පුරාතනයේ සිටම මිනිසාත් ගහකොළත් අතර පැවතියේ සමීප සම්බන්ධතාවකි. උපතේ සිට මිනී වළ දක්වාම මිනිසාට වෘක්ෂලතාදිය ප්‍රයෝජනවත් වන බවත් උපකාරී වන බවත් අපි දනිමු. අපේ ආහාර, බෙහෙත් ද්‍රව්‍ය හා නිවාස අලංකරණ, ගෘහ භෘණ්ඩ ආදී සියලුම දේම සම්පාදනය වන්නේ අප අවට තිබෙන වෘක්ෂලතාවන්ගෙනි. අපට නොපෙනෙන විද්‍යාවටද හසු නොවන අගනා සේවයක්ද වෘක්ෂලතා ආශ්‍රයෙන් මිනිසාට සිදුවේ.  

යන්ත්‍ර මන්ත්‍ර ගුරුකම්, සෙත් ශාන්ති කිරීමේදී ඉතා පුරාණයේ සිට දෙහිඅත්ත, අඹඅත්ත, කොහොඹඅත්ත පාවිච්චි කෙරිණ. මේ අනුව අපට පෙනීයන්නේ අපට පෙනෙන හා අප දන්නා ප්‍රමාණයට වඩා වැඩි දෙයක් වෘක්ෂලතාදියට ඇති බවයි. ග්‍රහ අපල උවදුරු ඒරාෂ්ඨක අපල දුරුකර ගැනීම සඳහා යම් යම් වෘක්ෂවලට සාත්තු කිරීම අතපත ගෑම ආවතේව කිරීම, ස්පර්ශ කිරීම, ග්‍රහ අපල දුරලන ඉතා ශුභඵල දෙන කාර්යයක් බව අනාදිමත් කාලයක සිටම පැවත එන ජ්‍යොතිෂ්‍යමය ප්‍රතිකර්මයකි.  

ග්‍රහ අපල උවදුරු, සෙනසුරු ඒරාෂ්ඨකය යනු සූර්යයා වටේ භ්‍රමණය වන්නාවූ ග්‍රහ වස්තූන්ගේ අයහපත් කිරණ මිනිස් සිරුරට වැදීමෙන් රූපකායේ හා මනෝකායේ ඇතිවන චලනය හා කම්පනය හේතුකොට ගෙන සිදුවන අයහපත් ප්‍රතිඵලය. මේ අනුව සියලුම ලග්නවලට අධිපති මේ සියලු අපලවලට බලපාන ලග්නාධිපති ග්‍රහයින් සිටින අතර ග්‍රහයන්ට අදාළ වෘක්ෂයන්ට සාත්තු කිරීමෙන් පුද පූජා පැවැත්වීමෙන් අපල දුරුවෙන බව කාගේත් විශ්වාසයයි. එම ග්‍රහයන්ට බලපාන ගස් වර්ග හඳුනාගෙන එම ගස් වර්ග අපේ ජීවිතයට බලපාන ආකාරය පිළිබඳ දැනුමක් ලබාදීම මෙම ලිපියේ අරමුණයි.  

ග්‍රහ මඩුල්ලේ රජු ලෙස රවි ග්‍රහයා ප්‍රධාන වේ. රවි ග්‍රහයාගේ හෙවත් සූර්යයාගේ කිරණ අප කාටත් හුරු පුරුදුය. සූර්යතාපය අපේ ශරීරයට වැදුන විට දැඩි රශ්නයක් දැනෙයි. හම කළු වෙයි. ඇස් නිලංකාර වෙයි. සමහරවිට ඇස් අමාරු, ඇස් රෝග සෑදීමටද ඉඩ ඇත. එය සාමාන්‍යයෙන් අප කාටත් පොදු දේය.  

