( දිල්රුක්ෂි ග්‍රේරු)

ඇඳිරිනීතිය පවතින අවස්ථාවේදී   දඩයමේ ගිය  ගුරුවරයෙක්, හිටපු ප්‍රාදේශිය දේශපාලනඥයෙක්, යුද හමුදා සෙබළෙක් ඇතුළු සිව් දෙනකු  ගෝන මස් හා ගිනි අවියක් සමඟ  ලග්ගල පල්ලේගම රාවණාගම ප්‍රදේශයේදී  අද  (31) අත්අඩංගුවට ගත් බව ලග්ගල අඩවි වන කාර්යාලය කියයි.

ඔවුන් සතුව තිබී  ගෝන මස් කිලෝ 6 ක්, තලගොයි මස් කිලෝ 2 සහ ගිනි අවියක් වන අඩවි නිලධාරීන් බාරයට ගෙන තිබේ.

අත්අඩංගුවට ගත් මෙම  සැකකරුවන්ගෙන් ගුරුවරයා එම ප්‍රදේශයේම පාසලක ඉගැන්වීම් කරන පුද්ගලයකු බවත්  යුද හමුදා සෙබළා නොච්චියාගම ප්‍රදේශයේ  යුද හමුදා කඳවුරක සේවය කරන එම ගම්මානයේ පදිංචි  යුද හමුදා සෙබළෙක් බවත් අනාවරණය වී තිබේ.
 
හිටපු ප්‍රාදේශිය දේශපාලනඥයා පසුගිය කාලයේදී ප්‍රදේශිය සභාවේ සිටි අයකු වන අතර අනෙක් පුද්ගලයා  ලග්ගල  ප්‍රදේශයේම පදිංචි අයෙකි.
 
ඇඳිරිනීතිය පවතින අවස්ථාවේදී මෙවැනි ජාවාරමක් සිදු වන බව ලග්ගල අඩවි වන කාර්යාලයට ලැබුණු තොරතුක් මත විල්ගමුව අඩවි වන කාර්යාල නිලධාරීන් හා ඒකාබද්ධව  කළ වැටලීමකදී මොවුන් සිව් දෙනා අත්අඩංගුට ගත් බව අඩවි වන කාර්යාලය සඳහන් කළේය.
 
රටේ මෙතරම් අවදානම් තත්තවයක්  පවතිද්දි  ඇදිරිනීතිය පනවා ඇති අවස්ථාවන්හිදී මෙවැනි ක්‍රියාවන් සිදු කිරීමට සම්බන්ධයෙන් ඔවුන්ට දැඩි දඩුවම් පැනවීමට කටයුතු කරන බව ලග්ගල වන සත්ව අඩවි ආරක්ෂක ස්ථාන භාර නිලධාරී  එස්.ඩබ්ලිව් සංජීව මහතා  පැවසීය.