(*** නිමල කොඩිතුවක්කු)

අපේ ජන බල පක්ෂයට ජාතිය වෙනුවෙන් ලැබුණු මන්ත්‍රී ධුරය කොල්ලකෑමට නොදී සියලු දෙනා එක්ව රැක ගත යුතු බව බොදුබල සේනා සංවිධානයේ මහලේකම් ගලගොඩඅත්තේ ඥානසාර හිමියෝ කොළඹ දී ඊයේ (11) පැවසූහ.

මෙම මන්ත්‍රී ධුරය යොදාගෙන ජාතියට මගහැරුණු ජාතික අභිලාෂය ඉටු කිරීමට තමන්වහන්සේ  කැපවන බවද උන්වහන්සේ සඳහන් කළහ.

මේ ප්‍රශ්නයේදී කාටවත් ගේම් ගහන්න ඉඩ නොදී කඩිනමින් ගැටලුව විසඳා ගන්නා බවද රාජගිරියේ සද්ධර්මරාජිකා විහාරස්ථානයේදී ඊයේ පැවති මාධ්‍ය හමුවකදී ඥානසාර හිමියෝ පැවසූහ.

ඥානසාර හිමියෝ මෙසේද පැවසූහ.

“2020 මහ මැතිවරණයට ඉදිරිපත් වෙන්න අපිටම පක්ෂයක් තිබුණෙ නැහැ. පක්ෂයක් ලියාපදිංචි කර ගැනීමට අපි විශාල උත්සාහයක් දැරුවත් එම උත්සාහය අසාර්ථක වුණා. මහ මැතිවරණය වෙනුවෙන් දේශපාලන පක්ෂ ගණනාවක් එක්ක  අපි සාකච්ඡා කරද්දී  දේශපාලන පක්ෂයක් ලැබූ බවත් එම පක්ෂයත් එක්ක දේශපාලන ව්‍යාපාරයක් ගොඩනගමු කියා රතන හිමියන්ගෙන් ආරාධනාවක් ලැබුණා.

මේ පක්ෂය කාගේද, තනතුරුවලින් ඉන්නේ කවුද, ව්‍යවස්ථාව පිළිබඳ අපි එහිදී විමසා සිටියා. කිසිදු ගැටලු‍වක් නැහැ මහමැතිවරණයට ඉදිරිපත් වෙන්නේ කියලා උන්වහන්සේ එහිදී පැවසුවා.

රතන හිමියන් කියන්නේ අවුරුදු පහළොවක් පාර්ලිමේන්තුව නියෝජනය කළ ජාතික අර්බුදවලට මැදිහත් වූ අත්දැකීම් සම්භාරයක් සහිත හිමිනමක්. මෙහිදී උන්වහන්සේගේ පරිණත නායකත්වයක් අපි බලාපොරොත්තු වුණා.

මහ මැතිවරණයේදීත් ඊට පෙරත් අපි රටේ රට ජාතිය, ආගම වෙනුවෙන් එළියේ විශාල සටනක් ගෙන ගියා. රටේ අණ පනත් සකස් කරගත් රටට වගකියන, පාර්ලිමේන්තුවේ  අපට නියෝජනයක් ලැබුණොත් අපේ සටනට විශාල ශක්තියක් ලැබෙනවා. අපි රට පුරා ගිහිල්ලා කෑගහලා කියපුවා වැදගත් විදියට සංවාදශීලීව සාකච්ඡා කරන්න මැති සබේ ඉඩක් ලැබුණොත් අපිට හැකියාවක් තියෙනවා.

මුලින්ම මම මැතිවරණයට කිසිම දිස්ත්‍රික්කයකින් තරග නොකර රට වටා ගොස් ජනතාව දැනුවත් කිරීමට තීරණය කළා. නමුත් බහුතර ජනතාවගේ අදහස වුණේ මම තරග කළ යුතුයි කියන මතයයි. ඒ අනුව මම කුරුණෑගලින් තරග කිරීමට තීරණය කළා. නමුත් කොළඹ, කුරුණෑගල, කළුතර දිස්ත්‍රික්කවල අපේ නාමයෝජනා ප්‍රතික්ෂේප වුණා.

