( තිළිණි ද සිල්වා සහ රංජන් කටුගම්පොළ )

මුතුරාජවෙළ අභය භූමියට කුණු බැහැර කිරීම හෝ කුමන ආකාරයක හෝ කසල එකතු කිරීමෙන් කොළඹ මහනගර සභාව ඇතුළු බලධාරීන් වළක්වාලමින් පනවා තිබූ අතුරු තහනම් නියෝගය ලබන මස 03 වැනිදා  තෙක් තවදුරටත් දීර්ඝ කිරීමට ශ්‍රේෂ්ඨාධිකරණය  අද (25)  තීන්දු කළේය.

මුතුරාජවෙළ අභය භූමියට කුණු බැහැර කිරීම , වැලි ගොඩ දැමීම , පස් කැණීම ,පිරවීම හෝ කුමන හෝ ආකාරයේ කසල රැස්කිරීම සිදු කිරීමෙන් කොළඹ මහනගර සභාව හා එහි නාගරික කොමසාරිස් ඇතුළු බලධාරීන් පිරිසක් වළක්වාලන අතුරු තහනම් නියෝගයක් නිකුත් කරන්නැයි ඉල්ලා ගොනු කර ඇති මූලික අයිතිවාසිකම් පෙත්සම අද  කැඳවූ අවස්ථාවේදී  ශ්‍රේෂ්ඨාධිකරණය මෙම නියෝගය යළිත් දීර්ඝ කළේය.

එම අභය භූමියට කුණු බැහැර කිරීම වළකාලමින් අද තෙක් ලබා දී තිබූ නියෝගය මෙලෙස අධිකරණය විසින් දීර්ඝ කරන ලදී.

මුතුරාජවෙල අභය භූමියට කසල බැහැර කිරීමට එරෙහිව වත්තල ප‍්‍රදේශවාසීන් කිහිපදෙනෙකු ගොනු කළ මූලික අයිතිවාසිකම් පෙත්සම අගවිනිසුරු ප‍්‍රියසාත් ඩෙප් ,අනිල් ගුණරත්න සහ නලින් පෙරේරා යන මහත්වරුන් ගෙන යුතු ත‍්‍රිපුද්ගල විනිසුරු මඩුල්ලක් හමුවේ කැඳවිණි.

කොළඹ නගරසභාව මඟින් මුතුරාජවෙල අභය භූමියට කසල බැහැර කිරීම නිසා එම ප‍්‍රදේශයේ ජීවත්වන 25,000කට අධික පිරිසක් පීඩාවට පත් ඇති බවත්  එලෙස කසල බැහැර කිරීමෙන් සිය මූලික අයිතීන් කඩවී ඇති බවත් එම පෙත්සමේ සඳහන් වෙයි.

බෝපිටිය ශ්‍රී බෝධි විහාරයේ ධම්මකුසල හිමියන් ,බෝපිටිය ශාන්ත නිකලස් දේවස්ථානයේ ආනන්ද විතාරණ පියතුමා ඇතුළු වත්තල මුතුරාජවෙල රක්ෂිතය ආසන්නයේ පදිංචිකරුවන් 35 දෙනකු විසින් මෙම පෙත්සම ගොනු කරනු ලැබ තිබේ.

පෙත්සම පිළිබඳ වැඩිදුර කරුණු සලකා බැලීම ලබන 03 වැනිදා සිදු කිරීමටද තීන්දු කරන ලදී.