සංවිධානාත්මක අපරාධ කල්ලි සාමාජිකයන් යතුරු පැදියෙන් පැමිණ පානදුර පල්ලියමුල්ල හන්දියේදී ත්රිරෝද රථයකට වෙඩි තබා පුද්ගලයකු මරා දැමීමේ පුවතක් අප පුවත්පත නොබෝදා වාර්තා කළේය. මෙම වෙඩි තැබීම සිදු වූයේ සිය දහස් ගණනින් ජනයා සැරිසරණ පල්ලියමුල්ල මංසන්ධියේදී මහ දවාලේදී බවත් අප පුවත්පත වාර්තා කළේය. යතුරු පැදියෙන් පැමිණි දෙදෙනාගෙන් වෙඩික්කරු වෙඩි තබමින් සිටියදී ගිනි අවිය අක්රීය වීමෙන් පසු යතුරු පැදිකරු අමතා ‘නමය දියං - නමය දියං’ යනුවෙන් ප්රකාශ කර ඇති අතර එහිදී ඔහුට කුඩා ගිනි අවියක් දී ඇති බවද අප ප්රවෘත්තියෙහි සඳහන්ය. වෙඩි තැබීමෙන් අනතුරුව අපරාධකරුවන් දෙදෙනා යතුරුපැදියට නැගී පලාගිය බවද වාර්තාවේ.
මහ දවාලේ ගිනි අවි රැගෙන විත් මහ මගදී වෙඩි තබා මිනිසුන් මරා දමන්නේ නම් එම තත්ත්වය ඉතා භයානක බව වසන් කළ නොහැකිය. ඝාතනයට ලක්වූ පුද්ගලයාට පෙර වැරැදි නොමැති බව පොලීසිය සඳහන් කරන අතර එයින් පැවැසෙන්නේ අපරාධකරුවන්ගේ ඉලක්කය වැරැදී ඇති බවයි. පාතාලයන්ගේ අත්වැරදීම් නිසා කුඩා දරුවන් මෙන්ම වැඩිහිටි ගැහැනු පිරිමි දෙපක්ෂයම අකාලයේ මියගිය පුවත් ඉකුත් සමයේ වාර්තා විය. එවන් පසුබිමක් සහිත රටක් පතිරූප දේශයක් ලෙස වැරදීමකින් හෝ නම් කළ නොහැකිය.
සංවිධානාත්මක අපරාධ කල්ලි මැඩලීමේ මෙහෙයුම් ඉකුත් සමයේ තදින් ක්රියාත්මක විය. පාතාලය මැඩලීමේ අවශ්යතා ජනාධිපතිවරයාද වරින්වර තදින් අවධාරණය කළේය. මහජන ආරක්ෂක ඇමැති රියද් අද්මිරාල් සරත් වීරසේකර මහතාද වරින් වර පාතාලය මැඩලීමේ අවශ්යතාවත්, එය ක්රියාත්මක කරන ආකාරයත් දැඩිව අවධාරණය කළේය. එහෙත් ඉකුත් සඳුදා මහ දවාලේ පල්ලියමුල්ල මංසන්ධියෙන් වාර්තා වූයේ බයක් සැකක් නොමැතිව මිනීමරා අපරාධකරුවන් පලාගිය බවය.
“අපරාධ කල්ලි අතර ගැටුමක් - මත්ද්රව්ය ජාවාරම්කරුවන් අතර ගැටුමක්” ආදී වශයෙන් පොලීසිය ප්රකාශ කිරීමට ඉඩ තිබේ. එහෙත් ජනතාවට එබඳු ප්රකාශ වැදගත් නොවේ. මිනීමැරුමක් වූ විට එය මෙසේ සිදුවන්නට ඇතැයි ප්රකාශ නිකුත් කිරීමට පොලීසියක් අවශ්ය වන්නේද නැත. මියගියේ කවුද අපරාධකරුවන් කවුද යන ප්රශ්නය ජනතාවට අදාළම නොවේ. ජනතාවට අවශ්ය වන්නේ අනු අංකයක් නැති මුනිස්සම් ඉදිරිපිට අභය දානය ඉල්ලා වැඳ නොවැටෙන සමාජයකි. මනුෂ්ය ගරුත්වය රැකගෙන ජීවත්විය හැකි පරිසරයකි. එසේ නොමැතිව පාතාලයන් මහ පාරේ මහ දවාලේ මිනීමරාගන්නා රටක් නොවේ.