අපිට ඡන්දය ලබා දීපු ජනතාවට අපි ස්තූතිවන්ත වන ගමන්ම මේ ප්‍රශ්නය අපි වහාම විසඳාගත යුතුයි. අපේ ප්‍රාර්ථනාව සිංහල ආණ්ඩුවක්. දැන් රටට ලස්සන ආණ්ඩුවක් ඇවිත් තිබෙනවා. ඒ නිසා මෙතැන කලබල වෙලා කුලල් කාගන්න අවශ්‍යතාවක් නැහැ.
අපි ගේම්කාරයෝ නෙවෙයි. අපි පපුව දෙන්නේ අවංකවමයි. ඒ නිසා තමයි ජනතාව අප විශ්වාස කරලා වැඩ කරන්නේ. සිවුරට තියෙන ගෞරවය අහිමි වෙන්න දෙන්න බැහැ. ඒ නිසා අපි ඇත්ත ප්‍රකාශ කළ යුතුයි.

මහ මැතිවරණයට පසුවදා අපට ජාතික ලැයිස්තු මන්ත්‍රී ධුරයක් ලැබුණු බව දැනගෙන මම රතන හිමියන්ට දුරකථනයෙන්  කතා කළා. පසුව උන් වහන්සේ  සිටින සදහම් සෙවණටත් ගිහින් මේ ගැන සාකච්ඡා කළා. මේ මන්ත්‍රී ධුරය උන්වහන්සේට ලබා ගත්තොත් හොඳයි කියන අදහසක තමයි උන් වහන්සේ හිටියේ.  මන්ත්‍රී ධුරය උන්වහන්සේ තියා ගන්නම්, අනෙකුත් වරප්‍රසාද උවමනා නම් ගන්න කියලත් කිව්වා. මන්ත්‍රී ධුරය නෙමෙයි වැදගත් ජනතා අභිලාෂයට වීම තමයි වැදගත් කියලා මම එතනදි කිව්වා.

මගේ නාම යෝජනා ප්‍රතික්ෂේප වුණහම මට ජාතික ලැයිස්තු මන්ත්‍රී ධුරය යෙදෙනවා කියලා තමයි අපේ මැතිවරණ ව්‍යාපාරය ගෙන ගියේ.
ඒ නිසා මේ අවස්ථාව මට ලබාදෙන්න කියලා මම රතන හිමියන්ගෙන් ඉල්ලා සිටියා.  ඒක තමයි මිනිස්සුන්ගේ අපේක්ෂාව. මම අවුරුදු  15ක් පාර්ලිමේන්තුවේ හිටියා. මගේ  ආශීර්වාදය ඇතිව ඥානසාර හිමිට මෙම අවස්ථාව ලබාදෙනවා කියලා ඔබවහන්සේ මාත්  එක්ක වාඩිවෙලා රටට කියන්න කියලා මම  රතන හිමියන්ගෙන් ඉල්ලා සිටියා.  මම කිව්වා මට මේක අවුරුද්දක් දෙන්න  ඊට පස්සේ ඕන දෙයක් කරගන්න කියලා.

රතන හිමියන්ගෙන් මම ඇහුවා  කෝ දැන් ලේකම් හිමියන් කියලා.  උන්වහන්සේ කිව්වා මම එන්න කිව්වා උන්වහන්සේ නැහැ කියලා. ඊට  පස්සේ මම ඇහුවා  ලේකම් හිමියන් ඔබවහන්සේගේ විශ්වාසවන්තයෙක් නෙමෙයිද කියලා.  මොකද මම ඔය ලේකම් හිමියන් එක්ක විනාඩි පහක් මූණට මූණ සාකච්ඡා කරලා නැහැ.  දැක්කෙත් සදහම් සෙවණේදී. අපිට ඕන වුණේ මේ වැඩපිළිවළ දිනවන්නයි.

