ඉන්දීය රජයට ඇමෙරිකන් ඩොලර් බිලියන 40 ක අලාභයක් සිදු කළ ‘2ජී’ වර්ගයේ ජංගම දුරකතන බලපත‍්‍ර නිකුත් කිරීමේ වංචාවට සම්බන්ධ යැයි චෝදනා ලැබ මාස හයකට ආසන්න කාලයක් රිමාන්ඞ් බන්ධනාගාරගතව සිටි තමිල්නාඩු ප‍්‍රාන්තයේ හිටපු මහ ඇමැති කරුණානිධිගේ දියණිය මෙන්ම ඉන්දීය ලොක්සභා මන්තී‍්‍රවරියක ද වන කනිමෝහීට පෙරේදා (28) ඇප නියම කෙරුණි.ඇයට ඇප නියම වූයේ එම දුරකතන බලපත‍්‍ර වංචාව සම්බන්ධයෙන් බන්ධනාගාර ගතකර සිටි ඉන්දීය ව්‍යාපාරික ක්ෂේත‍්‍රයේ විධායක අධ්‍යක්ෂකවරුන් පස් දෙනකුට ඇප ලබා දීමට නවදිල්ලි මහාධිකරණය තීන්දු කිරීමත් සමඟය.ඉන්දීය රජයට ඇමෙරිකන් ඩොලර් බිලියන 40 ක පාඩුවක් සිදුවූ බව පැවැසෙන එම ජංගම දුරකතන වංචාව සිදුවූයේ කරුණානිධි තමිල්නාඩුවේ මහ ඇමැතිව සිටිද්දී, ඔහුගේ ද්‍රවිඩ මුනේත‍්‍ර කසාගම් පක්ෂයේ ඒ. රාජා, ඉන්දීය විදුලි සන්දේශ ඇමැති ධුරය හොබවද්දීය. රාජා ද මේ වනවිට රිමාන්ඞ් බන්ධනාගාරගතව සිටියි. කනිමෝහී එම දුරකතන බලපත‍්‍ර නිකුත් කිරීමේ වංචාවට සම්බන්ධ යැයි ප‍්‍රකාශ කළේ රාජා ය. ඒ අනුව ඉන්දීය අපරාධ විමර්ශන කාර්යාංශ නිලධාරීහු කනිමෝහී අත්අඩංගුවට ගත්තේ ඉකුත් මැයි 20 වැනිදාය.