(නිමන්ති රණසිංහ)

මාලිගාවත්ත ජුම්මා මස්ජිඞ් පාරේ නිවසක් අසල මුදල් බෙදා දීමේ සිද්ධියකදී තෙරපීමෙන් මිය ගිය කාන්තාවන් තිදෙනා සම්බන්ධව මහේස්ත‍්‍රාත් පරීක්ෂණය සිදුකිරීම සදහා කොළඹ අතිරේක මහේස්ත‍්‍රාත් කාංචනා නේරංජලා ද සිල්වා මහත්මිය මේ වන විට එම ස්ථානය වෙත ගොස් ඇත.
 
සිද්ධියට අදාළ මහේස්ත‍්‍රාත් පරීක්ෂණය සිදුකර මරණයටන්ට අදාළ පශ්චාත් මරණ පරීක්ණය සිදුකිරීම සදහා මාලිගාවත්ත පොලීසිය අධිකරණයෙන් කළ ඉල්ලීමක් සැලකිල්ලට ගත් මහේස්ත‍්‍රාත්වරිය මේ වන විට එම ස්ථානය වෙත ගොස් තිබේ.

මාලිගාවත්ත ජුම්මා මස්ජිඞ් පල්ලිය අසල නිවසක පිරිසක් රැස්ව සිටින බවත් එය අසල්වාසීන්ට හිරිහැරයක් බවත් සදහන් කරමින් පොලිස් හදිසි ඇමතුම් අංකය වන 119 දුරකතනය වෙත ලද පණීවිඩයකට අනුව සෝදිසියක් සදහා පිටත්ව ගොස් තිබූ බවත්, එහිදී එම ස්ථානයේ රැදී සිටි පිරිස අධික වීම හේතුවෙන් තෙරපීමකට ලක්ව කාන්තාවන් තිදෙනකු මියගොස් ඇති බවත් මාලිගාවත්ත පොලීසිය අධිකරණයට කරුණු වාර්තා කර තිබිණී.
 
යම් පුද්ගලයකු, නෝම්බි උපවාසය හේතුවෙන් ඇදිරි නිතිය ක්‍රියාත්මක කාලසීමාවේදී නිසි අවසරයක් තොරව නිරෝධායන නිති උල්ලංඝණය වන අයුරින් මෙම ස්ථානයේ දී මුදල් බෙදා දී ඇති බව ද මාලිගාවත්ත පොලීසිය අධිකරණයට කරුණු ඉදිරිපත් කර ඇත.

මෙම සිද්ධියෙන් මිය ගොස් ඇත්තේ, ලක්සිත සෙවණ මාලිගාවත්ත කොළඹ 10 පදිංචිව සිටි උමා අකිලා (62), ජුම්මා මස්ජිඞ් පෙදෙස, මාලිගාවත්ත පදිංචිව සිටි මොහොමඞ් ෆවුසියා නීසා (59) සහ ලක්සිත සෙවණ මාලිගාවත්ත පදිංචිව සිටි මොහොමඞ් ෆරීනා මුසම්මිල් (68) නැමැති කාන්තාවන් බවද මාලිගාවත්ත පොලිසිය අධිකරණයට කරුණු වාර්තා කර තිබිණ.