(නිමන්ති රණසිංහ)
 
 
ශ්‍රී ලංකා පොදුජන පෙරමුණු ජනාධිපතිධූර අපේක්ෂක ගෝඨාභය රාජපක්ෂ මහතාට අපහාසයක් වන අත්පත්‍රිකා බෙදා හැරියේ යැයි කියන පුද්ගලයින් දෙදෙනාට එක් අයකුට රුපියල් ලක්ෂ 2 බැගින් වූ ශරීර ඇප දෙකක් මත මුදා හැරීමට නුගේගොඩ මහේස්ත්‍රාත් එච්. යූ. කේ. පැල්පොල මහතා අද (15) නියෝග කළේය.
 
මෙලෙස ඇප මත මුදාහරිනු ලැබුවේ කෝට්ටේ නගර සභාවේ හිටපු නාගරික මන්ත්‍රීවරයකු මෙන්ම රාජ්‍ය අමාත්‍ය හර්ෂ ද සිල්වා මහතාගේ සම්බන්ධිකරණ නිලධාරීයකු වන උඩහමුල්ල පදිංචි ජයන්ත හේමසිරි සහ සුනිල් ප්‍රනාන්දු යන අයවලුන්ය.
 
ජනාධිපතිවරණය පැවැත්වෙන දින සහ ආසන්න දිනයන් හිදී කිසිදු දේශපාලන කාර්යයකට නො නියැලෙන ලෙසත් එලෙස වූ බවට පැමිණිල්ලක් ලදහොත් ඇප අවලංගු කර රක්ෂිත බන්ධනාගාර ගත කරන බවටත් සැකකරුවන් දෙදෙනාට තරයේ අවවාද කළ මහේස්ත්‍රාත්වරයා ඔවුන් ඇප මත මුදා හරිනු ලැබුවේය.
 
ජනාධිපතිධූර අපේක්ෂක ගෝඨාභය රාජපක්ෂ මහතාට අපහාසයක් වන අයුරින් මුද්‍රණය කර සකස් කරන ලද අත්පත්‍රිකා තොගයක්, පුද්ගලයින් කිහිප දෙනෙකු විසින් මිරිහාන විජේසේකර මාවතේදී බෙදා හරිමින් සිටින බවට පොලිස් හදිසි ඇමතුම් ඒකකයට ලද තොරතුරකට අනුව ඉකුත් 10 වැනිදා මිරිහාන පොලීසිය මෙම සැකකරුවන් දෙදෙනා අත්අඩංගුවට ගෙන තිබිණ.