ඇමෙරිකාවත් පාකිස්තානයත් අතර පළුදු වූ මිතුදම් ශක්තිමත් කර ගැනීමේ අදහසින් ඇෆ්ගනිස්තානයේ ඇමෙරිකා හමුදා ආඥාපති ජනරාල් ජෝන් ඇලන් සහ පාකිස්තාන හමුදාපති ජනරාල් අෂ්ෆාක් කයානී අතර විශේෂ සාකච්ඡුාවක් පෙරේදා (12) පැවැත්විණි. ඇමෙරිකාව සහ පාකිස්තානය අතර මිතුදම් පළුදු වූයේ පසුගිය වසරේ නොවැම්බර් මාසයේදී, ඇමෙරිකා හමුදා නියමුවන් රහිත ඩ්‍රෝන යානාවක් යොදා ගනිමින් එල්ල කළ මිසයිල ප‍්‍රහාරයකදී පාකිස්තාන හමුදා සෙබළුන් 24 දෙනකු මියයෑමේ සිද්ධියෙන් පසුවය. එම සිද්ධියෙන් පසුව පාකිස්තාන රජය ඇමෙරිකාව සම්බන්ධයෙන් දැඩි කි‍්‍රයා මාර්ග ගත් අතර, ඇෆ්ගන්/පාකිස්තාන දේශසීමාව හරහා ඇෆ්ගනිස්ථානයේ ඇමෙරිකන් හමුදාවලට භාණ්ඩ සැපැයෙන සැපැයුම් මාර්ග වසා දැමුණි. මාස 6 ක් ගතවී ඇතත් තවමත් එම සැපැයුම් මාර්ග විවෘත කර නැත. ඊට අමතරව ඇෆ්ගන් දේශසීමාව අසල පාකිස්තානයේ පිහිටුවා තිබූ ඇමෙරිකන් ගුවන් හමුදා කඳවුරක් වහා ඉවත් කර ගන්නා ලෙස ද පාකිස්තාන රජය ඇමෙරිකා හමුදාවලට දැනුම් දුන්නේය. පාකිස්තාන හමුදා සෙබළුන් මරා දැමීම සම්බන්ධයෙන් සමාව ඉල්ලන්නැයි ද පාකිස්තාන රජය ඇමෙරිකාවට බල කළේය. ඇෆ්ගනිස්තානයේ ඉස්ලාමීය සටන්කාමීන්ට එරෙහිව ගෙන යන සටනේදී ඇමෙරිකන් සෙබළුන්ට අවශ්‍ය බඩු බාහිරාදිය ඇෆ්ගනිස්තානයට ගෙන යන්නේ පාකිස්තානයේ කරච්චි නුවර සිට පාකිස්තාන දේශසීමා හරහාය. එම නිසා එම සැපැයුම් මාර්ග විවෘත කිරීම ඉතා වැදගත් වේ. එම සැපැයුම් මාර්ග පවත්වාගෙන යෑම වෙනුවෙන් ඇමෙරිකා රජය පාකිස්තාන රජයට මුදල් ආධාර ලබා දෙයි. එහෙත් සැපැයුම් මාර්ග වසා දැමීමෙන් පසු එම ආධාර සීමා කිරීමට ද ඇමෙරිකා රජය පියවර ගත්තේය. සැපැයුම් මාර්ග විවෘත කරන්නැයි පාකිස්තාන රජයට කිසිදු ආකාරයක බලපෑමක් එල්ල නොකරන බවත්, සාකච්ඡා මාර්ගයෙන් දෙරට අතර හොඳ හිත වර්ධනය කර ගැනීමට කටයුතු කළ බවත් ඇමෙරිකා හමුදා ආඥාපති ජනරාල් ජෝන් ඇලන් ප‍්‍රකාශ කළේය. හමුදා ප‍්‍රධානීන් අතර තවත් සාකච්ඡා වටයක් ඉදිරි දින කිහිපයේදී පැවැත්වීමට ද නියමිත යැයි ඇමෙරිකාව පවසයි.