හොංකොං හි කොරෝනා ආසාදිතයන් සංඛ්‍යාව ඉහළ යෑමත් සමඟ සියලු පාසල් වසා දැමීමට බලධාරීන් තීරණය කර තිබේ. රෝගය දේශීයව සම්ප්‍රේෂණ වීම ඉහළ ගොස් ඇතැයි ඔවුහු පවසති.

හොංකොං නාගරික බල ප්‍රදේශයෙන් අද (10) නව ආසාදිතයින් 38 ක් වාර්තා වූ අතර ඊයේ 42 ක් වාර්තා වී තිබිණි.

කොරෝනා ව්‍යාප්ත වීමට පටන්ගත් ජනවාරි මාසයේ සිට මේ දක්වා හොංකොං නගරයෙන් වාර්තා වී ඇති මුළු ආසාදිතයින් සංඛ්‍යාව 1,404 ක් වන අතර රෝගීන් 07දෙනකු මියගොස් තිබේ.

පසුගිය දින කිහිපයේ වාර්තා වූ රෝගීන් අතර සිසුන් සහ දෙමාපියන් කිහිපදෙනකු සිටින බැවින් පාසැල් වසා දැමීමට තීරණය කළ බව අධ්‍යාපන ලේකම් කෙවින් යූං පැවසීය.

නැවතත් මාර්ග ගත ඉගෙනුමට මාරුවීමට සිදුවීම සම්බන්ධව සිසුන් සහ දෙමාපියන් කළකිරීමට පත්ව සිටින බව සඳහන් වේ.

අඩු ආදායම්ලාභී පවුල් බොහොමයක් සිටින බැවින් ඔවුහු මාර්ග ගත ඉගැන්වීමේදී අපහසුතාවයට ලක්වෙති.

කෙසේවුවද නිවාඩුව ආරම්භ වීමට ඇත්තේ සතියක පමණ කාලයක් බැවින් මෙවර අධ්‍යාපනයට එතරම් බලපෑමක් සිදුනොවනු ඇතැයි ද පැවසේ.

(රොයිටර් පුවත් ඇසුරිණි - 085)