ලෝකයේ කෝටි 120 පමණ වන කතෝලිකයන්ගේ ආගමික නායකයා ලෙසින් ආජන්ටීනා ජාතිකයකු පත්වීම බි‍්‍රතාන්‍ය මාධ්‍ය නුරුස්සන බවත් දකුණු ඇමෙරිකාවේ බලගතු රටක් වන ආජන්ටීනාවට ආසන්නයේ පිහිටි ෆෝක්ලන්ඞ් දුපත් සමූහයේ අයිතිය  සම්බන්ධයෙන් කාලාන්තරයක් තිස්සේ බි‍්‍රතාන්‍යය සමඟ පවතින මතගැටුම මෙයට පසුබිම වී ඇති බවත් විචාරකයෝ  කියති. 
වර්ග කිලෝමීටර් 12,000 තරම් කුඩා වූ වර්ග ප‍්‍රමාණයකින් යුතු ෆෝක්ලන්ඞ් දිවයින්වල මුළු ජනග‍්‍රහනය 2800ක් පමණකි. ඒ සියලූදෙනාම බි‍්‍රතාන්‍ය වැසියෝ වෙති. පාලනය කරනු ලබන්නේ බි‍්‍රතාන්‍ය විදේශ භූමියක් ලෙසය.
ආජන්ටීනාව ‘‘මල්වීනාස්’’ නමින් හඳුන්වන මෙම කුඩා කොදෙව් දිවයින් තම රටට අයත් බවට කාලයක් තිස්සේ කියා සිටී.
1982 දී ආජන්ටීනා හමුදා මෙම දිවයින් කිසිදු දැනුම්දීමක් නොකොට ආක‍්‍රමණය කොට අල්ලා ගත්තේය. බි‍්‍රතාන්‍යයේ මාර්ගරට් තැචර් අගමැතිනියගේ පාලන සමයේ සිදුවුණ මෙම ආක‍්‍රමණය නිසා බි‍්‍රතාන්‍ය හමුදා සහ ආජන්ටීනා හමුදා අතර මාස දෙකක් තිස්සේ ඉතා දරුණු මෙන්ම අමිහිරි සංග‍්‍රාමයක් සිදු විය.
මේ කාලයේ ආජන්ටීනාව පාලනය කලේ ජනරාල් ලියෝපෝල්ඩෝ ගල්ටියෙරි නම් වූ ආඥාදායක හමුදා නායකයෙකි.
යුද්ධයෙන් බි‍්‍රතාන්‍යයට ජය අත්වූවද එම යුද්ධයේ අමිහිරි මතක මේ රටවල් දෙකේම දේශමාමක පුරවැසියන්ගේ සිත්හි තවමත් කාවැදී පවතී.
එම යුද්ධය සිදුවූ කාලවකවානුවේදී ආජන්ටීනාවේ අග රදගුරු ලෙස සිටි වත්මන් පාප් වහන්සේ යුද්ධය සඳහා තම ආශිර්වාදය දුන් බවත් 1976 සිට 1983 දක්වා ආජන්ටීනාව පාලනය කල හමුදා ජුන්ටාවේ අඥාදායකත්වය මෙන්ම ඒ කාලයේ සිදුවූ ප‍්‍රාණඝාත අතුරුදන් වීම සහ අසාමාන්‍ය මානව හිමිකම් උල්ලංඝනය කිරීම් ඉදිරියේ කරබාගෙන සිටි බවත් බි‍්‍රතාන්‍ය පුවත්පත් වල උදහසට ලක් වී ඇති කාරණාවයි.
මෙයට අමතරව වත්මන් පාප් වහන්සේට ඉංග‍්‍රීසි භාෂාව හැසිරවීමට නොහැකිවීමද ඔවුන් දකින තවත් අඩුවක් බව  උලූප්පා පෙන්වති.
පාප්වහන්සේ තමන්ගේ කෙනකුවීම නිිසා ෆෝක්ලන්ඞ් දිවයිනට උරුමකම්කීමට යළිත් ඉදිරිපත් වීමට එරට වැසියන් උසිගැන්වීමටද හොඳ අවස්තාවක් උදාවී ඇති බවද බි‍්‍රතාන්‍ය පුවත්පත් සඳහන් කර ඇත.
මේ සඳහා උපහාසාත්මක ශිර්ෂ පාඨයන් ද යොදාගෙන ඇත. එවන් එක් සිරස්තලයක නව පාප්වහන්සේ හඳුන්වා දී ඇත්තේ ‘‘දෙවියන්ගේ හස්තය’’ ලෙසටය.
එම උපහාසාත්මක සිරස්තලය යොදාගැනීමෙන් ඔවුන් බලාපොරොත්තු වන්නේ 1986 ජුනි 22 වෙනිදා එංගලන්තය සහ ආජන්ටීනාව අතර පැවති පාපන්දු ලෝක සූරතා තරඟයේදී අජන්ටීනාවේ නායක ලෝපතල ක‍්‍රීඩක දියෝගෝ මැරඩෝනා බෝලය අතින් අල්ලා විසිිකිරීමෙන් ලබාගත් ‘‘ගෝලය’’ සම්බන්ධ සිදුවීම සමඟ නව පාප් වහන්සේගේ පත්වීම ගැලපීමටය.
එම සිදුවීම මැරඩෝනා එදා කීවේ එය ‘‘දෙවියන්ගේ හස්තයෙන්’’ ලබාදුන් ගෝලයක් ලෙසය.
ලෝකයේ වෙනත් රටවල පුවත්පත් නව පාප් වහන්සේගේ පත්වීම පිළිබඳ විස්තරාත්මක වාර්තා පළකර තිබිනි.