(අජිත්ලාල් ශාන්තඋදය සහ ජයන්ත නානායක්කාර)

දෙමළ ඩයස්පෝරාවේ උවමනාවන් ඉටුකරන බවට අගමැති වී කළ මුල් කතාවෙන් පොරොන්දු දුන් එංගලන්ත නව අගමැති බොරිස් ජොන්සන් මහතාගේ ප‍්‍රකාශයට විරෝධය පා පොදුරාජ්‍ය මණ්ඩලයෙන් සහ එක්සත් ජාතීන්ගේ සංවිධානයෙන් ලංකාව වහා ඉවත්විය යුතුයැයි ආචාර්ය  ඕමල්පේ සෝභිත හිමියෝ පැවසූහ.

ඇඹිලිපිටියේ අද (17) පැවති මාධ්‍ය හමුවකදී උන්වහන්සේ මේ බව පැවසූහ. එහිදී සෝභිත හිමියෝ මෙසේ ද කීය.

පසුගියදා එංගලන්තයේ පැවති මහ මැතිවරණයෙන් ජයගත්තේ බොරිස් ජොන්සන් මහතාය. ඔහු ජයග‍්‍රහණය ලබා අගමැතිවරයා ලෙස දිවුරුම් දීලා කළ පළමු කතාව අහපු අපට බොරිස් ජොන්සන් මහතාගේ මෝහ මූලික ප‍්‍රතිපත්තිය පිළිබඳව නම් කතා කරන්න වෙනවා.

‘වනක්කම්’ කියලා සිය කතාව අරඹමින් ඔහු එංගන්තයේ වෙසෙන දෙමළ ජනතාවට සිය කෘතවේදීත්වය පිරිනමනවා. ඒ එක්කම ඔහු කියනවා,ශ‍්‍රී ලංකාවේ සාමය සංහිඳියාව ඇතිකරන්න කැප වෙනවා, දෙමළ ජනතාවගේ ප‍්‍රශ්නය විසඳනවා කියලත්.

යුරෝපා සංගමයෙන් ඉවත්වීම සඳහා මේ දිනවල එංගලන්තයේ කතා බහක් තියනවා. ඒකට කියන්නේ බ්‍රෙක්සිට් කියලා. ඔහු කියනවා බ්‍රෙක්සිට් ක‍්‍රියාත්මක වුණාට පස්සේ ලංකාවේ ප‍්‍රශ්න වලට අතගහන්න තවත් පහසුකම් ඇතිවෙනවා කියලා. ඔහු කතාව අවසන් කරන්නේත් නන්රි කියලා දෙමළ බසින් ස්තුතියි කියලා. ඔහු එංගන්තයේ අගමැතිකමට ද පත්වුණේ ලංකාවේ අගමැතිකමට ද කියලා ඔහුගේ කතාව ඇහුවාම අපට හිතෙන්නේ.

ලංකාවේ ප‍්‍රශ්නය ගැන බොරිස් ජොන්සන් මහත්තයාට මේ තරම් තියන කැක්කුම මොකක්ද කියලා අපිට ප‍්‍රශ්නයක් තියනවා.  තවමත් ශ‍්‍රී ලංකාව බි‍්‍රතාන්‍යයේ කොලනියක්, යටත් විජිතයක් කියලා එක අතකින් ඔහු හිතාගෙන ඉන්නවාද දන්නේ නෑ. අනෙක් කාරණය තමයි ද්‍රවිඩ පිරිසත් එක්ක ඇතිවෙලා තියන සම්බන්ධතාව.

විකීපීඩියා මාධ්‍ය තොරතුරු අනුව එංගලන්තයේ දෙමළ කතාකරන ජනතාව 1% ක් වත් නෑ. 0.02% ක් වගේ ප‍්‍රමාණයක් තමයි වාර්තා වෙන්නේ. සිංහල කතා කරන, සිංහල සම්බවයක් ඇති ඇත්තෝ ඔයිට වඩා විශාල පිරිසක් එංගලන්තයේ ඉන්නවා. ඒ විතරක් නෙවෙයි ශ‍්‍රී ලාංකික සම්භවයක් ඇති මුස්ලිම් ජනතාවත් විශාල පිරිසක් ඉන්නවා. මේ විශාල පිරිස අතර දෙමළ ජනතාවට ප‍්‍රමුඛස්ථානයක් දුන්නේ ඇයි.

ශ‍්‍රී ලංකාව දෙකඩ කරන්න පෝර සපයන දෙමළ ඩයස්පෝරාව මේ පිටුපස ඉන්නවා කියලා අපට සැකයක් මතුවෙනවා. එහෙම නම් බොරිස් ජොන්සන් මහත්තයාගේ මැතිවරණ ව්‍යාපාරයට දෙමළ ඩයස්පෝරාවෙන් උදව් ලැබුණ ද? දෙමළ ඩයස් පෝරාව කෝටි ගණනින් සල්ලි වියදම් කළා ද? කියලා අපට සාධාරණ සැකයක් ඇති වෙනවා. ප‍්‍රභාකරන්ගේ ත‍්‍රස්තවාදය යුදමය වශයෙන් පරාජය කරන්න කටයුතු කළාට එහි අලගිය,මුලගිය තැන් විනාශ කරන්න පාලකයෝ ක‍්‍රියා කළේ නෑ. ඒක තමයි අපේ පාලකයෝ කරගත්ත මෝඩකම.

