(නිමල කොඩිතුවක්කු)

ඉදිරි යල කන්නය සඳහා ගොවින්ගෙන් කඩිනමින් වී මිළදි ගන්නා ලෙසට වී අලෙවි මණ්ඩලයට උපදස් ලබා දී ඇති බව කෘෂිකර්ම අමාත්‍ය මහින්ද අමරවීර මහතා අද (26) කොළඹදී පැවසීය.

ඒ අනුව මෙවර යල කන්නය සඳහා වී මෙටි‍්‍රක් ටොන් එක් ලක්ෂ විසිදහසක ප‍්‍රමාණයක් මිළදී ගැනීමට තීරණය වී ඇති බවත් ඒ සඳහා අවශ්‍ය මුදල් ප‍්‍රතිපාදන මේ වනවිට වෙන් කර ඇති බවත් අමාත්‍යවරයා සඳහන් කළේය.

නාඩු සඳහා රුපියල් 38ක් සහ සම්බා සඳහා රුපියල් 41ක ස්ථාවර මිළක් යටතේ මෙවර වී මිළදි ගන්නා බවත් රාජගිරිය පිහිටි කෘෂිකර්ම අමාත්‍යාංශ ශ‍්‍රවණාගාරයේ පැවති මාධ්‍ය හමුවකදී ඒ  මහතා පැවසීය.

එහිදී වැඩිදුරටත් අදහස් දැක්වූ කෘෂිකර්ම අමාත්‍ය මහින්ද අමරවීර මහතා මෙසේද කීවේය.

  ‘‘අපිට ලැබිලා තිබෙන වාර්ථා අනුව මෙවර අස්වැන්නේ වැඩිවිමක් වෙලා තියෙනවා. එවන් අවස්ථාවක ගොවින්  අධෛර්යමත්  නොවන ආකාරයට වී මිළදි ගැනීමේ වැඩපිළිවල ක‍්‍රියාත්මක කරන්න අපි  බලාපොරොත්තු වෙනවා.

ඒ අනුව  ගොවින්ට පහසු ලෙස වී ලබා දිය හැකි ක‍්‍රමවේදයක් අපි වී අලෙවි මණ්ඩලය මගින් ආරම්භ කරලා තියෙනවා. මෙයට පෙර  වී අලෙවි මණ්ඩලයට වී  අලෙවි කිරීමේදි  කෘෂිකර්ම  පර්යේෂණ නිලධාරීන්ගේ ලිපයක් අවශ්‍ය වුණා.

මෙවර එය අවශ්‍ය වෙන්නේ නැහැ. පොහොර ලබා දුන් ලේඛන අනුව එම කටයුතු ගැටලූවකින් තොරව සිදුකරන්න අපි බලාපොරොත්තු වෙනවා.

වී රැගෙන ඒම පහසු කිරීම සඳහා අපි විශේෂ  මල්ලක් හඳුන්වා දි තිබෙනවා.  වී අලෙවි මණ්ඩලය මගින් මිළදි ගන්නා වී සහල් බවට පරිවර්ථනය  කරලා එම සහල්  පී. එම්. බි  සහල් නමින් වෙළඳ පොළට  නිකුත් කරන්නත්  අපි බලාපොරොත්තු වෙනවා.

සතොස ආයතනය , සමූපකාර අයායතන, රාජ්‍ය සහ පෞද්ගලික අංශය මගින් එම කටයුතු සිදු කිරීමට අපි බළාපොරොත්තු වෙනවා. ඒ වෙනුවෙන් නියෝජිතයන් බඳවා ගැනීමේ කටයුතු අපි මේ වනවිට ආරම්භ කරලා තියෙනවා.  මේ යටතේ ඉතා හොද තත්ත්වයේ සහල් සාධාරණ මිළකට ලබාදෙන්න අපි බලාපොරොත්තු වෙනවා.

මේ වැඩපිළිවෙල සාර්ථක වුනහම අපිට විදේශ වලින් සහල් ගෙන්වන්න අවශ්‍ය වෙන එකක් නැහැ.  කෘෂිකර්මාන්තය අතින් අපේ රට දියුණු කරන්න විදිමත් වැඩපිළිවෙලක් අපි ඉදිරිපත් කරලා තියෙනවා යනුවෙන්ද අමාත්‍ය මහින්ද අමරවිර මහතා එහිදි පැවසීය.‘‘