ඉන්දීය රජය කාශ්මීරයට ලබා දී තිබූ බලතල ඉවත් කරමින් ආණ්ඩුක්‍රම ව්‍යවස්ථාවේ 370 වැනි වගන්තිය අහෝසි කිරීමත් සමඟ 39 වැනි දිනටත් ජන ජීවිතය අඩාල වී ඇතැයි නිලධාරීහු ප්‍රකාශ කළහ.

පාසල් වසා දමා ඇති බවත් පොදු ප්‍රවාහන සේවා නැවැති ඇති බවත් ඔවුහු කීහ.

කාශ්මීර නිම්නයේ ප්‍රදේශ රැසක මහජන රැස්වීම්, එකතුවීම් සහ ජනතාවගේ ගමනාගමනයට පනවා තිබූ සීමා ඉවත් කර ඇති නමුත් නීතිය සහ සාමය ආරක්ෂා කිරීම සඳහා ආරක්ෂක අංශ යොදවා ඇතැයි ද නිලධාරීහු කීහ.

ජංගම සන්නිවේදන සේවා සහ දුරකතන ඇමතුම් මත පනවා තිබූ සීමා මායිම් ඉවත් කිරීම සම්බන්ධයෙන් බලධාරීන් අවධානය යොමු කර ඇතැයි නිලධාරීහු පැවැසූහ.  

කාශ්මීර නිම්නයේ ස්ථාවර දුරකතන ජාල ක්‍රියාත්මක වුවද ජංගම දුරකතන මගින් ඇමතුම් ලබාගැනීම සීමා කර තිබිණි. විශේෂයෙන්ම උතුරු කාශ්මීරයේ කුප්වාරා හන්ද්වාරා වෙත එම සීමා පනවා තිබිණි.

ශ්‍රී නගර් හි ඇතැම් ප්‍රදේශවල පෞද්ගලික ප්‍රවාහන කටයුතු සිදු වූ බවත් නගරයේ ඇතැම් ස්ථානවල ඔටෝ රික්ෂෝ දක්නට ලැබුණු බවත් නිලධාරීහු කීහ. වෙළෙඳසැල් සහ ව්‍යාපාරික තවමත් විවෘත කර නැති අතර කාශ්මීර නිම්නයේ පොදු ප්‍රවාහන සේවා ද තවමත් ක්‍රියාත්මක නැත.

අන්තර්ජාල සේවා සියල්ලම තවමත් අවහිර කර ඇතැයි ද නිලධාරීහු කීහ.

පාසල් විවෘත කිරීමට ප්‍රාන්ත ආණ්ඩුව උත්සාහ කළ ද ආරක්ෂක සම්බන්ධයෙන් පවතින සැකය හේතුවෙන් මාපියෝ දරුවන් පාසල් නොයවා සිටිති.

ඉහළ පෙළේ සහ දෙවැනි පෙළේ බෙදුම්වාදී දේශපාලනඥයන් අත්අඩංගුවට ගෙන ඇති අතර හිටපු මහ ඇමැතිවරුන් තිදෙනා වන ෆාරුක් අබ්දුල්ලා, ඕමාර් අබ්දුල්ලා සහ මෙහූබා මුෆ්ති ඇතුළු ප්‍රධාන පෙළේ නායකයෝ රැඳවුම් භාරයේ හෝ නිවාස අඩස්සියේ පසුවෙති.

දි හින්දු ඇසුරිනි 

055