විශේෂයෙන් මේ ත‍්‍රස්තවාදය යළිත් අවුලවන්න විග්නේශ්වරන් වැනි මෝහ මූලික දේශපාලනඥයින් දේශීය වශයෙන් කැස කවද්දී විශාල වශයෙන් දෙමළ ඩයස්පෝරාව ක‍්‍රියාත්මක් වෙනවා. එදා කොල්ලකා ගත්තු සල්ලි රත්ත‍්‍රං නැව් ගණනින් කෝටි ගණනින් තියනවා කියලයි අපිට ලැබෙන තොරතුරු. හැබැයි ඉතිං අපේ දේශපාලනඥයෝ තමයි අපිට කිව්වේ මේවගේ විශාල ව්‍යාපර තිබුණා කියලා. කෙසේ වෙතත් අති මහත් ධනස්කන්ධයක් දෙමළ ඩයස් පෝරාව සතුව තියනවා කියන එක පැහැදිලියි.

දෙමළ ඩයස් පෝරාව ජොන්සන් මහත්තයාගේ මැතිවරණ ව්‍යාපාරයට වියදම් කළා නම් ඔහුට දෙමළ ඩයස්පෝරාවේ ත‍්‍රස්තවාදී ඉල්ලීම් ඉටු කරන්න වෙනවා. මේක බරපතල කරුණක්. ඒ නිසා අපි ජනාධිපතිතුමාට මතක් කරනවා ජොන්සන් මහත්තයාගේ මේ ක‍්‍රියාවට එරෙහිව ක‍්‍රියාත්මක විය යුතුයි.

එංගලන්තයේ ශ‍්‍රී ලංකා තානාපති කාර්යාලය,ශ‍්‍රී ලංකාවේ විදේශ කටයුතු අමාත්‍යාංශය මේවාට ගත්ත පියවර මොකක්ද?.මේ සඳහා කඩිනමින් ප‍්‍රතිචාර අවශ්‍යයි. ඒ නිසා ශ‍්‍රීලංකාව වහාම පොදුරාජ්‍ය මණ්ඩලයෙන් ඉවත් විය යුතුයි. පොදු රාජ්‍ය මණ්ඩලය කියන්නේ කැඩී බිඳීයන්නට යන එංගලන්තය එසේ නොවන්නට ඉඩනොදී පවත්වාගෙන යන්නට හදන සංවිධානයක් මිස වෙන මොකවත් නෙවෙයි.

පැවති යටත් විජිතවාදය පවත්වාගෙන යන්න ගන්න අසාර්ථක උත්සාහයකට තමයි පොදුරාජ්‍ය මණ්ඩලය කියන්නේ. දැන්වත් අපි මේ උත්සාහය ව්‍යවර්ථ කළ යුතුයි. ලංකාව එංගන්තයේ යටත් විජිතයක් කියල ජොන්සන් මහත්තයා හිතනවා නම් ඒක සම්පූර්ණයෙන්ම වැරදියි. ශ‍්‍රීලංකාව යනු ස්වෛරී රාජ්‍යයක්. එක්සත් ජාතීන්ගේ සංවිධානයේ එංගන්තයට තියන අයිතියමයි ශ‍්‍රී ලංකාවටත් තියෙන්නේ.

ඒ නිසා ජොන්සන් මහත්තයාගේ මේ ප‍්‍රකාශය තරයේ හෙළා දැකිය යුතුයි. පොදු රාජ්‍ය මණ්ඩල සාමාජිකත්වයෙන් වහා ඉල්ලා අස්විය යුතුයි. ජොන්සන් මහත්තයාගේ ක‍්‍රියා කලාපය ජාත්‍යන්තරයට කියා පෑ යුතුයි. එහෙම කියාපාලා මොහුගේ මේ මෝහ මුලික දුර්ධාන්ත, අදූරදර්ශී වැඩපිළිවෙළ වෙනස් වෙන්න  ඕනෑ. දෙමළ ඩයස්පෝරාවට උවමනා විදියට බොරිස් ජොන්සන් මහතා ක‍්‍රියා නොකළ යුතුයි. ඔබේ දේශපාලනය එංගලන්තයේ කරන්න. ඔබේ දේශපාන ව්‍යාප්තිය ශ‍්‍රී ලංකාවට යොමු කරන්න එපා.