‘විශේෂිතය සමස්තය නොවේ’ යන්න කියමනකි. එමෙන්ම එය අවිවාදාත්මක සත්යයකි. පල්ලියමුල්ල ඝාතනය හරහා මුළු රටම පාතාලයේ අණසකට යටත්වී ඇතැයි යන මිථ්යාවට එළැඹිය යුතු නැත. එහෙත් මෙම ඝාතනය හරහා පාතාල ක්රියාකාරකම්හි ස්වරූපය ඉතා පහසුවෙන් හඳුනා ගත හැකිය.
පාතාලය යනු ලෙයට ලෙස ඉල්ලන මරණයට මරණය ඉල්ලන ලේ කුහරයකි. පාතාලයන් පසුවන්නේ රුධිර පිපාසයෙනි. එම පිපාසය සංසිඳුවා ගැනීම පාතාලයන්ගේ ඒකාන්ත අරමුණය. එහෙත් පොලිසිය ඇතුළු ආරක්ෂක අංශ තමන් හඹා එන බවට ඉව වැටුණු විට පාතාලයෝ පසුබා යති. සැඟවෙති. නිහඬ වෙති. අනතුර පහව යනතුරු ඉවසති. මෙම පරිසරය තුළ පොලීසිය සිතන්නේනම් පාතාලය අක්රීය වී ඇතැයි යනුවෙන් එය තරම් මුළාවක් තවත් නැත. පල්ලියමුල්ල ඝාතනයෙන් කියැවෙන්නේ එයය.
තමන්ට එරෙහිව ඇති මර්දනය තුරන්වී ඇතැයි සිතන පළමු දිනයේදීම පාතාලයෝ ක්රියාත්මක වෙති. අණක් ගුණක් නැති පාතාලයේ ස්වරූපය එයය. එහෙයින් පාතාලයන්ට එරෙහි ග්රහණය ලිහිල් කළ යුතු නැත. එය අඛණ්ඩව පවත්වාගෙන යා යුතුය.
පාතාලය යනු නාඳුනන තුවක්කුකරුවන් සිටින තැනක් නොවේ. රටෙහි ක්රියාත්මක පාතාල කල්ලි මොනවාද? එහි සාමාජිකයන් කවුරුන්ද? ඔවුන්ගේ ක්රියාකලාපය කෙබඳුද? යන්න සම්බන්ධයෙන් විස්තර පොලීසිය සතුව තිබිය යුතුය. රටක බුද්ධි අංශයක් තිබෙන්නේද ඒ වෙනුවෙනි. එබඳු දියුණු යන්ත්රණයක් රටකට තිබිය යුතුය. පශ්චාත් පරීක්ෂණ පැවැත්වීමට රටකට පොලිසියක් අවශ්ය වන්නේ නැත.
පල්ලියමුල්ල ඝාතනය පදනම් කරගනිමින් පාතාලයට එරෙහි වේගවත් මෙහෙයුමක් අලුතෙන් ආරම්භ කළ හැකිය. එය සියලු පාතාලයන් අල්ලා කූඩු කරන තුරු අඛණ්ඩව ක්රියාත්මක විය යුතුය. මන්ද යත් පාතාල ක්රියාකාරීත්වය යනු රටේ සෑම අංශයකටම බලපාන්නක් වන හෙයිනි. මහ මග මිනීමරා ගන්නා රටකට සංචාරකයෝ නොඑති. ආයෝජකයෝ නොඑති. මහජනතාවට පාරට බැසීම යනු දින නියමයක් නොමැති මරණ සහතිකය අතට ගැනීමක් බඳු රටක් යනු සැබැවින්ම රටක් නොවේ. මෙම සැහැසි ග්රහණයෙන් රට මුදා ගැනීම බලධාරීන්ගේ වගකීමය.
