(සිතුම් චතුරංග)         

හිටපු එල්.ටි.ටි.ඊ නායකයකු වූ මියගිය තිලීපන්  සිහිකරමින් යාපනය විශ්ව විද්‍යාලයේ  සැමරුම් උත්සවයක් සංවිධානය කරන බවට පොලිසියට ලද තොරතුරක් අනුව යාපනය විශ්ව විද්‍යාලය ඉදිරිපිට අද (25) විශේෂ පොලිස් ආරක්ෂාවක් යෙදවීමත් සමඟ සිසුන් හා පොලිසිය අතර උණුසුම් තත්වයක්  හට ගැණිනි.

විශ්ව විද්‍යාලයේ බහුතරයක් සිසුන් කළු පැහැති ඇඳුමකින් සැරසී විශ්ව විද්‍යාලයට පැමිණ සිටි අතර හිටපු එල්.ටි.ටි.ඊ නායකයකු වූ ත්‍යාගදීපන් තිලීපන්ගේ 33 වැනි ගුණ සැමරුම් උත්සවය දින දෙකක් පැවැත්වීමට සූදානම් කර ඇතැයි  ලද තොරතුර අනුව පොලිස් ආරක්ෂාව යෙදවීමට කටයුතු කර තිබේ.

ආරක්ෂාව යොදවා සිටි පොලිස් නිලධාරීන් සිසුන් වෙත පවසා සිටියේ තිලීපන් සැමරුම් සිදුකිරීම අත්හිටුවමින් යාපනය මහේස්ත්‍රාත් අධිකරණය තහනම් නියෝගයක් ලබාදී ඇති බැවින් අධිකරණ නියෝගයන්ට අවනතව අධ්‍යයනය කටයුතු සිදුකරන ලෙසයි.

පොලිසියේ ප්‍රකාශයට සිසුන් විරෝධය පලකළ අතර එහිදී ඔවුන් පවසා සිටියේ විශ්ව විද්‍යාලයට තමන් කැමති ආකාරයේ ඇඳුමකින් සැරසී පැමිණිමට සිසුන්ට අයිතිය ඇති බවත් විශ්ව විද්‍යාලය තුළ සිසුන්ගේ ක්‍රියාවන් සඳහා වලට බලපෑම් නොකරන ලෙසත් පවසා තිබේ. එම ප්‍රකාශයත් සමඟ සිසුන් පොලිසිය වෙත විරෝධතාවය පළ කිරීමටත් සමඟ උණුසුම් තත්වයක් ඇති වූ බව පොලිසිය පවසයි.

අධිකරණ නියෝග පිළිබඳ සිසුන් දැනුවත් කිරීමෙන් පසුව විශ්ව විද්‍යාලය ඉදිරිපිට සිටි පොලිසිය ඉවත් කිරීමට කටයුතු කළ බවද යාපනය පොලිසිය වැඩිදුරටත් පැවසීය.