(නාලක ජේ හෙට්ටිආරච්චි සහ සම්පත් ප්‍රියනන්දන)  

බලන්ගොඩ මොරහැර උඩවෙල සණස බැංකුවේ තැම්පත්කරුවන්ගේ රුපියල්  කෝටි  15 ක  ආසන්න  මුදලක්  වංචා   කර ඇතැයි   චෝදනා  ලැබ සිටින  එම  බැංකුවේ හිටපු  කළමනාකාරිණිය අගෝස්තු 20 වැනිදා දක්වා  රක්ෂිත බන්ධනාගාර ගත කරන ලෙස බලන්ගොඩ මහෙස්ත්‍රාත් ජයරුවන් දිසානායක මහතා අද (7) නියෝග කළේය.
 

මේ අතර  බැංකුවේ තැම්පතු මුදල් සම්බන්දයෙන්   විගණන  වාර්තාවක් ද අධිකරණයට ඉදිරිපත් කරන  ලෙස  මහෙස්ත්‍රාත් නියෝග කළේය.

මෙලෙස රක්ෂිත බන්ධනාගාර ගත   කරන  ලද්දේ   බලන්ගොඩ  ඇල්ලේපොල ප්‍රදේශයේ  පදිංචි   ඒ.කේ.මංගලිකා චිත්‍රන්ගනි  කරුණාරත්න  නැමැති  48 හැවිරිදි  කාන්තාවකි.

බලන්ගොඩ මොරහැල  උඩවෙල  සණස බැංකුවෙන්  රුපියල්  කෝටි 15කට  ආසන්න  මුදලක්  රැගෙන පලා  ගිය  බව කියන  එහි  හිටපු  කළමනාකාරිණිය  වන ඇය  මාස  8 කට  පසු බලන්ගොඩ පොලිසිය  මගින් ඊයේ (06) සවස  අත්අඩංගුවට ගෙන පරීක්ෂණ කටයුතු සඳහා  පින්නවල පොලිසිය වෙත  බාරදිමෙන්   පසු  ඇයගෙන්  ප්‍රකාශ සටහන්  කර ගෙන  පින්නවල පොලිසිය විසින්  අද (7) බලන්ගොඩ මහෙස්ත්‍රාත්  හමුවට ඉදිරිපත් කිරිමෙන්  පසු  මෙලෙස  රක්ෂිත බන්ධනාගාර ගත කෙරිණි.