(ඩී.ජී.සුගතපාල)
 
ගාල්ල බටගන්විල පෞද්ගලික ඉඩමක දුරකතන කුලුනක් ඉදිකිරීම නතරකරන්නැයි ඉල්ලා ප්‍රදේශවාසීහු පිරිසක් අද(18) ඉඩමට පිවිසෙන මාර්ගය අවහිර කරමින්  විරෝධතාවක නිරතවූහ.
 
කිසිදු අවසරයකින් තොරව මෙම දුරකතන කුලුන ඉදිකරන බවත්,  එයින් නිකුත් වන අධි සංඛ්‍යාත තරංග මගින් පිළිකා අවදානම ඇතුළු සෞඛ්‍ය ගැටලු මතුවන බවත්, මී මැස්සන් වඳවීම, අකුණු අවධානම ඇතිවීම වැනි ගැටලු මතුවන බවත් ඔවුහු පැවසූහ.
 
එම ස්ථානයට පැමිණි ගාල්ල නගරාධිපති ප්‍රියන්ත සහබන්දු මහතා කියාසිටියේ මෙම කුලුන ඉදිකිරීමට ඉඩම් හිමියා 2017 වසරේ ඉඩම ලබාදී ඇති අතර මේ සඳහා නගර සභාවෙන් අනුමැතිය ලබාගෙන නොමැති බවය. එවකට බලය තිබු නාගරික සංවර්ධන අධිකාරියෙන් පමණක් අවසරයක් ලබාගෙන ඇති බවද නගරාධිපතිවරයා කිය.
 
මේ සම්බන්ධයෙන් නාගරික ඉංජිනේරුවරයා හෝ තාක්ෂණික දැනුවත් කර නොමැති බවත් කිලෝමීටර් දෙකක් ඇතුළත දුරකතන කුලුනු දෙකකට වඩා නොතිබිය යුතු නමුත් ගාල්ල නගර සභා සීමාව තුළ කුලුනු 9ක් තිබෙන බවද ඒවා එකක්වත් අනුකූලතා සහතිකයක් ලබාගෙන නොමැති බවද නගරාධිපතිවරයා කියා සිටියේය.
 
එනිසා මෙම කුලුන ඉදිකිරීම නතර කිරීමට පියවර ගන්නා බව පැවසු නගරාධිපතිවරයා ලබන 27වන දින ජනාධිපතිවරයාගේ ප්‍රධානත්වයෙන් පැවැත්වෙන ගාල්ල දිස්ත්‍රික් සම්බන්ධීකරණ කමිටුවට ද මෙම ගැටලුව ඉදිරිපත් කරන බවද කියා සිටියේය.
 
නගරාධිපතිවරයාගේ ප්‍රකාශයෙන් පසුව විරෝධතාකරුවෝ විසිර ගියහ.