රොමේෂ් මධුෂංඛ

මුලතිව් ගුරුකන්ද පුරාණ රජමහා විහාරයේ දෙපාර්ශවයක් අතර ඇතිවූ සාමය කඩවීමක් සම්බන්ධයෙන් මුලතිව් අධිකරණයේ දී ගොනු කර ඇති නඩුව අද (26) කැඳවු අවස්ථාවේදී නඩුව ලබන මාර්තු 15 වැනිදා දක්වා කල්දැමීමට මුලතිව් මහෙස්ත්‍රාත් එස්. ලෙනින්කුමාර් මහතා නියෝග කළේය.

පසුගිය පෙබරවාරි 12 වැනි දා පුරාවිද්‍යා කොමසාරිස් ජනරාල් මහාචාර්ය පී.බී. මණ්ඩාවල මහතා විසින් මුලතිව් ගුරුකන්ද පුරාණ රජමහාවිහාර භූමිය සම්බන්ධයෙන් මුලතිව් අධිකරණයට ඉදිරිපත් කරන ලද වාර්තාව පරිවර්තනය නොකොර ඇති හෙයින් අදාල වාර්තාව පරිවර්තනය කර  මාර්තු මස 15 වැනි දා වන විට නඩු තීන්දුව ලබා දිය හැකි බවට මුලතිව් මහෙස්ත්‍රාත් එස්. ලෙනින් කුමාර් මහතා දැනුම් දුන් බවට මුලතිව් ගුරුකන්ද පුරාණ රජමහා විහාර පාර්ශවය වෙනුවෙන් පෙනී සිටි නීතිඥ රෝහණ තල්පාවිල මහතා කියා සිටියේය.

එමෙන්ම ලබන මාර්තු 15 වැනි දා දක්වා ගුරුකන්ද පුරාණ රජමහා විහාරයේ කිසිදු ඉදිකිරීමක් සිදු නොකරන ලෙසටද මුලතිව් මහේස්ත්‍රාත්වරයා විසින් විහාරාධිපති කොළඹ මේධාලංකාරකිත්ති හිමියන්ට දැනුම් දෙනු ලැබීය.

පෙබරවාරී 12 වැනි දා මුලතිව් ගුරුකන්ද රජමහා විහාර භූමිය සම්බන්ධයෙන් පුරාවිද්‍යා අධ්‍යක්ෂ ජනරාල්වරයාගෙන් වාර්තාවක් කැඳවා තිබිණි.  ඒ අනුව පුරාවිද්‍යා අධ්‍යක්ෂක ජනරාල් මහාචාර්ය පී.බී.මණ්ඩාවල මහතා විසින් මුලතිව් අධිකරණයේදී පෙනී සිටමින් අදාල වාර්තාව ඉදිරිපත් කරමින් මෙසේ පැවසීය.

මුලතිව් නයාරු ගුරුකන්ද පුරාණ රජමහා විහාරය පුරාවිද්‍යා පනත මගින් නියාමනය වන පුරාවිද්‍යා ස්ථානයක් බවටත් ගුරුකන්ද රජමහා විහාරය පවතින ස්ථානයේ මුලතිව් කෝකිලායි මාර්ගය දෙපසම මැනුම්ගත කරන ලද පුරාවිද්‍යා ස්මාර්ක සහිත ප්‍රදේශයක් වන බවටත්ය.

කෙසේ වෙතත් මේ වන විට මුලතිව් අධිකරණයේ ගුරුකන්ද රජමහා විහාරය සම්බන්ධයෙන් මුලතිව් පොලීසිය මගින් නඩු දෙකක් ගොනු කර ඇති අතර ඉන් අපරාධ නඩු විධාන සංග්‍රහ පනතේ 81 වගන්තිය යටතේ පාර්ශවයන් දෙකක් අතර සාමය කඩවීම වළක්වාලීමට බැඳුම්කරයකට අත්සන් කළ යුතුද නැද්ද සම්බන්ධයෙන් වූ නඩුව අද (26)  විභාගයට ගැණුනු අතර, පුරා විද්‍යා භූමියකට ඇතුළු වී ස්වාමීන් වහන්සේට බැන තර්ජනය කර පුරාවිද්‍යා භූමියේ කැණීමක් කළ බවට වූ බී වාර්තාව දෙවන නඩුව වෙයි.

පසුගිය ජනවාරී 14 වැනි දා ගුරුකන්ද පුරාණ රජමහා විහාර භූමියට අනවසරයෙන් පිරිසක් ඇතුල් වී මුල් ගලක් තැබීමකට සැරසීම නිසා ඇති වූ නොසන්සුන්තාවයක් හේතුවෙන් මුලතිව් පොලීසිය විසින් අදාල නඩු ගොනු කර තිබිණි.