( තිළිණි ද සිල්වා )

හිටපු ආරක්ෂක ලේකම් හේමසිරි ප්‍රනාන්දු මහතාට වත්මන් රජයේ  ආයතනවල සිදුව ඇතැයි කියන දූෂණ වංචා සෙවිමේ ජනාධිපති පරීක්ෂණ කොමිෂන් සභාව හමුවේ ලබන සිකුරාදා (18) පෙනි සිටින්නැයි දන්වමින් එම කොමිසම විසින් නොතීසි නිකුත් කරනු ලැබ ඇත.

හේමසිරි ප්‍රනාන්දු මහතා මහජන බැංකුවේ සභාපතිවරයාව සිටි කාලයේදී එම බැංකුවේ ඩිජිටල්කරණ ව්‍යාපෘතියට පරිගණක දෘඩාංග මිලදී ගැනීමේදී මූල්‍ය අක්‍රමිකතා සිදුව ඇතැයි කියමින් මහජන බැංකු සේවක සංගමය කළ පැමිණිල්ලකට අදාළ විභාගයට සාක්කි ලබා ගැනීම සදහා මෙම නොතීසිය  නිකුත් කර ඇත.

මේ වන විට හේමසිරි ප්‍රනාන්දු මහතාට රක්ෂිත බන්ධනාගාර ගතව සිටින බැවින් ජනාධිපති කොමිසමේ පොලිස් ඒකකයේ නිලධාරීන් විසින්  එම නොතීසිය බන්ධනාගාර කොමසාරිස් ජනරාල්වරයා මාර්ගයෙන් අද (15) දිනයේ ඒ මහතා වෙත බාර දෙන ලදී.

ඒ අනුව හේමසිරි ප්‍රනාන්දු මහතාට ලබන සිකුරාදා (18) පෙරවරු 9.30ට හේමසිරි ප්‍රනාන්දු මහතාට කොමිෂන් සභාව හමුවේ පෙනී සිට සාක්කි ලබා දෙන ලෙස දැනුම් දී ඇති බව ජනාධිපති කොමිෂන් සභාවේ ප්‍රකාශකයෙකු සඳහන් කළේය.

මහජන බැංකුවේ සභාපතිවරයා ලෙස හේමසිරි ප්‍රනාන්දු මහතා කටයුතු කළ 2016- 2017 කාලය තුළ දී මහජන බැංකුවේ ඩිජිටල්කරණ ව්‍යපෘති සදහා ටෙන්ඩර් පටිපාටියකින් බැහැරව  පරිගණක දෘඩාංග ලබාගැනීම සිදුව ඇතැයි මහජන බැංකු සේවක සංගමය සිය පැමිණිල්ලෙන් කියා සිටී.