මොස්කව්හිදීය (රොයිටර්)
 
රුසියානු අධිකරණයක් අද (12) යුක්රේන මාධ්‍යවේදියකුට වසර 12ක සිර දඬුවමක් නියම කළේය.
 
යුක්රේනය වෙනුවෙන් චරපුරුෂ සේවයේ යෙදුණු  බවට චෝදනා කරමින් යුක්රේන මාධ්‍යවේදියාට මෙලෙස සිර දඬුවම් නියම කෙරුණි. සිරදඬුවම් නියම වූයේ 49 හැවිරිදි වියේ පසුවන යුක්රේන මාධ්‍යවේදී රොමාන් ෂෂ්ච්චෙන්කෝය. 
 
රොමාන් පැරිසියේ සිට මොස්කව් නුවරට පැමිණි අතර එහිදි ඔහු යුක්රේනයේ රාජ්‍ය පුවත් ආයතනය වන ‘යුක්රිනිෆෝම්’ හි වාර්තාකරුවකු ලෙස සේවය කළේය. හෙතෙම 2016 වසරේදී රුසියාවේ එෆ්.එස්.බී ආරක්ෂක සේවයේ අත්අඩංගුවට පත්විය. 
 
මෙම සිදුවීමත් සමඟ යුක්රේනය සහ රුසියාව අතර තිබෙන මතභේදාත්මක තත්ත්වය තවදුරටත් උග්‍ර වනු ඇත.
 
යුක්රේනයේ සිටි රුසියානු හිතවාදී ජනාධිපතිවරයා බලයෙන් පහ කිරීමත්, රුසියාව ක්‍රිමියා කලාපය අල්ලා ගැනීමත් යනාදි සිදුවීම් හේතුවෙන් 2014 වසරේ සිට දෙරට අතර සබඳතා පළුදු වී තිබේ. මේ සිදුවීම් දාමයත් සමඟ යුක්රේනයේ නැගෙනහිර පෙදෙසේ රුසියානු හිතවාදී බෙදුම්වාදී කැරැල්ලක් ද ඇති විය. 
 
රුසියානු ආරක්ෂක අංශ සම්බන්ධයෙන් රහස් තොරතුරු එකතු කළ බවට රොමාන්ට චෝදනා එල්ල වන නමුත් හෙතෙම එම චෝදනා ප්‍රතික්ෂේප කරයි.