එහෙත් කිසියම් අයෙකු මෙලොව උපත ලබන මොහොතේ උත්පත්ති කේන්ද්‍රයේ අශුභ ස්ථානයක රවි ග්‍රහයා සිටියහොත් හෝ අශුභ ග්‍රහයන්ගේ දෘෂ්ටි ලබමින් අශුභ ග්‍රහ සංයෝග ලබමින් සිටියහොත් හෝ ග්‍රහචාරයේදී අශුභ ස්ථාන පසුකරමින් යනවිටදී සූර්යයාගේ අශුභ කිරණ එම පුද්ගලයාට ස්පර්ශවීමෙන් ලෙඩ රෝග ශරීරාබාධ හා වෙනත් විකෘතිතාද ඇතිවීමට හේතුවෙයි.  

එවැනි අවස්ථාවලදී ඉඹුල් ගස යට සිටීමෙන් ගසට සාත්තු කිරීමෙන්, ගසක් ස්පර්ශ කිරීමෙන් එවැනි දෝෂ භංග වී යන බව ඈත අතීතයේ සිටම ඇති විශ්වාසයකි. රවි ඉරිදා දිනයට අධිපති බැවින් එම සත්කාරය එම දිනයටම කිරීම වඩා වැදගත්වේ.  

ග්‍රහ මඩුල්ලේ මව ලෙස සලකන සඳු හෙවත් චන්ද්‍රයා සඳු දිනට අධිපති වන අතර එම ග්‍රහයා සිතිවිලිවලට බලපායි. සඳු ග්‍රහයාට හිමිව ඇත්තේ දිඹුල් වෘක්ෂයයි. මෙය ඖෂධීය වශයෙන් වඩාත් වැදගත් බැවින් සඳුදා දිනක අවුරුද්ද උදාවෙනවා නම් අපි එදාට හිසට ඉහළින් එල්ලන්නේ දිඹුල් කොළයි. එය රෝග නිවාරණ දීර්ඝ ආයුෂ ලැබෙන ගුණයක් ඇති බැවිනි.  

අඟහරුවාදා දිනට අධිපති කුජ ග්‍රහයාට අයත් වන්නේ ඖෂධීය ගුණයෙන් අනූන කොලොන් වෘක්ෂයයි. රුධිරයට අධිපති ග්‍රහයාවන්නේ කුජ බැවින් ඇතැම් අයගේ ශරීරයේ ලේ විෂවීම ඇතිවන්නේද කුජගේ බලපෑමෙනි. මේ නිසා කුජ ග්‍රහයාගේ අයහපත් කිරණින් ආරක්ෂා වීම සඳහා කොලොන් වෘක්ෂය ස්පර්ශ කිරීම සාත්තු කිරීම එම ගස් සෙවණෙහි වැඩි වේලාවක් ගත කිරීම අඟහරු ග්‍රහයාගේ අපල දුරුකර ගැනීමට වඩාත් යෝග්‍ය වේ.  

ජ්‍යොතිෂයේදී කොහොඹ ගස වෙන්කර ඇත්තේ බුධ ග්‍රහයා වෙනුවෙනි. බුධ ග්‍රහයාගෙන් අපල ඇති අයගේ චර්මයේ හෙවත් සමේ කැළැල් හටගනී. එවැනි අය කොහොඹ ගසක් අසල සිටීමෙන් එම ග්‍රහයාගෙන් පිටවෙන කිරණින් හා ගසෙන් පිටවෙන කිරණත් ඒකාබද්ධව චර්ම රෝග සුවකර ගත හැක. සිසිලස ගෙන දෙන ඖෂධීය ගුණයෙන් යුත් කොහොඹ ගස දෙවියන්ගේද ආකර්ෂණය ලබන ගසක් ලෙසද හඳුන්වයි. බ්‍රහස්පතින්දා දිනයට අධිපති ග්‍රහයා වන්නේ ගුරුය.  

