ස්පාඤ්ඤයේ ෆෙලිපේ රජුගේ සොයුරිය වන ක්‍රිස්ටිනා කුමරිය ඇගේ සැමියා ඇතුළු 18 දෙනකු මූල්‍ය වංචා චෝදනාවකට ඊයේ අධිකරණ්‍ය හමුවේ පෙනී සිටි බව විදෙස් මාධ්‍ය වාර්තා කරයි.

එරට රජ පවුලේ සාමාජිකයකු අධිකරණයට කැඳවූ පළමු අවස්ථාව මෙය බැවින් ස්පාඤ්ඤ දේශපාලන විචාරකයන් පෙන්වා දෙන්නේ එය සිය රටේ රජ පරපුරට කළු පැල්ලමක් එකතු වූ දිනයක් බවයි. ලාබ නොලබන නූස් ක්‍රීඩා පදනම යොදා ගනිමින් මේ පිරිස රාජ්‍ය ආයතනවලින් හා මහජනයාගෙන් වංචනික ලෙස මුදල් එකතුකැර ඇතැයි චෝදනා එල්ල වී ඇත. කෙසේ වෙතත් ඔවුහු තමන්ට එල්ලවී ඇති මේ චෝදනා සියල්ල ප්‍ර‍තික්ෂේප කරති.

නඩු විභාගයේ දී ක්‍රිස්ටිනා කුමරිය වැරදිකරු වුවහොත් ඇයට වසර අටක සිර දඬුවමක් නියමවනු ඇත. ඇය මේ වනවිට 50 හැවිරිදි වියේ පසු වන්නීය. නඩු විභාගය ත්‍ර පුද්ගල විනිසුරු මඩුල්ලක් ඉදිරියේ දී පැවැත්වේ. එරට මාධ්‍ය වාර්තා කරන්නේ මේ මුල්‍ය වංචා සිදුව ඇත්තේ 2007 හා 2008 වර්ෂවලදී බවයි.

2010 වර්ෂයේ දී මේ චෝදනා එල්ලවීම හේතුනේ ස්පාඤ්ඤයේ ෆෙලිප් රජු සිය සොයුරිය පැල්මාහි ආදිපාද ධූරයෙන් ද ඉවත් කරනු ලැබුවේය. එසේ වුව ද ඇය තවදුරටත් ස්පාඤ්ඤ රජ පවුලේ සාමාජිකාවක ලෙස පිළිගැනෙයි.