ලෝක උරුමයක්වන චීන මහා ප්‍රාකාරයෙන් සියයට 30ක පමණ ප්‍රමාණයක් අහිතකර ස්වභාවික තත්ත්වයන් හා මිනිසාගේ ක්‍රියාකාරකම් හේතුවෙන් විනාශවී යමින් ඇතැයි විදෙස් මාධ්‍ය පවසයි.

චීන මහා ප්‍රාකාරය නොකැඩුණු තනි ආකෘතියක් නොවේ. කිලෝ මීටර 21195ක් පුරා පැති ඇති මෙය චීනයේ නැගෙනහිර වෙරළ තීරයේ ෂැංහයිගුඅන් සිට ගෝබි කාන්තාරය දක්වා පැතිර ඇත.

එරට බලධාරීන් පවසන්නේ ප්‍රාකාරයෙන් කිලෝ මීටර 9000ක පමණ ප්‍රමාණයක් විනාශ වෙමින් පවතින බවයි. ක්‍රිස්තු පූර්ව තුන්වැනි සියවසේ දී ඉදිකිරීම් ආරම්භ කළ එහි කිලෝ මීටර 6300ට වැඩි කොටසක් ගොඩනගා ඇත්තේ ක්‍රිස්තු වර්ෂ 1368 ත් 1644ත් අතර මිංග් රාජ වංශය කාලයේ දී ය. ඒ චීනයේ බීජිං අගනුවරට නැගෙනහිරින් ඇති කොටසයි.

බීජිං ටයිම්ස් පුවත්පත වාර්තා කරන්නේ චින මහා ප්‍රාකාරයෙන් කිලෝ මීටර 1862ක් දැනටමත් විනාශ වී ඇති බවයි. ඇතැම් ඉදිකිරීම් වැසි හා සුළං තත්ත්වයන් හේතුවෙන් විනාශ වී ඇතැයි ද බිත්තිමත ගස් වැවීමෙන් විශාල හානියක් සිදුවන්නේ යැයි ද එම පුවත් සේවය පවසයි.

චීන මහා ප්‍රාකාර සංගමයේ උප සභාපති ඩොන් යවොහුයි බීජින් ටයිම්ස් පුවත්පතට මෙසේ කියා ඇත.

" මෙම ප්‍රාකාරයේ බොහෝ කුළුනු තදින් සෙලවෙමින් පවතිනවා. ඒ වගේ ම ඉදිරි වර්ෂා කාලයේ දී මේ කොටස් කඩා වැටෙන්න ඉඩ තිබෙනවා. මෙය ලෝකයේ මානවයන් විසින් කරන ලද දිගම ඉදිකිරීමයි. එය මානව ක්‍රියාකාරකම් හේතුවෙන් ම විනාශ වී යාම ඛේදජනකයි. “

චීනයේ නැගෙනහිර පළාතේ පිහිටි හුබේ හි ලුලොන් දිස්ත්‍රික්කයේ ඇතැම් දුප්පත් ගැමියන් මෙහි ඇති පිලිස්සුණු ඝනකම ගඩොල් ගලවාගෙන ගොස් තම නිවාස සෑදීමට යොදාගෙන ඇතැයි ද ඔහු පවසයි.

චීන අකුරු කොටා ඇති ගල් පතුරු යුආන් 30 ගණනේ එනම් ඇමරිකානු ඩොලර් 4.80 ගණනේ විකිණන බවත් හෙලිවි ඇත.

චීන රජයට අයත් ග්ලෝබල් ටයිම්ස් පුවත් පත වාර්තා කලේ එරට නීති රිති වලට අනුව චීන මහා ප්‍රාකාරයේ ගඩොලක් ලගතබා ගන්නා පුද්ගලයෙකුගෙන් යුආන් 5000 ක් දඩ ගැසිමට හැකියාව පවතින බවයි. නීති ක්‍රියාවට නැංවීම සඳහා විශේෂිත වූ ආයතනයක් නොමැති වීම මෙය පාලනය කිරීමට ඇති ප්‍රධාන ගැටළුවකි.

තව දුරටත් මෙම වාර්තාවෙන් පෙන්වා දෙන්නේ චීන මහා ප්‍රාකාරයේ සංවර්ධනය නොවු ප්‍රදේශ ගවේෂණය කිරිම විනෝද ක්‍රියාවක් ලෙස මැත කාලයේ ජනප්‍රිය විමේ හේතුවෙන්ද ප්‍රාකාරයට බලවත් ලෙස හානි පැමිණ ඇති බවයි.