මාලේහිදීය (රොයිටර්)

මාලදිවයිනේ නව ජනාධිපතිවරයා ලෙස තේරී පත්වූ ඊබ්‍රහිම් මොහොමෙද් සෝලි හෙට (17) එම ධූරයේ දිවුරුම් දීමට නියමිතය.

මාලදිවයින තුළ චීන මූල්‍ය පහසුකම් යටතේ සංවර්ධන ව්‍යාපෘති රැසක් ක්‍රියාත්මක වූ අතර එම නිසාම මාලදිවයින ද චීනයේ ණය කන්දකට යට වී ඇත. ජනාධිපතිවරණයෙන් පරාජයට පත්වූ අබ්දුල්ලා යමීන් චීනයට හිතවත් ජනාධිපතිවරයකු වන අතර ඔහුට අනපේක්ෂිත පරාජයක් අත් පත් කරදෙමින් ජනාධිපතිවරණයෙන් ජයගත් මොහොමෙද් සෝලි ඉන්දියාවට හිතවත් දේශපාලනඥයෙකි. ඔහුට ඉදිරි කටයුතු සඳහා ඇමෙරිකා එක්සත් ජනපදයේ සහ ඉන්දියාවේ සහාය හිමි වනු ඇතැයි පැවසේ. 

අබ්දුල්ලා යමීන් ජනාධිපතිවරණයෙන් පරාජයට පත්වීම චීනයට අත් වූ පරාජයක් යැයි ද ජාත්‍යන්තර දේශපාලන විශ්ලේශකයෝ පෙන්වා දෙති. කලාපය තුළ තම බලය ස්ථාවර කරගැනීම සඳහා චීනය සහ ඉන්දියාව බල අරගලයක නිරත වී සිටිති. 

ඊබ්‍රහිම් මොහොමෙද් සෝලි ජනාධිපති ධුරයේ දිවුරුම් උත්සවය හෙට (17) මාලේ අගනුවරදී පැවැත්වීමට නියමිත අතර ඉන්දීය අග්‍රාමාත්‍ය  නරේන්ද්‍ර මෝදිද මෙම උත්සවයට සහභාගී වීමට නියමිතය. චීනය නියෝජනය කරමින් එරට සංස්කෘතික හා සංචාරක අමාත්‍ය ලූ ෂූගන්ග් ද මාලදිවයිනට පැමිණීමට නියමිත යැයි පැවසේ.  

055