ලේකම් හිමියන්ගේ පාර්ශ්වයෙන් දැන් කියනවා මට දෙනවලු, රතන හිමියන්ට දෙනවලු සභාපතිතුමන්ට දෙනවලු. කාලය මරමින් ඉදලා  මමත් නොවන රතන හිමියනුත් නොවන ජාතික ලයිස්තුවේ කවුරුත් නොවන  කෙනෙකු ජාතික ලයිස්තුවේ  දිවුරුම් දෙනවා කියලා දැන් අපිට ආරංචියක් ලැබිලා තියෙනවා.

මේක මෙහෙයවන්නේ ප්‍රංශයේ ඉඳල. මේකෙ  ඉන්නවා කිහිප දෙනෙක්.  මේවා පිටිපස්සේ ඉන්න මෙහෙයුම්කාරයෝ කවුද කියලා හොයාගන්න එක රටේ ආරක්ෂක අංශවලට බාරයි.

ජාතික ව්‍යාපාරයත් එක්ක සෙල්ලම් කරන්න හොඳ නැහැ. මේක බොක්කෙන්ම කරන්න ඕන. මට මන්ත්‍රීකම් ඕන නැහැ. මොන පීචං වැඩක්ද මේ.

රතන හිමියන් එක්ක සියලු‍ සංවාද ගොඩ නැගුනේ අපි වැඩ කළේ විශ්වාසය මතයි.  දැන් මේ පක්ෂයේ ලේකම් හාමුදුරුවෝ අපි ඔක්කොම එක මිටට අරගෙන. එයා වැඩකාරයෙක්, එයාගේ අතේ තමයි මේ ජාතික වැඩපිළිවෙළ දැන් තියෙන්නේ.

දැන් ලේකම් හිමියන්ගෙ නියෝජිතයෙක් අපිත් එක්ක සාකච්ඡා කරලා කොන්දේසි තුනක් ඉදිරිපත් කරලා තියෙනවා. ඒ අනුව උන්වහන්සේගේ පන්සලේ ප්‍රශ්න විසඳන්න, අධිකරණයේ තිබෙන නඩු විසඳන්න, ආරක්ෂාව තහවුරු කරන්න කියන කොන්දේසි දාලා තියෙනවා. 67000 කට අධික ජනතාවක් ඡන්දය දුන්නේ උන්වහන්සේගේ පෞද්ගලික ප්‍රශ්න විසඳන්න නෙමෙයි කියලා උන්වහන්සේ තේරුම් ගත යුතුයි.

දැන් මේ අය කියන විදියට රතන හිමියනුත් මමත් අතර අර්බුදයක් නැහැ. සංවාදයක් පමණක් ඇති වුණා. දැන් රතන හිමි එක පැත්තක, මම තව  පැත්තක, ඡන්දය දීපු මිනිස්සු අහනවා මොකද වෙන්නේ කියලා.  අපිට ඡන්දය දීපු මිනිස්සුන්ට අපි වගකියන්න ඕන. අද හෝ හෙට මේ ප්‍රශ්නය විසඳෙයි කියලා අපි බලාපොරොත්තු වෙනවා.

මේ ජාතික ලැයිස්තු මන්ත්‍රීධුරය මට දෙන්න කියලා ඉල්ලන්න මට අයිතියක් නැහැ. අපේ පක්ෂයේ සියලු‍ම දෙනා එකට එකතු වෙලා සාමූහිකව මෙම තීරණය ගත යුතුයි.

මේ ප්‍රශ්නයේදී කාටවත් ගේම් ගහන්න දෙන්නෙ නැහැ. මේ ඡන්ද 67000 අපිට ලක්ෂ හැට හතක් වගේ. ඒ නිසා මේ ගැටලු‍ව හොඳ විදිහට අපි විසඳ ගන්නවා” යැයිද උන්වහන්සේ පැවසූහ.