මැතිවරණ ප්‍රතිඵල අද (26) උදෑසන වනවිට නිකුත් කර අවසන් කිරීමට නියමිතව තිබුණත් තාක්ෂණික දෝෂයක් නිසා ප්‍රතිඵල නිකුත් කිරීම ප්‍රමාද වී තිබේ.

ප්‍රතිඵල තවමත් ගණනය කරමින් තිබෙන අතර ප්‍රකාශයට පත් කර තිබෙන ප්‍රතිඵල අනුව වැඩි වාසි අත්පත් කරගැනීමට හිටපු ක්‍රිකට් ක්‍රීඩක ඉම්රාන් ඛාන් සමත්ව තිබේ.

මැතිවරණ ප්‍රතිඵල වෙනස් කිරීම, ප්‍රචණ්ඩ ක්‍රියා, තලේබාන් සහ අයි.එස් ප්‍රහාර එල්ල වීමේ අවදානම මධ්‍යයේ පාකිස්තාන මහ මැතිවරණය ආරම්භ වූ අතර ඡන්දය ප්‍රකාශ කිරීම අවසන් වී පැයි 20කට වැඩි කාලයක් ගත වී තිබේ. 

කෙසේ නමුත් ඡන්දය ගණන් කිරීමේදී අක්‍රමිකතාවක් සිදුව ඇතැයි නවාස් ෂරීෆ් ප්‍රමුඛ පී.එම්.එල්-එන් පක්ෂය චෝදනා කරයි. දූෂණ චෝදනාවලට වරදකරු වී සිටින හිටපු අගමැති නවාස් ෂරීෆ්ගේ දේශපාලන පක්ෂය වන්නේ ද පී.එම්.එල්- එන් පක්ෂයයි. 

මේ වනවිට අඩකට වඩා ඡන්ද ගණනය කර ඇතැයි වාර්තා වන අතර එම ප්‍රතිඵල අනුව විශිෂ්ට ජයක් ලැබීමට පාකිස්තාන් තරීක් ඊ ඉන්සාෆ් (පී.ටි.අයි) එසේත් නැතිනම් සාධාරණත්වය සඳහා වූ පාකිස්තාන ව්‍යාපාරයේ ඉම්රාන් ඛාන් සමත්ව ඇතැයි වාර්තා වේ. 

ආණ්ඩුවක් පිහිටුවීම සඳහා ආසන 137ක බහුතර බලය දිනාගත යුතු වේ. දැනට ප්‍රකාශයට පත් කර තිබෙන ඡන්දවලින් ආසන 119 ක බලය තහවුරු කරගැනීමට ඉම්රාන් ප්‍රමුඛ පී.ටි.අයි පක්ෂය සමත්ව තිබේ. හිටපු අගමැති නවාස් ෂරීෆ් පක්ෂයට බලය තහවුරු කරගැනීමට හැකියාව ලැබී ඇත්තේ ආසන 61ක පමණි. 

පාකිස්තාන පාර්ලිමේන්තුවේ ආසන 446කින් සමන්විතය. ඉන් 104 දෙනෙකු සෙනට් සභිකයන් වන අතර ආසන 60ක් කාන්තාවන් සඳහාත් ආසන 10ක් සුළු ජාතික කොටස් සඳහාත් වෙන් කරනු ලැබ තිබේ. මහ මැතිවරණය පැවැත්වුණේ ආසන 272ක් සඳහාය. 

පාකිස්තානයේ සමස්ත ජනගහනය මිලියන 207ක් වන අතර ඉන් මිලියන 106ක් ඡන්දය ප්‍රකාශ කිරීම සඳහා සුදුසුකම් ලබා තිබූහ. ජනගහනය අතින් පාකිස්තානය යනු ලොව හයවැනි විශාලතම රට වන අතර දකුණු ආසියානු කලාපයේ භු දේශපාලනයේදී ඉතා වැදගත් භූමිකාවක් රඟ දක්වයි.

මෙවර බල හුවමාරුව සාමකාමී අයුරින් සිදුව වුවහොත් වසර 70ක පාකිස්තාන ඉතිහාසයේ එක් ආණ්ඩුවකින් තවත් ආණ්ඩුවකට සිවිල් බලය හුවමාරුවක් සිදුවන දෙවැනි අවස්ථාව මෙය වනු ඇත. 

ඒ.එෆ්.පී/රොයිටර්

055