(මනෝප‍්‍රිය ගුණසේකර)

හිටපු මන්ත‍්‍රී භාරත ලක්ෂ්මන් පේමචන්ද්‍ර මහතා ඇතුළු සිව්දෙනෙකු ඝාතනය කිරීමේ චෝදනාවට හිටපු පාර්ලිමේන්තු මන්ත‍්‍රී දුමින්ද සිල්වා ඇතුළු විත්තිකරුවන්ට මරණ දඬුවම නියම කරමින් මහාධිකරණය දුන් නඩු තීන්දුවට එරෙහිව ගොනු කළ අභියාචන පෙත්සම සම්බන්ධයෙන් තීන්දුව ප‍්‍රකාශයට පත් කිරීම පංච පුද්ගල ශ්‍රේෂ්ඨාධිකරණ විනිසුරු මඩුල්ල විසින් අද (25) කල් තබන ලදී.

මේ පෙත්සම සම්බන්ධයෙන් පැවැති දීර්ඝ නඩු විභාගය අවසානයේදී මේ සම්බන්ධයෙන් ඇති ලිඛිත දේශන ලබන මස 10 වැනිදා ගොනු කරන ලෙස පැමිණිලි පාර්ශවයට හා වගඋත්තරකාර පාර්ශවයට නියම කළ විනිසුරු මඩුල්ල තීන්දුව ප‍්‍රකාශයට පත් කිරීම කල් තබන ලදී.

අගවිනිසුරු ප‍්‍රියසාද් ඩෙප්,  බුවනෙක අළුවිහාරේ,  නලීන් පෙරේරා,  ප‍්‍රියන්ත ජයවර්ධන සහ විජිත් මලල්ගොඩ මහත්වරුන්ගෙන් සමන්විත පංච පුද්ගල ශ්‍රේෂ්ඨාධිකරණ විනිසුරු මඩුල්ල හමුවේ මෙම පෙත්සම විභාග කෙරිණි.

මහාධිකරණ නඩු තීන්දුවට එරෙහිව ගොනු කළ අභියාචන පෙත්සම විභාග කල අවස්ථාවේදී හිටපු පාර්ලිමේන්තු මන්ත‍්‍රී දුමින්ද සිල්වා මහතා ඇතු`ථ විත්තිකරුවන් වෙනුවෙන් පෙනී සිටි ජනාධිපති නීතීඥවරුන් වන සාලිය පිරීස්, අනුජ පේ‍්‍රමරත්න, අනිල් සිල්වා මහත්වරුන් පැවැත්වු දීර්ඝ වශ්‍යයෙන් දේශණය පැවැත්වුහ.

මෙම අභියාචන පෙත්සමේ වගඋත්තරකරුවන් වෙනුවෙන් නීතීපතිවරයා නියෝජනය කරමින් පෙනී සිටි නියෝජ්‍ය සොලිසිටර් ජනරාල් තුසිත් මුදලිගේ මහතා ත‍්‍රී පුද්ගල මහාධිකරණ විනිසුරු මඩුල්ලේ තීන්දුව නිවැරදි බවට කරුණු ඉදිරිපත් කළේය.

මේ සම්බන්ධයෙන් දින ගණනාවක් පුරා පැවැති දීර්ඝ කරුණු දැක්වීම් අවසානයේදී මෙහි තීන්දුව ප‍්‍රකාශයට පත් කිරීමට නියම  කළ ශ්‍රේෂ්ඨාධිකරණය ලිඛිත දේශන ඉදිරිපත් කරන ලෙස දෙපාර්ශවයටම නියම කළේය.