( දිලීප් ජයසේකර )

වයස අවුරුදු 10ක් වු පිරිමි දරුවකු බරපතල ලෙස ලිංගික අපයෝජනය කළැයි 39 හැවිරිදි පුද්ගලයකුට බර වැඩ සහිත වසර 14ක සිර දඩුවම් නියම කරන ලෙස හම්බන්තොට මහාධිකරණ විනිසුරු අජිත් එම්ගමාසිංහ මහතා අද (20)  නියෝග කළේය.

2014 වසරේ පෙබරවාරි 01 වැනි දා සැකකරු  ලුණුගම්වෙහෙර වැවේ දිය නෑමට ගිය කුඩා දරුවකුට මෙලෙස ලිංගික අතවර කර තිබේ.

නඩු විභාගයේදී සැකකරුට එරෙහිව ඉදිරිපත් වි තිබු චෝදනා දෙකකට වැරදිකරු බවට පත් වූ අතර පළමු චෝදනාවට වසර 07ක බරවැඩ සහිත සිර දඩුවම් හා දෙවන චෝදනාවට තවත් වසර 07ක බරවැඩ සහිත සිර දඩුවම් නියම කෙරිණි.

මීට අමතරව රුපියල් 5000ක දඩ මුදලක්ද වින්දිත පිරිමි දරුවාට රුපියල් 50 000ක වන්දි මුදලක් ගෙවන ලෙසද මහාධිකරණ විනිසුරු වරයා නියෝග කළේය.

දඩ මුදල නොගෙවන්නේ නම් ලිහිල් වැඩ සහිත මාස 06 ක සිර දඩුවමක් හා වන්දි මුදල නොගෙවන්නේ නම් තවත් මාස 12ක ලිහිල් වැඩ සහිත සිර දඩුවමක් ද නියම කෙරිණි.