(***)
දියතලාව නරියාකන්ද (ෆොක්ස්හීල්) මෝටර් රථ හා යතුරු පැදි ධාවන තරගයක් අතරමැද දී සිදුවූ අනතුරකින් තරගය නරඹමින් සිටි පුද්ගලයන් හත් දෙනකු මරුමුවට පත්වී තවත්
ඉදිරි මාස 6ක කාලය ඇතුළතදී මේ රටේ ජාතික මැතිවරණයක් පැවැත්වීමට නියමිතය. ව්යවස්ථානුකූලව මීළඟ ජනාධිපතිවරණය ලබන සැප්තැම්බර් මැද සහ ඔක්තෝබර් මැද කාලය ඇතු
මෙරටින් බිහි වූ විශිෂ්ට ලංකා පුත්රයෙක් මිහිමවට සමුදී අද නොඑන ගමන් යන්නේය. ඒ මෙරට විශාලතම රාජ්ය නොවන සංවිධානය බිහිකර ශ්රී ලාංකීය සමාජය සංවර්ධනය උදෙ
ආගන්තුක සත්කාරයට ළැදි සිනාවෙන් මුව සරසාගත් මිනිසුන් සිටින රටක් ලෙස අප රටට ජාත්යන්තරය තුළ ඉහළ පිළිගැනීමක් විය. අප රට සංචාරක පාරාදීසයක් බවට පත් වූයේ සො
අනුබුදු මිහිඳු මහරහතන් වහන්සේ වැඩම කළ ඓතිහාසික මිහින්තලාව මෑතක සිට ආන්දෝලනාත්මක පුවත් මවන ස්ථානයක් බවට පත්ව තිබේ. එක් වරක් විදුලිය බිල නොගෙවීම නිසා ම
දේශපාලනය “ගරු සේවයක්” බවට පත්ව තිබූ යුගයක් අතීතයේ තිබිණි. උපයා ගෙන තිබූ වත්කම්ද මහජන සේවයට කැප කළ එම ගරු කටයුතු මහජන නියෝජිතයා සරල අල්පේච්ඡ ජීවිතයක් ග
ස්වභාවික ශාකසාර අඩංගු ආයුර්වේදයේ විශිෂ්ඨත්වය රැඳි personal care සහ රූපලාවණ්ය නිෂ්පාදන පෙළක් සමග ලොව පුරා ජනතා විශ්වාසයට පාත්ර වූ දැවැන්ත සමාගමක් වන Himalaya Wellness
ආදරය යනු සියලු සීමාවන් ඉක්මවා යන විශ්වීය සංකල්පයකී. එයට හදවත් එකතු කිරීමේ අසීමිත බලයක් ඇත.සැබෑ ප්රේමයක් නිරන්තරයෙන් සියුම් ලෙස අප ආත්මයන් ස්පර්ෂ කරම
ශ්රී ලංකා ප්රමිති ආයතනය (SLSI) විසින් සංවිධානය කරන ලද, ශ්රී ලංකා ජාතික තත්ත්ව සම්මාන උළෙල (SLNQA) 2022 හි ඉහළ ගුණාත්මකභාවය වෙනුවෙන් වූ කැපවීම ඇගයෙමින් හලාල් ප්
පානදුර ක්රමයේ මිනීමැරුම් තවත් ඇතිවන්න දෙනු එපා
සිරිබිරි Thursday, 28 January 2021 08:12 AM
කවුද කිව්වා වගේ මතකයි ආයුධ බිම තියලා බාර වෙන්න කියලා. අපි හිතුවේ ඔක්කෝම බාර වෙලා ලංකාවේ පාතාලය ඉවරයි කියලා. අනිත් එක වැඩ කරන අපේ විරුවනේ ඉන්නේත්...
පිටිගල මිලානෝ Thursday, 28 January 2021 08:58 AM
රටේ ආරක්ෂාව අංක එක කියලා නේද බලයට ආවේ? පොලිසිය බාර ඇමති මහරගම අහිංසක රෙදි වෙළඳුන්ට නම් නීති දානවා අපි දැක්කා. හමුදාව දාලා රටේ රාජ්ය තන්ත්රය කරන්න ගිහිල්ලා අනාගෙන ඉන්නේ.
මෝ Thursday, 28 January 2021 09:17 AM
ඒකෙනුත් අසමත්....
Rata Perata Sunday, 31 January 2021 09:31 AM
හැමෝම ලොක්කෝ වගේ විවේචනය කරන්නේ ප්රතිඵලය විතරයි. මේවා පටන් ගත්ත අය ගැන කතා කරන්න බයයි.