ගුරු ග්‍රහයාට හිමි වෘක්ෂය වන්නේ බෝ වෘක්ෂයයි. මොහු ග්‍රහලොව සුරගුරු ලෙසද හඳුන්වයි. මෙම ග්‍රහයා දෙවියන්ගේත් ගුරුවරයා ලෙස සැලකේ. මෙම ග්‍රහයාගෙන් අපල ඇති අය බෝ වෘක්ෂයට නැමදීම වෘක්ෂය අතපත ගෑම ආවතේව කිරීම මගින් ඔවුන් හට රෝග නිවාරණ ශක්තිය, ශාන්තිය මෙන්ම දියුණුව සඳහා වන යහපත් ප්‍රතිඵලද උදාකරගත හැකිය. බෝ පත්‍රයෙන් පිටවෙන කිරණ ඔවුන්ගේ මනසට විශේෂයෙන් බලපෑමක් කරයි. ගුරුගේ අපල හිමියන් නිතර බෝධිපූජා පැවැත්වීමෙන් යහපත් ප්‍රතිඵල ලබාගත හැකි වෙයි.  

සිකුරාදා දිනයට අධිපති ග්‍රහයා වන්නේ සිකුරුය. සිකුරුට හිමිවන්නේ කරඳ ගසයි. ආදර හැඟීම් ලියලන වෘක්ෂය ලෙසද කරඳ ගස හඳුන්වයි. එහෙයින් සිකුරු ග්‍රහයා මනසට ආදර හැඟීම් ඉස්මතු කරවයි. ග්‍රහලොව මනාලිය ලෙසද සිකුරු ග්‍රහයා හඳුන්වයි.  

ශනි හෙවත් සෙනසුරු ග්‍රහයා සෙනසුරාදා දිනට අධිපති ග්‍රහයා ලෙස සැලකේ. ග්‍රහලොව කම්කරුවා ලෙසද ශනි හෙවත් සෙනසුරු හඳුන්වයි. ශනි ග්‍රහයාට හිමි වෘක්ෂය වන්නේ නුග ගසයි. නුග ගසට සත්කාර කිරීමද සෙනසුරු අපලවලට සුබදායකය. ඖෂධීය ගුණය හා සිසිලස ලැබෙන මෙම වෘක්ෂයට පූජා පැවැත්වීමෙන් නිරවුල් ශක්තිමත් මනසක් ඇතිකරයි.  

දින හතට හිමි ග්‍රහයින් ගැන ඉහත දැක්වූ අයුරින් හඳුන්වද්දී රාහු හා කේතු ග්‍රහයාට හිමි තැන ගැන ඔබට ප්‍රශ්නයක් වී ඇති හේතුව මේකයි. එම ග්‍රහයින් දෙදෙනා ජ්‍යොතිෂයේදී සලකන්නේ ඡායා ග්‍රහයින් ලෙසයි. නොපෙනෙන කිරණ පමණක් ලැබෙන ග්‍රහයින් ලෙසයි සලකන්නේ.  

මෙම ග්‍රහයින්ට වැටකෙයියා හා කෙසෙල් වැනි වඩා වැදගත් නොවන ගස් නියමකර ඇත්තේ එම නිසාය. එසේ වුවත් මෙම ග්‍රහයින් දෙදෙනාත් එකතුවෙන් තමා නව ග්‍රහයින් ගොඩනැගෙන්නේ. බලි තොවිල් වැනි ශාන්ති කර්මවලදී කේතුට හිමි වෘක්ෂය වන කෙසෙල් ගසේ පතුරු භාවිත කරන්නේ වායු පිත සෙම යන කොටස් තුන කෙසෙල් පතුරුවල අඩංගු නිසාය. පොදු වශයෙන් ගත්කල මෙම ඖෂධීය ගස්වලට ආවතේව කිරීම ඇප උපස්ථාන කිරීම වන්දනාමාන කිරීම මගින් අපට ඇති අපල උපද්‍රව දුරුකර ගැනීමට හැකි බැව් ජ්‍යොතිෂය පෙන්වා දෙයි.  

හිඹුටානේ පියතිලක ද අල්විස්  
158 හිඹුටාන මුල්ලේරියාව නව නගරය.