බොරිස් ජොන්සන් මහතා මේ කරගෙන යන්නේ දේශපාලන උප්පරවැට්ටියක්ද, උපක‍්‍රමශීලී වැඩපිළිවෙළක්ද, ශ‍්‍රීලංකාවේ ත‍්‍රස්තවාදය යළි ව්‍යාප්ත කරන්න කටයුතු කරන දෙමළ ඩයස්පෝරාවේ කලූ සල්ලිවලට යට වෙලාද? මොකක්ද මේ දෙගොල්ල අතර තියන සම්බන්ධය කියලා පරීක්‍ෂණයක් කරන්න කියල එංගලන්ත මහාරාජිණියගෙන් සහ එංගන්ත රජයෙන් අපි ඉල්ලා සිටිනවා. අලූත් අගමැතිතුමාගේ මේ මැදිහත්වීම දෙමළ ඩයස්පෝරාවේ උවමනාව මත නෙමෙයිද කියලා අපිට සැකයක් ඇති වෙලා තියනවා.

තීනියාවල පාලිත හිමියන් පසුගියදා කියලා තිබුණා සජිත් පේ‍්‍රමදාස මහත්තයා මේ දිනවල ඉන්නේ ඔහුට ජනාධිපතිවරණයට වියදම් වූ කෝටි 27 ගෙවාගන්න බැරුව ඉන්නේ කියලා. ජනාධිපති අපේක්‍ෂකයෙක් මැතිවරණයට වියදම් කරන තමන්ගේ මුදල්, යාළුවන්ගේ මුදල් වෙනත් ආකාරයකින් ලබාගන්නා මුදල් ජනාධිපතිවුණාම ගෙවනවා කියන ඒක ප‍්‍රශ්නයක් නෙවෙයි කියන වැදගත් පණිවිඩය තමයි මේයින් අදහස් වෙන්නේ.

එතුමාගේ අවාසනවාට තනතුර ලැබුණේ නෑ. ඒ හින්දා මේ ණය ගෙවන්නේ කොහොමද කියලා දුකින් එතුමා ඉන්නවා. ජයග‍්‍රහණය කරපු පැත්තත් මේ හා සමානව හෝ මීටත් වඩා සල්ලි වියදම් කරන්න ඇති කියලා අපිට උපකල්පනය කරන්න පුළුවන්. කොහෙන් කවුරු වියදම් කළත් නැවත මේ සල්ලි නැවත උපයා ගන්නේ කොහොම ද කියන එක තමයි තියන ප‍්‍රශ්නය.

පවතින නිතිමය රාමුව තුළ පෞද්ගලිකව එවන් ධනස්කන්ධයක් උපයා ගැනීමට හැකියාවක් නෑ. එහෙමනම් නීතිවිරෝධී ලෙස මේ ධනය උපයන්න  ඕනෑ. මහා භාණ්ඩාගාරය හරහා පොදු මහජනතාවගේ බදු මුදලින් අවිචාරවත් ආකාරයෙන් මේ මුදල උපයාගන්න  ඕනෑ. සමහර විට මේ මුදල් උපයාගන්න කුඩු ව්‍යාපාර කරන්න පුළුවන්. ඇතැම් වෙලාවට කුඩු ව්‍යාපාරිකයන්ට සහයෝගය දෙන්න පුළුවන්. සල්ලි හොරට අච්චු ගැසීම, භාණ්ඩ හොරට ආනයනය, අපනයනය කන්න දෙන්න පුළුවන්. මේ කෝටි විසිහත තුළ නීතිවිරෝධි කලූ සල්ලි අනන්තවත් ඇති. ජනාධිපතිවරයා වීමෙන් පසු මේ කලූ සල්ලි සුදුකරන්න ක‍්‍රමයක් ඇතිකරන නිසා වෙන්න  ඕනෑ මෙවන් මුදල් දෙන්නේ.

ඒ එක්කම සැකයක් මතුවෙනවා මේ තරම් මුදලක් වැය කරන ඇත්තෝ බලය ලැබුනම නීති විරෝධී ක‍්‍රියාවලට පෙළඹෙනවා කියලා. දැන් ගල්,වැලි,පස් ප‍්‍රවාහනයට බලපත් අවශ්‍ය නෑ. ඒවා හොරෙන් කපන අය අහුවුණේ ප‍්‍රවාහනයේ දී ඒකට බලපත්‍ර නැති කළේ ඒ අය මැතිවරණයට උදව් කළ නිසා කියලා කතාවක් දැන් පැතිර යනවා. සජිත් පේ‍්‍රමදාස මහත්තයත් මේ අත දිග හැරලා වියදම් කරවා ගත්තේ දිනුවොත් එවැනි අයට සහන දෙනවා කියලා පොරොන්දුව ද කියලත් දැන් සැකයක් තියනවා.

මේ කාරණාව උදාහරණයට අරගෙන අපි මැතිවරණ කොමිසමේ සභාපතිට කියනවා ජනාධිපතිවරණයක දී  ඕනෑම අපේක්‍ෂකයකුට වියදම් කළ හැකි මුදලට සීමා පනවන්න කියලා. එය පුද්ගලයාට,සමාජයට ඔරොත්තු දෙන සීමාවක් විය යුතුයි. එහෙම නොවුණොත් මේ මැතිවරණයට ඉදිරිපත් වෙන සෑම කෙනෙක්ම හොරකමට පෙළඹෙනවා.