ඉන්දීය රජය ජාත්‍යන්තර වාණිජ මගීන් ගුවන් සේවා සඳහා රට නැවත විවෘත කිරීමත් සමඟ 2022 මාර්තු මස 27 සිට ශ්‍රී ලංකන් ගුවන් සේවයේ මගීන්ට ඉන්දියාවේ සිට කොළඹට සහ ඉන් ඔබ්බට පියාසර කිරීමට හැකියාව ලැබී ඇතැයි ශ්‍රී ලංකන් ගුවන් සමාගම නිවේදනයක් නිකුත් කරමින් සඳහන් කරයි. එම නිවේදනයේ වැඩිදුරටත් මෙසේද සඳහන් වේ.

COVID පැතිරීම වැළැක්වීම සඳහා ඉන්දියාව 2000 මාර්තු මාසයේ සිට ඉන්දියාවට සහ ඉන් පිටතට වාණිජ ගමන් සීමා කරන ලදී. ඒ අනුව ඉන්දියාව සහ ශ්‍රී ලංකාව ඇතුළු අනෙකුත් රටවල් අතර ගුවන් ගමන් ආරක්ෂිත බුබුලු ආකාරයෙන් සහ විවිධ සෞඛ්‍යාරක්ෂිත නියාමනයන්ට අනුකූලව සිදුවිය. මේ මස අවසානයේදී ඉන්දියාවේ ජාත්‍යන්තර වාණිජ ගුවන් සේවා යථා තත්ත්වයට පත්වීමත් සමඟ වසංගතයට පෙර මගීන් පුරුදුවී සිටි පහසු සහ නම්‍යශීලී ගුවන් ගමන් එලෙසින්ම අපේක්ෂා කළ හැකිය.

ඒ අනුව, ශ්‍රී ලංකන් ගුවන් සේවයේ ගමන් ගන්නා ගුවන් මගියකුට කොළඹ හරහා ඕනෑම ඉන්දියානු ගමනාන්තයකට ගමන් කිරීමේ පහසුකම සැලසෙනු ඇත. ඊට අමතරව ඉන්දියානු ගමනාන්ත හරහා ශ්‍රී ලංකන් ගුවන් ගමන් ජාලයේ ඕනෑම ජාත්‍යන්තර ගමනාන්තයකට යාමට මගීන්ට අවස්ථාව සැලසේ. තවද ලොව ඕනෑම තැනක සිට ගුවන් ප්‍රවේශ පත්‍රයක් වෙන්කරවා ගන්නා මගීන්ට කොළඹ හරහා ගුවන් සමාගම පියාසර කරන ඉන්දියානු නගර නවයකට පහසුවෙන් සම්බන්ධ විය හැකිය. ශ්‍රී ලංකන් දැනට දිල්ලි, මුම්බායි, හයිද්‍රාබාද්, ත්‍රිවාන්ද්‍රම්, කොචි, චෙන්නායි, ට්‍රිටි, මදුරෙයි සහ බැංගලෝර් යන ඉන්දියානු ගමනාන්ත වෙත සතිපතා ගුවන් ගමන් 55ක් සිදු කරයි.

කෙසේ වෙතත් එළඹෙන ගිම්හාන සමය සඳහා පූර්ව COVID මට්ටම්වලට ගැළපෙන පරිදි සතිපතා ගුවන් ගමන් 88ක් සමඟින් එහි මෙහෙයුම් දෙගුණ කිරීමට ගුවන් සමාගම සැලසුම් කර තිබේ. ඉන්දියානු ගුවන් ගමන් සීමා කිරීම් ඉවත් කිරීමත් සමඟ ශ්‍රී ලංකන් ගුවන් සේවයට ගුවන් ගමන් වාර ගණන පුළුල් කිරීම හැකියාව ලැබී ඇති අතර එමගින් මගීන්ට පහසු සම්බන්ධතා ලබා ගැනීමට හැකියාව ලැබී තිබේ. තවද ශ්‍රී ලංකන් ගුවන් සේවය මගීන්ට වැඩිදියුණු කළ ගුවන් ගමන් විකල්ප හඳුන්වා දෙමින් ඉන්දියාව සහ මාලදිවයිනේ ගමනාන්ත සම්බන්ධතාව වැඩිදියුණු කරමින් මෙන්ම ඈත පෙරදිග, මැද පෙරදිග, යුරෝපය සහ ඕෂනියාව වෙත පහසු ගුවන් ගමන් විකල්ප ද ගුවන් සේවය හඳුන්වාදී තිබේ.

-සටහන- චමින්ද මුණසිංහ