණුකුල ක‍්‍රමයට ඔබ්බෙන් ගිය වෙනත් අවස්ථාවාදී උවමනාවක් ඉෂ්ඨ කර ගැනීමකි.

එම නිසා මේ මෙහොතේ ගරු ජනාධිපතිතුමා, ගරු අගමැතිතුමා ප‍්‍රමුඛ ආණ්ඩුව මෙන්ම  විපක්ෂය නියෝජනය කරන අනෙකුත් දේශපාලන පක්ෂ නායකයන්ගෙනුත් මා ඉල්ලා  සිටින්නේ දිගින් දිගටම මෙවැනි ගැටුම් ඇති වීම තුළින් මුස්ලිම් ජනතාව පමණක් නොව  සමස්ථ රට යලි අදුරු යුගයකට ගෙන යාමේ යම් කුමන්ත‍්‍රණයක් මේ තුළ පැවතිය හැකිය.  එම තත්වයට ඉඩ නොදීම අප සැමගේ වගකීම බැවින් ඒ සඳහා මැදිහත් වන ලෙස ඔබ 
සැමගෙන් කාරුණිකව ඉල්ලා සිටිමි.

එබැවින් ආගමික නායකයින්, දේශපාලන පක්ෂ නායකයින්, සිවිල් ක‍්‍රියාකාරීන්, නීතිය  ක‍්‍රියාත්මක කරන ආයතන ඇතුළු සැමගේ ප‍්‍රමුඛ අවධානය මේ කෙරෙහි යොමු කර රට තුල  නීතිය හා සාමයත්, ජාතීන් අතර සහජීවනයත් ඇති කිරීමට මැදිහත් වනු ඇතැයි මම විශ්වාස 
කරමි.

එමෙන්ම මෙහි දී විශේෂයෙන් සිහිපත් කල යුත්තේ මෙවැනි ගැටුම් මූලික අවස්ථාවේදීම හදුනා ගෙන ඒවා වර්ධනය වීම වැලැක්වීමට නීතිය හා සාමය රකින ආයතන කටයුතු කල  යුතුය. එය නිසි ලෙස ක‍්‍රියාත්මක නොවීම මෙවැනි අවාසනාවන්ත තත්වයන් වර්ධනය වීමට  හා ව්‍යාප්ත වීමට බලපැමද දැඩි ලෙස අවධානයට යොමු කල යුතු කරුණකි.

තව ද මේ අවස්ථාවේ සියළුම ජනතාව අසත්‍ය ප‍්‍රචාර හා ප‍්‍රකෝප කිරීම් වලට හසු නොවී  සාමය හා සහජීවනය ආරක්ෂා කර ගැනීම සඳහා ඉවසීමෙන් කටයුතු කර අවශ්‍ය සහයෝගය  ලබා දෙන ලෙස වැඩි දුරටත් ඉල්ලා සිටිමි.