(එෆ්.අස්ලම්)

ජාතික ජනතා බලවේගයේ ජනපති අපේක්ෂක අනුර කුමාර දිසානායකට තම සහාය පලකර තිබෙන බවට ජනතා විමුක්ති පෙරමුණේ ප්‍රචාරක ලේකම් විජිත හේරත් සිදුකළ ප්‍රකාශය පදනම් විරහිත සාවධ්‍ය ප්‍රකාශයක් යැයි දෙමළ ජාතික සන්ධානයේ ප්ලොට් හා ටෙලෝ පක්ෂ අවධාරණය කර සිටීයි.

දෙමළ ජාතික සන්ධානය නියෝජනය කරන පක්ෂ වශයෙන් පෞද්ගලිකව සියළුම ප්‍රධාන පක්ෂවල ජනපති අපේක්ෂකයින් හමුවූ බවත් මේ තාක් කිසිදු අපේක්ෂකයකුට සහාය පල කර නැති බවත් දෙමළ ජාතික සන්ධානය වශයෙන් දෙමළ ජනතාවගේ ගැටළු විසදීම කෙරෙහි උනන්දුවක් විශ්වාසයක් දක්වන අපේක්ෂකයකු හට සහාය දක්වනු ඇති බවත් ප්ලොට් හා ටෙලෝ පක්ෂවල නායකයින් සදහන් කරයි.

ජනතා විමුක්ති පෙරමුණේ ප්‍රචාරක ලේකම් පසුගියදා කොළඹ දී කැඳවූ මාධ්‍ය හමුවකදී දෙමළ ජාතික සන්ධානයේ හවුල්කාර පක්ෂ ද්විත්වයම ජාතික ජනතා බලවේගයේ නායක අනුර කුමාර දිසානායකට සහාය දක්වා ඇති බවට කළ ප්‍රකාශය පිළිබඳ කරන ලද අද (13) විමසුමකදී මොවූහු මේ බව කියා සිටියේය.

මේ සම්බන්ධයෙන් ලංකාදීපය වෙත වැඩිදුරටත් සඳහන් කරමින් ප්ලොට් සංවිධානයේ නායක පාර්ලිමේන්තු මන්ත්‍රී ධර්මලිංගම් සිද්ධාථන් මහතා මෙසේ කියා සිටියේය.

අපි දෙමළ ජාතික සන්ධානයේ හවුල්කාර පක්ෂයක් වශයෙන් ප්ලොට් සංවිධානය ගෝඨාභය රාජපක්ෂ,සජිත් ප්‍රේමදාස, අනුර කුමාර දිසානායක, රනිල් වික්‍රමසිංහ යන ජනපතිවරණ අපේක්ෂකයින් සහ දේශපාලන නායකයින් හමුවුණා. අපි අපේ දෙමළ ජනතාවගේ ගැටළු ඉල්ලීම් සහ ඔවුන්ගේ අවශ්‍යතා ගැන ඒ අපේක්ෂකයින් සමඟ සාකච්ඡා කළා. ඒත් මේ වෙනකල් සහාය ලබා දෙන්නෙ කාටද කියල අපි තීරණයක් අරගෙන නැහැ. අපි ඒ සාකච්ඡා ගැන අපේ අවසන් තීරණය ගැනීම සඳහා රැස්වන දෙමළ ජාතික සන්ධාන සම්බන්ධීකරණ කමිටු රැස්වීමේදී කතා කරනවා.

ඒ අනුව දෙමළ ජාතික සන්ධානය සියළු පක්ෂවල එකඟත්වය පරිදි දෙමළ ජනතාවගේ ගැටළුවට විසඳුම් දෙන බවට විශ්වාස කළ හැකි ජනාධිපති අපේක්ෂකයා හට සහාය හිමිවනු ඇත. ජනතා විමුක්ති පෙරමුණේ ප්‍රචාරක ලේකම් විජිත හේරත් පවසන පරිදි අනුර කුමාර දිසානායකට් අපි නිල නොවන මට්ටමින් හෝ සහාය පලකරල නැහැ යැයිද කියා සිටියේය.

මේ අතර ජනතා විමුක්ති පෙරමුණේ ප්‍රචාරක ලේකම් විජිත හේරත් මහතාගේ ප්‍රකාශය පිළිබද ටෙලෝ සංවිධානයේ නායක පාර්ලිමේන්තු මන්ත්‍රී සෙල්වම් අඩෙයිකලනාදන් මහතා මෙසේ සඳහන් කළේය.

අපි පාර්ලිමේන්තු දිනවල දී පක්ෂ විපක්ෂ මන්ත්‍රීවරුන් සමග සාකච්ඡා කරනවා. ජනතා විමුක්ති පෙරමුණේ පිරිවරත් හමුවෙලා රටේ දේශපාලන තත්වය ගැන සහ ජනාධිපතිවරණය ගැන සාකච්ඡා කළා. එය නිල සාකච්ඡාවක් නෙවෙයි.ඒ වගේ කොච්චර මන්ත්‍රීවරුන් හමුවෙනවද. විජිත හේරත් ටෙලෝ හා ප්ලොට් පක්ෂ අනුර කුමාරගේ නායකත්වයට සහාය පලකලා කියල කියන්නේ දේශපාලන වාසියක් ගන්නයි. අපි එහෙම කිසිම අපේක්ෂකයෙක්ට සහාය  පළ කරලා නෑ. අපේ අන්තිම තීරණය දෙමළ ජාතික සන්ධානයේ පොදු තීරණය වශයෙන් ප්‍රකාශ කරනවා.