බ්‍රිතාන්‍ය රජය නව එන්නත් මධ්‍යස්ථානයක් ඉදි කිරීම සඳහා පවුම් මිලියන 93ක (ඇමෙරිකානු මිලියන 112ක) අමතර මුදලක් ආයෝජනය කරන බව එරට ව්‍යාපාර, බලශක්ති සහ කාර්මික උපායමාර්ග දෙපාර්තමේන්තුව පෙරේදා (17) නිවේදනය කළේය.
  
මෙම නව එන්නත් මධ්‍යස්ථානය විවෘත කිරීමට සැලසුම් කර ඇත්තේ 2022 වසරේදී ය. එහෙත් නව ආයෝජනයත් සමඟ එය ලබන වසරේ ගිම්හාන ඍතුව වනවිට ආරම්භ කිරීමේ අරමුණ ඇතිව මෙලෙස අමතර මුදලක් ආයෝජනය කළ බව එම දෙපාර්තමේන්තුව සඳහන් කළේය.
 
‘‘නව ආයෝජනයත් සමඟ සැලසුම් කළ දිනට වසරකට කලින් එන්නත් මධ්‍යස්ථානය විවෘත කිරීමට හැකිවේවි’’ යැයි එම දෙපාර්තමේන්තුව සඳහන් කළේය.
 
‘‘එන්නත් නිෂ්පාදන සහ නවෝත්පාදන මධ්‍යස්ථානය’’ යනුවෙන් නම් කර ඇති මෙම නව එන්නත් මධ්‍යස්ථානය ඉදි කිරීම් කටයුතු මේ වනවිට ආරම්භ කර ඇත. නව කොරෝනා වයිරසය හෙවත් ‘කොවිඩ්-19’ වසංගතයට එරෙහිව එන්නතක් නිපදවීමේ අරමුණ ඇතිව මෙම මධ්‍යස්ථානය ඉදි කෙරේ. එය එන්නතක් නිපදවීමේ බ්‍රිතාන්‍ය ආණ්ඩුවේ වැඩසටහනේ එක් ප්‍රධාන අංගයකි.
බ්‍රිතාන්‍යයේ විශාල පිරිසකට එන්නත් දීමේ බලාපොරොත්තුව ඇති ව මෙම මධ්‍යස්ථානය ස්ථාපිත කෙරෙන බව ද එම දෙපාර්තමේන්තුව සඳහන් කළේය.
 
රොයිටර්ස්
 
055