බොලිවියාවේ ජනාධිපති ඊවෝ මොරාලෙස් මහතා සිය පදවියෙන් ඉල්ලා අස්වී ඇත.

 මොරාලෙස් මහතා වසර 14කට ආසන්න කාලයක් බොලිවියාවේ ජනපති ලෙස සේවය කළ අතර පසුගියදා පැවති මැතිවරණය දූෂිත එකක් බවට නැගුනු දැඩි විරෝධතා හමුවේ ඔහුට ඉල්ලා අස්වීමට සිදුවූ බව මාධ්‍ය වාර්තා කරයි.
 
මැතිවරණය නිරීක්ෂණය කළ ඇමරිකානු රාජ්‍ය සංවිධානය පවසා සිටියේ ඡන්ද විමසීමේ ප්‍රථිපල සහතික කළ නොහැකි බවයි.
 
විගණන නිලධාරීන් විසින් ද ඡන්ද අක්‍රමිකතා සිදුවී ඇති බව සොයාගෙන ඇති නමුත් මොරාලෙස් මහතා කියා සිටියේ තමා කුමන්ත්‍රණයකට ගොදුරු වූ බවයි.
 
 පාක්ෂිකයින්ට පහරදීම හා නිවාස පුළුස්සා දැමීම නතර කරන ලෙස මොරාලෙස් මහතා විරෝධතාකරුවන්ගෙන් ඉල්ලා සිටියේ ය.
 
 මැතිවරණයෙන් පසුව ඇතිවූ ගැටුම් වලින් පුද්ගලයින් තිදෙනකු මියගිය අතර නගර කිහිපයකදී පොලිස් නිලධාරීන් ද විරෝධතාවයන්ට ඒක්වූ බව වාර්තා විය.
 
 සාමය හා ස්ථාවරත්වයට ඉඩදී ඉල්ලා අස්වන ලෙස හමුදා ප්‍රධානී ජෙනරාල් විලියම්ස් කාලිමන් මහතා ද මොරාලෙස් මහතාගෙන් ඉල්ලා සිටියේ ය.
 
 කෙසේවුවද දකුණු ඇමරිකාවේ දිළිඳු රාජ්‍යයක් වන බොලිවියාවේ ප්‍රථම ආදිවාසී නායකයා වූ ඊවෝ මොරාලෙස් දුප්පත් ජනතාව නගා සිටුවීමට ඇප කැපවී ක්‍රියා කල නායකයෙකු බව සඳහන් වේ.
 
 
(බීබීසී ඇසුරිණි - 085)